Shymkentte Tuńǵysh Prezıdent kúnine oraı qoǵamdyq kóliktiń 3 jańa baǵyty iske qosylyp, 50 jańa avtobýs jolaýshylarǵa qyzmet kórsete bastady. «Radýga transport» jaýapkershiligi shekteýli seriktestigine tıesili avtobýstardyń kiltin júrgizýshilerge qala ákimi Murat Áıtenov tabys etti.
— Barshańyzdy Tuńǵysh Prezıdent kúnimen shyn júrekten quttyqtaımyn. Elbasynyń sara saıasatynyń arqasynda elimizde halyqtyń ál-aýqatyn jaqsartý, ómir súrý sapasyn arttyrý maqsatynda kóptegen jumystar atqarylyp keledi. Sonyń bir kórinisi retinde merekege oraı Shymkenttiń avtobýs parki jańa 50 kólikpen tolyǵyp otyr. Bul qoǵamdyq kólik qyzmetin kúndelikti paıdalanatyn turǵyndar úshin úlken qýanysh, — dedi Murat Dúısenbekuly.
Aıta keteıik, Yutong markaly avtobýstar otandyq «Saryarqaavtoprom» kompanııasynyń zaýytynda qurastyrylǵan. Syıymdylyǵy 66 adamdyq zamanaýı, jaıly kólikter barlyq talaptarǵa saı: jeldetkishtermen, beınebaqylaý kameralarymen, pandýstarmen jabdyqtalǵan.
Shahar basshysynyń aıtýynsha, sońǵy jyldary qalada qoǵamdyq kólik qyzmetiniń sapasyn jaqsartýda júıeli jumystar qolǵa alynyp, nátıjesin berip keledi. Qazirgi tańda 13 tasymaldaýshy kompanııa jolaýshylarǵa 75 baǵyt boıynsha qyzmet kórsetedi. Onyń ishinde 57-si áleýmettik mańyzy bar baǵyt retinde belgilengen, jergilikti bıýdjet esebinen sýbsıdııalanady.
—Qalanyń avtobýs parkinde 1 myńnan astam kólik bar. Onyń 87 paıyzǵa jýyǵy jańartyldy.
Bıyl Shymkentte qoǵamdyq kólik jelisin damytýdyń keshendi júıesi bekitildi. Sonyń nátıjesinde birqatar baǵyttar ońtaılandyrylyp, jańa marshrýttar iske qosyldy.
Sonymen qatar, «Tolem» elektrondy tólem júıesi iske qosylyp, búginde óz nátıjesin berýde. Barlyq avtobýstar ıfrlyq júıe jáne GPS qondyrǵylarmen qamtyldy. Bul «i-Kolik» mobıldi qosymshasyn ázirlep, qoldanysqa engizýge múmkindik berdi. Osy qosymsha arqyly turǵyndar qoǵamdyq kóliktiń qozǵalysy barysynan der kezinde habardar bolyp, ózine qajet avtobýstyń qozǵalysyn baqylaı alady, — dedi M.Áıtenov.
Qala ákimi keptelisti azaıtý maqsatynda jol-kólik ınfraqurylymyn damytýǵa da kóńil bólinip otyrǵanyna toqtalyp ótti. Onyń aıtýynsha, bıyl 311 shaqyrym joldarda qurylys-jóndeý jumystary júrgizilip, onyń 270 shaqyrymy paıdalanýǵa berilgen.
Aıta keteıik, jańa avtobýstardyń 22-si qoldanystaǵy №60 jáne №104 marshrýttar boıynsha qatynasa, qalǵan 28-i jańadan iske qosylǵan №6, 51 jáne 67 baǵyttarda júredi.
Aıdar QULJANOV
