شىمكەنتتە تۇڭعىش پرەزيدەنت كۇنىنە وراي قوعامدىق كولىكتىڭ 3 جاڭا باعىتى ىسكە قوسىلىپ، 50 جاڭا اۆتوبۋس جولاۋشىلارعا قىزمەت كورسەتە باستادى. «رادۋگا ترانسپورت» جاۋاپكەرشىلىگى شەكتەۋلى سەرىكتەستىگىنە تيەسىلى اۆتوبۋستاردىڭ كىلتىن جۇرگىزۋشىلەرگە قالا اكىمى مۇرات ايتەنوۆ تابىس ەتتى.
— بارشاڭىزدى تۇڭعىش پرەزيدەنت كۇنىمەن شىن جۇرەكتەن قۇتتىقتايمىن. ەلباسىنىڭ سارا ساياساتىنىڭ ارقاسىندا ەلىمىزدە حالىقتىڭ ءال-اۋقاتىن جاقسارتۋ، ءومىر ءسۇرۋ ساپاسىن ارتتىرۋ ماقساتىندا كوپتەگەن جۇمىستار اتقارىلىپ كەلەدى. سونىڭ ءبىر كورىنىسى رەتىندە مەرەكەگە وراي شىمكەنتتىڭ اۆتوبۋس پاركى جاڭا 50 كولىكپەن تولىعىپ وتىر. بۇل قوعامدىق كولىك قىزمەتىن كۇندەلىكتى پايدالاناتىن تۇرعىندار ءۇشىن ۇلكەن قۋانىش، — دەدى مۇرات دۇيسەنبەكۇلى.
ايتا كەتەيىك، Yutong ماركالى اۆتوبۋستار وتاندىق «سارىارقااۆتوپروم» كومپانياسىنىڭ زاۋىتىندا قۇراستىرىلعان. سىيىمدىلىعى 66 ادامدىق زاماناۋي، جايلى كولىكتەر بارلىق تالاپتارعا ساي: جەلدەتكىشتەرمەن، بەينەباقىلاۋ كامەرالارىمەن، پاندۋستارمەن جابدىقتالعان.
شاھار باسشىسىنىڭ ايتۋىنشا، سوڭعى جىلدارى قالادا قوعامدىق كولىك قىزمەتىنىڭ ساپاسىن جاقسارتۋدا جۇيەلى جۇمىستار قولعا الىنىپ، ناتيجەسىن بەرىپ كەلەدى. قازىرگى تاڭدا 13 تاسىمالداۋشى كومپانيا جولاۋشىلارعا 75 باعىت بويىنشا قىزمەت كورسەتەدى. ونىڭ ىشىندە 57-ءسى الەۋمەتتىك ماڭىزى بار باعىت رەتىندە بەلگىلەنگەن، جەرگىلىكتى بيۋدجەت ەسەبىنەن سۋبسيديالانادى.
—قالانىڭ اۆتوبۋس پاركىندە 1 مىڭنان استام كولىك بار. ونىڭ 87 پايىزعا جۋىعى جاڭارتىلدى.
بيىل شىمكەنتتە قوعامدىق كولىك جەلىسىن دامىتۋدىڭ كەشەندى جۇيەسى بەكىتىلدى. سونىڭ ناتيجەسىندە بىرقاتار باعىتتار وڭتايلاندىرىلىپ، جاڭا مارشرۋتتار ىسكە قوسىلدى.
سونىمەن قاتار، «Tolem» ەلەكتروندى تولەم جۇيەسى ىسكە قوسىلىپ، بۇگىندە ءوز ناتيجەسىن بەرۋدە. بارلىق اۆتوبۋستار تسيفرلىق جۇيە جانە GPS قوندىرعىلارمەن قامتىلدى. بۇل «ءى-Kolik» ءموبيلدى قوسىمشاسىن ازىرلەپ، قولدانىسقا ەنگىزۋگە مۇمكىندىك بەردى. وسى قوسىمشا ارقىلى تۇرعىندار قوعامدىق كولىكتىڭ قوزعالىسى بارىسىنان دەر كەزىندە حاباردار بولىپ، وزىنە قاجەت اۆتوبۋستىڭ قوزعالىسىن باقىلاي الادى، — دەدى م.ايتەنوۆ.
قالا اكىمى كەپتەلىستى ازايتۋ ماقساتىندا جول-كولىك ينفراقۇرىلىمىن دامىتۋعا دا كوڭىل ءبولىنىپ وتىرعانىنا توقتالىپ ءوتتى. ونىڭ ايتۋىنشا، بيىل 311 شاقىرىم جولداردا قۇرىلىس-جوندەۋ جۇمىستارى جۇرگىزىلىپ، ونىڭ 270 شاقىرىمى پايدالانۋعا بەرىلگەن.
ايتا كەتەيىك، جاڭا اۆتوبۋستاردىڭ 22-ءسى قولدانىستاعى №60 جانە №104 مارشرۋتتار بويىنشا قاتىناسا، قالعان 28-ءى جاڭادان ىسكە قوسىلعان №6, 51 جانە 67 باعىتتاردا جۇرەدى.
ايدار قۇلجانوۆ
