شىمكەنتتەگى ءىرى ساۋدا ورتالىقتارىندا دارىگەرلەر تۇرعىنداردى قابىلداي باستادى. قر تاۋەلسىزدىگىنىڭ 30 جىلدىعىنا ورايلاستىرىلعان دەنساۋلىق كۇنى اياسىندا «شىمكەنت-پلازا»، «مەگا-پلانەت»، «سەۆەر» ساۋدا ويىن-ساۋىق ورتالىقتارىنىڭ قىزمەتكەرلەرى مەن قالا تۇرعىندارىن بەيىندى ماماندار تەگىن قابىلداپ، مەديتسينالىق كومەك كورسەتەدى.
بيىلعى دەنساۋلىق كۇنىنىڭ باستى تاقىرىبى – «دەنى ساۋدىڭ – جانى ساۋ» اتتى ۇرانمەن ۇيىمداستىرىلىپ وتىر.
قالاداعى ادام كوپ شوعىرلاناتىن ساۋدا ورتالىعىنىڭ بىرىنە ارنايى كەلگەن قالالىق №1 ەمحانانىڭ باس دارىگەرى ماحامبەت بەيسەۋوۆ پاندەميا كەزىندە دەنساۋلىق كۇنىنىڭ اتالىپ ءوتۋى ماڭىزدى ەكەنىن ايتتى.
– قوعامدىق ورىندا مەديتسينا ماماندارىنىڭ قابىلداۋ جۇمىستارى ساعات 10:00 مەن 18:00 ارالىعىندا جۇرەدى. كەز-كەلگەن قالا تۇرعىنى ورتالىققا كەلىپ دارىگەردىڭ تەكسەرۋىنەن وتە الادى. تاڭعى ۋاقىتتان بەرى 50-دەن استام ادام كەلىپ، دەنساۋلىعىنا قاتىستى شاعىمدارىن دارىگەرلەرگە ايتىپ، تەگىن كەڭەس الدى. بىزدە پەدياتر، كارديولوگ، نەفرولوگ، وكۋليست، تەراپەۆت، نەۆروپاتولوگ دارىگەلەرى كونسۋلتاتسيا بەرىپ جاتىر. اكتسيانىڭ ءبىر ەرەكشەلىگى كەلۋشىلەرگە دارىگەرلەردىڭ قابىلداۋىنا جازىلۋ مىندەتتەلمەيدى. كەيبىر بەيىندى مەديتسينا قىزمەتكەرلەرى قۇرىلعىلارىنىڭ بولماۋىنا بايلانىستى كەلە المادى، - دەدى باس دارىگەر.
ساۋدا ورتالىعىندا جۇمىس ىستەيتىن ەدىل اقباەۆ دارىگەرلەردىڭ كەڭەسىنە جۇگىنىپ، مەديتسينا سالاسىنىڭ ماماندارىنا العىسىن ءبىلدىردى.
– كوبىنە جۇمىستان قول بوساماي دەنساۋلىعىمىزعا كوڭىل بولمەي كەتەتىنىمىز بار. ورتالىعىمىزعا دارىگەرلەردىڭ ءوزى ىزدەپ كەلىپ تۇرعاندا، مۇنداي مۇكىندىكتى جىبەرمەيىن دەپ كارديولوگ، وكۋليستتىڭ كەڭەسىن الدىم. كوزىم مەن جۇرەگىم مازالايتىن. ەمحانالارعا بارساق كەزەك كوپ بولادى. الدىن الا جازىلۋ ارقىلى قابىلدايدى. بۇل جەردە ىزدەگەن دارىگەرلەرىمنىڭ كەلگەنى قۋناتىپ تۇر. قولىما رەتسەپت جازىپ بەردى. ەندى ەم قابىلداپ، دەنساۋلىعىمىزعا دا قارايمىز. وسىنداي اكتسيالار ءجيى بولىپ تۇرسا، حالىق ءۇشىن پايدالى عوي، - دەدى ول.
دەنساۋلىق كۇنىنىڭ اياسىندا قالانىڭ شالعاي اۋداندارىندا دا بەيىندى مامانداردىڭ تەكسەرۋى وتۋدە. اتاپ ايتقاندا، №11 قالالىق ەمحاناسىنا قاراستى «اقتاس» دارىگەرلىك امبۋلاتورياسىندا №10 قالالىق ەمحاناسىنا قاراستى «قاينار» فاپ-دە، №12 قالالىق ەمحاناسىنا قاراستى «شاپىراشتى» دارىگەرلىك امبۋلاتورياسىندا، №7 قالالىق ەمحاناسىنا قاراستى «توعىس» دارىگەرلىك امبۋلاتورياسىندا حالىققا مەديتسينالىق كومەك كورسەتۋدە.
