سوڭعى ۋاقىتتا ەل اۋزىندا جۇرگەن، 90-جىلدارداعى ادام ولتىرۋشىلەر جايلى تۇسىرىلگەن "5:32" ۆەب-سەريالى ميلليونداعان قارالىم جيناۋدا. ەڭ قىزىعى، سەريال شىنايى وقيعاعا نەگىزدەلگەن. ءاربىر سەرياداعى مانياكتار شىنايى ومىردە بولعان ادامدار. ولار كىمدەر؟
ۆەب-سەريالدىڭ ءبىرىنشى سەرياسىندا مانياك-تاكسيستتەردىڭ وقيعاسى بەينەلەنەدى. ۆوكزالدان ۇيىنە قايتپاق بولعان الىستا تۇراتىن قىزداردى ارزان باعادا ۇيگە جەتكىزەمىن دەپ الداعان تاكسيست، جوسپار بويىنشا جولاۋشى قىزدى الدىڭعى ورىندىققا وتىرعىزىپ الادى. جولاي كەزدەسكەن سىبايلاس جىگىتتى، جولاۋشى دەپ الداپ، ارتقى ورىندىققا وتىرعىزادى. سىبايلاسى ارتقى ورىندىقتا وتىرىپ، تەمىر سىممەن قىزدى قىلقىندىرىپ ءولتىرىپ، كەيىننەن زورلاپ، ورتەپ جىبەرەدى.
ءبىرىنشى بولىمدە كورسەتىلگەن وقيعا شىن ومىردە 2011-2012 جىلدارى اراسىندا شىمكەنت قالاسىندا ورىن العان. قورقىنىشتى وقيعادا قىلمىسكەر سىنىپتاستارىن زورلاعان، ارتىنشا ولتىرگەن. ومىردەگى ەسىمى - بولاتباي بەرداليەۆ, ال جولدان وتىرعان سىبايلاسىنىڭ ەسىمى ابدۋسەيت ورمانوۆ. وسىنداي جوسپار بويىنشا قانشاما قىلمىس جاساعان ەكى دوس، ۇستالىپ، ءومىر باقي باس بوستاندىعىنان ايىرۋ جازاسىنا كەسىلەدى.
سەريالدىڭ ەكىنشى بولىمىندە ادامداردى ءولتىرىپ، ەتىنەن بەلياشي جاساپ ساتقان ايەل كەيىپكەر تۋرالى باياندالادى. ستسەناري جەلىسى بويىنشا، ايەل كوشەدەگى القاشتارعا اراق بەرىپ قاتىرىپ، ارتىنشا ءولتىرىپ، دەنەسىن بولشەكتەپ، ەتىنەن بەلياشي جاسايدى. ونى ءوزى دە جەپ، ساتىپ ءتىپتى، كاسىپ قىلادى. بۇل كەيىپكەر نەگىزىنەن شىنايى ومىردەگى نيكولاي جۇماعاليەۆ ەسىمدى سەريالى مانياكتىڭ ءپروتاتيپى.
نيكولاي ءوزىنىڭ العاشقى قۇربانىن قالاي ءولتىردى؟
1979 جىلى قاڭتار ايىندا ۇزىناعاش – مايبۇلاق تاس جولىندا جۇماعاليەۆ جالعىز ءجۇرىپ بارا جاتقان قىزدى كورىپ قالادى. جاس جىگىت قىزدى ارتىنان قۋىپ جەتىپ، كەۋدە تۇسىنا پىشاق سۇعىپ، بۇتالاردىڭ اراسىنا سۇيرەپ اپارعان. قىزدى جەرگە قۇلاتقان جۇماعاليەۆ پىشاقتى ونىڭ تاماعىنان ءتىلىپ، قانىن ىشە باستاعان.
مانياكتى بۇل ارەكەتكە ونىڭ وككۋلتيزمگە دەگەن قۇمارلىعى يتەرمەلەدى: ول ءوزىنىڭ وقىعان كىتاپتارىنىڭ بىرىندە ادامدى تاماعىنان كەسۋ ارقىلى جانىنىڭ دەنەدەن قالاي شىعاتىنىن كورۋگە بولاتىنىن وقىعان. سونىمەن قاتار، جۇماعاليەۆ كىتاپتاردان قۇربانىنىڭ قانىن ءىشۋ ارقىلى ادام كورىپكەلدىك قابىلەتكە يە بولاتىنى جايىندا وقىپ بىلگەن. بىراق شىندىعىندا ول، قىزدى ءولتىرىپ ونىڭ جانىن قالاي شىققانىن كورە المادى جانە ەشقانداي تىلسىم كۇشتەرگە يە بولمادى - بىراق قاراپايىم مانياك اتاندى.
جۇماعاليەۆ ولتىرگەن قىزدىڭ ەتىن تاماققا پايدالانۋدى جوسپارلاپ، ءمايىتتى سويىپ، بولشەكتەي باستاعان. ول ءبىر ايعا جۋىق العاشقى قۇربانىنىڭ ەتىن جەدى: ءپىسىرىپ، قۋىرىپ، تۇزدادى، سونىمەن قاتار كوتلەتتەر مەن تۇشپارا دا ءپىسىردى. جۇماعاليەۆ دەنە قالدىقتارىن پۇتقا تابىنۋشىلىق راسىمدەرى ءۇشىن پايدالاندى. قۇرباننىڭ قالدىق دەنەسىن كەزدەيسوق ءوتىپ بارا جاتقاندار 25 قاڭتاردا فابريچنىي اۋىلى ماڭىنداعى قوقىس تاستايتىن جەردەن تاۋىپ العان.
ءتورتىنشى سەرياداعى جالعىز اياقتى شالدىڭ وقيعاسى دا ومىردەن الىنعان. ونىڭ شىن ومىردەگى ەسىمى - الەكساندر دۋدنيك. ال بۇل وقيعا شىنايى ومىردە دە ءدال سەريالداعىداي بولدى:
ۆيشنەۆكا اۋىلى، 1993 جىل. سول جىلدارى وسى اۋىل ايماقتارىندا قاتىناۋ كولىكتەرى از بولاتىن. ناتاليا ەسىمدى جاس ارۋ، ءوز اۋىلىنا اناسىنا كارتوپ قازۋعا كومەكتەسۋگە بارماقشى بولادى. الايدا اق نيەتتى ارۋ قىز، ۇيىنە، اناسىنا جەتە المادى. قىزدىڭ دەنەسىن ءبىر ايدان سوڭ اۋىل ماڭىنداعى ورماننان مال باعۋشىلار تاۋىپ الادى. ساناۋلى كۇندەردەن سوڭ وسى اۋداننان تاعى ءبىر ايەلدىڭ جوعالعانى تۋرالى دەرەك كەلىپ تۇسەدى. ءۇش بالانىڭ اناسى بولعان ايەلدىڭ جوعالعانى تۋرالى ءىس اياقتالماعان كۇيى كوكتەمگە دەيىن قالادى. كەيىننەن 1994 جىلدىڭ ماۋسىم ايىندا تاعى ءبىر ايەل جوعالىپ كەتەدى. بۇل جولعى ىسكە تاجىريبەلى پوليتسەيلەر مەن جۋرناليستەر دە جۇمىلدىرىلدى. انىقتالعان فاكتىلەر بويىنشا، ايەل جولعا شىققان كۇنى جولدان ءجۇرىپ وتكەن جۇرگىزۋشى الىستان ءبىر قارانى بايقاعانىن بايانداعان. ەرەكشەلىگى ول كارى كىسى، ءارى ءبىر اياعى جوق, دەگەن ەكەن. ال بۇل 56 جاستاعى سول الەكساندر بولاتىن.
الەكساندر سول ۋاقىتقا دەيىن دە، "زورلاۋ" بابى بويىنشا تۇرمەدە وتىرىپ شىققان. ول ون بەس جىلعا سوتتالعان بولاتىن. ءتىپتى ءبىر رەت جەرتولە ارقىلى تۇرمەدەن قاشىپ تا كەتكەن ەكەن. وعان ءولىم جازاسى تاعايىندالعانىمەن سوت شەشىمى مەيىرىمدىلىك تانىتىپ، ونىڭ باس بوستاندىعىنان ايىرۋ جازاسىن 18 جىلعا ۇزارتتى. الايدا وسى جولعى قىلمىستارى ءۇشىن الەكساندرعا راسىمەن دە، ءولىم جازاسى تاعايىندالدى. وسىلايشا ونى 1996 جىلدىڭ 5 ساۋىرىندە اتۋ جازاسىنا كەستى.
"ادىرنا" ۇلتتىق پورتالى
