قازاقستانعا رەسمي ساپارمەن بولگاريا رەسپۋبليكاسىنىڭ پرەزيدەنتى رۋمەن رادەۆ كەلدى. قازاقستان مەن بولگاريا پرەزيدەنتتەرى كەڭەيتىلگەن قۇرامدا كەلىسسوزدەر جۇرگىزدى.
كەلىسسوز بارىسىندا ەكىجاقتى كۇن تارتىبىندەگى ماسەلەلەر كەڭىنەن تالقىلاندى. مەملەكەت باسشىسى رۋمەن رادەۆتىڭ وكىلدى دەلەگاتسيامەن ساپارى ەكىجاقتى ىنتىماقتاستىقتى نىعايتۋ ءۇشىن جاڭا پەرسپەكتيۆالار اشاتىنىن اتاپ ءوتتى. ول سونداي-اق تاۋار اينالىمىنىڭ تۇراقتى ءوسۋىن جانە ونى ۇلعايتۋ ءۇشىن بار الەۋەتتى اتاپ ءوتتى.
قاسىم-جومارت كەمەلۇلى بولگاريالىق كومپانيالارمەن جانە ينۆەستورلارمەن ءوزارا ءىس-قيمىلعا قولداۋ ءبىلدىرىپ، بۇل قىزمەتتىڭ تابىستى بولۋىن قامتاماسىز ەتۋدە ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا شەشۋشى ءرول اتقارۋعا ءتيىس ەكەنىن اتاپ ءوتتى. سونداي-اق، سەرىكتەستىكتى ودان ءارى نىعايتۋعا جانە قازاق-بولگار قاتىناستارىن دامىتۋعا ىقپال ەتەتىن جاڭا باستامالاردى ىسكە اسىرۋعا ءوزارا مۇددەلىلىك راستالدى.
مەملەكەت باسشىسى قاسىم-جومارت توقاەۆ پەن بولگاريا پرەزيدەنتى رۋمەن رادەۆتىڭ كەلىسسوزدەرى اياقتالعاننان كەيىن قول قويىلعان ەكىجاقتى قۇجاتتارمەن الماسۋ ءراسىمى ءوتتى. رەسمي دەلەگاتسيالاردىڭ مۇشەلەرى كەلەسى قۇجاتتارمەن الماستى:
1. قازاقستان رەسپۋبليكاسى كولىك مينيسترلىگى مەن بولگاريا رەسپۋبليكاسى كولىك جانە كوممۋنيكاتسيالار مينيسترلىگى اراسىنداعى ترانسكاسپي حالىقارالىق كولىك ءدالىزىن دامىتۋ بويىنشا ءوزارا تۇسىنىستىك تۋرالى مەموراندۋم;
2. استانا مەن سوفيا قالالارى اراسىنداعى ءوزارا تۇسىنىستىك تۋرالى مەموراندۋم;
3. شىمكەنت جانە پلوۆديۆ قالالارى اراسىندا باۋىرلاستىق قارىم-قاتىناس ورناتۋ تۋرالى مەموراندۋم;
4. قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى مەن بولگاريا رەسپۋبليكاسىنىڭ سىرتقى ىستەر مينيسترلىگى ديپلوماتيا ينستيتۋتى اراسىنداعى ءوزارا تۇسىنىستىك تۋرالى مەموراندۋم.
