قۇشاعى كەڭ باۋىرمال قازاق حالقى ەلىمىزگە الەمنىڭ تۇكپىر-تۇكپىرىنەن كەلگەن كوپتەگەن وزگە ەتنوس وكىلدەرىنە پانا بولىپ، ادال نيەتىمەن باۋىرىنا تارتتى. مەملەكەت قۇرۋشى ۇلت پەن ەتنوستار اراسىنداعى بىرلىك پەن تاتۋلىقتى ءبىر ارناعا توعىستىرىپ، ءبىر شاڭىراق استىندا بىرىكتىرۋدىڭ سارا جولى - قازاقستان حالقى اسسامبلەياسىن قۇرۋ ەدى.
اتالمىش قۇرىلىمنىڭ بۇگىنگى كۇنى قولعا الىپ جاتقان جوبالارىمەن تانىسقىسى كەلەتىن وقىرماندارىمىزدىڭ سانى از ەمەس. وسى كەزەكتە قاراعاندى وبلىستىق ءماسليحاتىنىڭ دەپۋتاتى، قاراعاندى وبلىسى بويىنشا قحا توراعاسىنىڭ ورىنباسارى، قحا قوعامدىق كەلىسىم كەڭەسىنىڭ توراعاسى، مەتسەنات بەكزات التىنبەكوۆكە اتقارىپ جاتقان ءىس-شارالارى جونىندە بىرنەشە ساۋال جولداپ، كوكەيىمىزدە جۇرگەن سۇراقتارعا تولىمدى جاۋاپ العان ەدىك.
- بەكزات قومارۇلى، قاراعاندى وبلىسى قازاقستان حالقى اسسامبلەياسىنىڭ بۇگىنگى قوعامداعى ءرولى قانداي؟ اتالمىش ينستيتۋت ءوز جۇمىسىن لايىقتى دەڭگەيدە اتقارىپ وتىر ما؟
- «بىرلىك بار جەردە – تىرلىك بار»، - دەيدى دانا حالقىمىز. تىرلىكتىڭ سان قيلى تەپەرىشىن باسىنان وتكەرگەن، قاي زاماندا دا قيىندىقتان قايىسپاعان حالقىمىز وسى ءسوزدىڭ استارىنا ۇلكەن ماعىنا سىيعىزدى. حالىق بىرلىگى عانا مەملەكەتتىڭ نەگىزگى قوزعاۋشى كۇشى بولا الاتىنىن ءدوپ باسىپ ايتتى. بىرلىكتىڭ رۋحاني نەگىزى مەن ەلدىڭ بىرتۇتاستىعى، تولەرانتتى قارىم-قاتىناس ەتنوسارالىق جانە كونفەسسياارالىق كەلىسىمدى قالىپتاستىرۋدا ازاماتتىق قوعام مەن مەملەكەتتىك ينستيتۋتتاردىڭ ءوزارا ءىس-قيمىلىنا، ءتيىمدى ديالوگىنا جاعداي جاسادى. ەلدەگى تۇراقتىلىق پەن كەلىسىمدى ساقتاۋدا تىكەلەي ەلباسىنىڭ باستاماسىمەن قۇرىلعان، اۋەلدە قازاقستان حالىقتارى اسسامبلەياسىنىڭ اتالعان قۇرىلىمنىڭ ءرولى زور بولدى. مەملەكەتتى قۇرۋشى قازاق ۇلتىنىڭ اينالاسىنا شوعىرلانعان ءتۇرلى ەتنوس وكىلدەرى اسسامبلەيا ارقىلى رۋحاني تۇرعىدا قايتا تۇلەدى. ونىڭ 26 جىلدىق تاريحى جەتىستىككە جەتۋ جولىنداعى قيىن دا قاۋىرت ەڭبەك جولىنان ءورىلدى. تاريحتىڭ وسىناۋ كەزەڭدەگى پاراقتارىندا ءار وڭىردەگى ءتۇرلى ۇلتتاردىڭ عاجايىپ ۇيلەسىمدىلىگى، تاتۋ-ءتاتتى تىرشىلىگى، تاۋەلسىز ەلىمىزدى كوركەيتۋدەگى ەرەن ەڭبەگى جازىلدى. اسىل مۇراتىمىز – ىنتىماق، اسقاق ارمانىمىز – تۇراقتىلىق پەن بەيبىتشىلىك. وسى قۇندىلىقتار قازاقستاندى تاريحي وتانى سانايتىن 100 دەن استام ۇلتتىڭ ورتاق مۇددەسىنە اينالدى. بۇل جەردە ەلباسى ساياساتى مەن قازاق حالقىنىڭ كونەدەن كەرۋەن تارتقان جومارتتىعىنىڭ، كەڭ پەيىلى مەن مەيىرىمىنىڭ ۇندەستىگى نەبىر تاريحي تاۋەكەلدەردە جەڭىسكە جەتۋىمىزگە دانەكەر بولعانىن اڭعارۋعا بولادى. بۇل دا – دالەلدەۋدى قاجەت ەتپەيتىن اكسيوما.
ەستەرىڭىزدە بولار، كەشەگى كەڭەس داۋىرىندە «ازشىلىق كوپشىلىككە باعىنادى» دەگەن سىڭارجاق قاعيدا بولدى. مۇنىڭ استارىندا كوپتىڭ ازعا كورسەتەر الىمجەتتىگى مەن ۇستەمدىگى تۇرعانى بەلگىلى. الايدا، قازاققا بۇنىڭ قاجەتى بولعان جوق. تاعدىر تالايىمەن قازاقستانعا قونىس اۋدارعان جۇزدەگەن ۇلتتىڭ ءجۇزىن جارقىن ەتۋگە تىرىستىق. بۇل ءبىزدىڭ قانىمىزعا سىڭگەن دارا قاسيەتىمىز ەدى. دەي تۇرعانمەن، دارالىعىمىزدى پۇلداپ، جات جۇرتتىڭ بالاسىنا ۇسىنعان ءدامىمىز بەن شىعارعان ءتورىمىزدى قۇنداعان كەزىمىز بولعان ەمەس. ءدال وسى كەڭدىگىمىز كەلەشەگىمىزدىڭ كەمەلدىگىنە نەگىز بولدى.
- قازىرگى تاڭدا مەملەكەت باسشىسىنىڭ تاپسىرماسىنا سايكەس دوستىق ۇيلەرىن سالتاناتتى جيىنداردى وتكىزۋ زالدارى رەتىندە ەمەس، قحا-نىڭ حالىق باستامالارىنىڭ رەسۋرستىق ورتالىقتارى مەن جوبالىق كەڭسەلەرىنە اينالدىرۋ مىندەتتەرى جۇكتەلدى. بۇل باعىتتا وبلىستىق اسسامبلەيا جۇمىستارىنىڭ ناتيجەسى قانداي؟
- حالىق اراسىندا اسسامبلەيا تەك ۇلتتاردىڭ مادەنيەتىن، ءانىن-ءبيىن دارىپتەيدى دەگەن سىڭارجاق پىكىر قالىپتاسقان. بۇل ارينە دۇرىس ەمەس. قحا بۇگىندە ءوزىنىڭ اتقارىپ جاتقان شارالارمەن قوعامداعى بۇكىل وزگەرىستەرگە ۇلەسىن قوسۋدا. ايماقتا اتقارىلىپ جاتقان بارلىق شارادا ءبىزدىڭ ءوز ورنىمىز بار. مىسالى، وبلىسىمىزدىڭ ءاربىر اۋدان قالاسىندا جانە دە ءىرى ءوندىرىس ورىندارىندا 216 «قوعامدىق كەلىسىم كەڭەستەرى» قۇرىلعان. كەلىسىم كەڭەستەرى وندىرىستەگى جۇمىسكەرلەردىڭ قۇقىعىن قورعايدى، ونداعى ورىن العان كيكىلجىڭدەردى شەشۋگە كومەكتەسەدى، مەدياتسيامەن اينالىسادى. مەدياتسيا ۇعىمى حالقىمىز ءۇشىن جاڭا تەرمين بولعانىمەن، كەشەگى بيلەر ينستيتۋتىنىڭ جالعاسى ىسپەتتى. دوستىق ۇيىندەگى مەدياتسيا كابينەتى ەل اراسىنداعى كوپتەگەن داۋلاردىڭ سوتقا جەتپەي شەشىمىن تاۋىپ، حالىقتىڭ ءوزارا بىتىمگەرشىلىككە بارۋىنا مۇرىندىق بولىپ وتىر. بۇگىندە مۇنداعى مەدياتورلاردىڭ قاتىسۋمەن التى جۇزدەن استام داۋ ءتيىمدى شەشىلگەن.
مامىلەگە كەلۋ، بىتىمگە بارۋ، سوزگە توقتاۋ ءبىزدىڭ قانىمىزدا بار، اتا-بابامىزدان كەلە جاتقان ءۇردىس. ياعني مەدياتسيا ءسوزى ءبىز ءۇشىن قانشالىقتى تاڭسىق بولسا، سونشالىقتى جاقىن ۇعىم دەپ ايتۋعا بولادى. ءبىزدىڭ وبلىس اسسامبلەياسى ءبىلىم باسقارماسىمەن، وبلىستىق سوتپەن، پوليتسيا دەپارتامەنتىمەن مەدياتسيا سالاسى بويىنشا ءوزارا ىنتىماقتاستىق مەموراندۋمىنا قول قويعان. مەموراندۋم اياسىندا ءبىرشاما جۇمىستار اتقارىلۋدا. ماسەلەن، مەكتەپتەردە تۋىنداعان قانداي دا ءبىر كيكىلجىڭ ماسەلەلەردىڭ شەشىمىن تابۋعا كومەكتەسەتىن مەكتەپ مەدياتسياسى بار. سونداي-اق، مەكتەپتەرگە انالار كەڭەسىنىڭ وكىلدەرىن، وڭىردەگى بەتكە ۇستار، اقىلىمەن، ونەگەسىمەن جول كورسەتەر، قوعامدا وزىندىك ورنى بار اقساقالدارىمىزدى جىبەرەمىز.
دوستىق ۇيىندە نۇر وتان پارتياسىمەن بىرلەسىپ قازىنالى قاريالارعا ارنالىپ اشىلعان بەلسەندى ءومىر ورتالىعى، تىلدەردى دامىتۋ باسقارماسىنىڭ "رەسۋرستىق ءتىل ورتالىعى", دۇنيەجۇزى قازاقتارى قاۋىمداستىعىنىڭ فيليالى ورنالاسقان. وبلىس، رەسپۋبليكا، قالا دەڭگەيىندەگى بارلىق اۋقىمدى شارالار دوستىق ۇيىندە وتەدى. جالپى، دوستىق ءۇيى - ازاماتتىق باستامالار ورتالىعى دەسە دە بولادى.
- پرەزيدەنتتىڭ قحا-عا جۇكتەگەن مىندەتتەرىنىڭ قاتارىندا قالالار مەن اۋىلداردا وقشاۋلانعان ەتنيكالىق اۋداندار مەن كۆارتالداردى ەڭسەرۋگە باعىتتالعان جۇيەلى شارالار ازىرلەۋ دە بار. وسى تۇرعىدان كەلگەندە وڭىردەگى ىشكى ساياسي تۇراقتىلىقتىڭ ساقتالۋىن قالاي باعالايسىز؟
- ەتنوسارالىق قاتىناستاردىڭ بىرىڭعاي رەسپۋبليكالىق مونيتورينگى اياسىندا توقسان سايىن وبلىستىڭ قالالارى مەن اۋداندارىنداعى ەتنوسارالىق قاتىناستاردىڭ جاي-كۇيىن، تولەرانتتىلىق پەن ەتنوسارالىق كەلىسىم دەڭگەيىن، حالىقتىڭ جالپى ازاماتتىق قارىم-قاتىناسىن زەردەلەۋ ماقساتىندا الەۋمەتتىك زەرتتەۋلەر جۇرگىزىلەدى.
قاراعاندى وبلىسىنىڭ تۇرعىندارى قويىلعان سۇراقتارعا جاۋاپ بەرە وتىرىپ، ولاردىڭ ومىرىنە جانە وڭ الەۋمەتتىك ءال-اۋقاتىنا قاناعاتتانۋشىلىقتىڭ جوعارى دەڭگەيىن ءبىلدىردى – 75%. رەسپوندەنتتەر ەلدەگى ۇلتارالىق جاعدايدى «تىنىش» جانە «قاۋىپسىز» – 80% دەپ باعالادى. ەتنيكالىق قۇقىقتاردىڭ ساقتالۋىنا جۇرگىزىلگەن مونيتورينگ وبلىستا اسا قاۋىپتى، نارازىلىق كوڭىل-كۇيلەرىنىڭ جوقتىعىن كورسەتتى.
قازاقستاندا ۇلتارالىق كەلىسىمدى ساقتاۋ سالاسىنداعى مەملەكەتتىك ساياساتتى حالىقتىڭ 85 پايىزى قولدايدى. جالپى، حالىق اراسىندا قحا قۇرىلىمدارىنا دەگەن سەنىمنىڭ جوعارى دەڭگەيى جانە ولاردىڭ قىزمەتىنە قوعامدىق سانادا جەتكىلىكتى جوعارى باعا بەرۋ تۋرالى ايتۋعا بولادى.
- سوڭعى جىلدارى ەل ىشىندە بىرنەشە قاقتىعىستار ورىن الدى. قاراعاندى، ماسانشى، پەنجىم، مولوۆودنوە جانە تاعى باسقا. حالىق ەتنوسارالىق سيپات بار دەيدى، كەي ساراپشىلار دا وعان كەلىسەدى. وسىعان وراي وڭىردەگى ەتنوسارالىق ماسەلەلەر قالاي شەشىمىن تابۋدا؟ بۇل بويىنشا وبلىستىق اسسامبلەيانىڭ پوزيتسياسى قانداي؟
- بىزگە تاۋەلسىزدىك جانكەشتىلىكپەن، بابالاردىڭ ۇلى اماناتىمەن، انالاردىڭ كوز جاسىمەن كەلگەن ۇلى باقىت، ۇزاق كۇتكەن كۇن. ازاتتىق – ءبىزدىڭ باستى قاسيەتىمىز، تىرەگىمىز! سوندىقتان، وسى كۇندە تاۋەلسىزدىگىمىزگە، ەلدىگىمىزگە، جەرىمىزگە، بەرەكە-بىرلىگىمىزگە سۇقتانا قارايتىن، قىزعانىش تانىتاتىن ادامدار از ەمەس.
«ءبىرىڭدى، قازاق، ءبىرىڭ دوس» دەپ، حاكىم اباي ايتقان اسىل سوزدەن الىستاماي، ارانداتۋشىلار مەن ءبىزدى جىك-جىككە بولۋگە نيەتى بار توپتاردان ساق بولۋىمىز قاجەت. جالپى ءبىزدىڭ ەلىمىزدىڭ ەڭ باستى ۇستانىمى – بەيبىتشىلىك پەن كەلىسىم، تۇراقتىلىق پەن ىنتىماق. بۇل – قاشان دا ەل ىشىندەگى بەرەكەنى قالىپتاستىراتىن جانە ۇستاپ تۇراتىن اسا ماڭىزدى قۇندىلىقتار. قازاقستان رەسپۋبليكاسىنىڭ تۇڭعىش پرەزيدەنتى، ەلباسى نۇرسۇلتان ءابىشۇلى نازارباەۆتىڭ باستاماسىمەن اسسامبلەيانىڭ قۇرىلعانى دا وسى ماقساتتارعا قول جەتكىزۋگە، ۇستانىمداردى ۇلىقتاۋعا باعىتتالعان. اسسامبلەيانىڭ پوزيتسياسى – قاشان دا دوستىقتى باعالاۋ، ەل اراسىنداعى ارازدىققا اراشا بولۋ، حالىقتى ۇيىستىرۋ.
قازىرگى تاڭدا وتباسىلىق كيكىلجىڭدەردى، تۇرمىستىق ۇرىس-كەرىستەردى جانە بالالاردىڭ اراسىنداعى كەلىسپەۋشىلىكتەردى ۇلتتىق دەڭگەيگە كوتەرۋ كوبەيىپ كەتتى. ول – دۇرىس ەمەس دەپ ەسەپتەيمىن. وسىنداي جاعدايلاردان استار ىزدەۋ، ونى ەتنوسارالىق قاقتىعىس رەتىندە قوعامنىڭ ىشىنە ءدۇمپۋ سالۋ جاقسىلىققا اكەلمەيدى. ءبىز – ۇلى دالا زاڭىنا باعىنعان، اتالى سوزگە توقتاعان اقىلدى حالىقپىز. بابادان ميراس بولىپ ساقتالعان وسىناۋ ۇلى دالا – ءبىزدىڭ ەل، ءبىزدىڭ جەر! وعان ەشكىم ءشۇبا كەلتىرمەسىن. وسىنداي قاقتىعىستاردا كەرىسىنشە، اقىل ايتار اقساقالداردى ورتاعا سالىپ، ەكى اۋلەتتىڭ باسىن قوسىپ بەرەكەگە شاقىرۋ ماڭىزدىراق. شاڭىراعىمىزدىڭ شايقالماۋى ارقايسىمىزدى الاڭداتۋى ءتيىس. وسى ورايدا، «تۇيمەدەيدى – تۇيەدەي قىلىپ» كەرەك ەمەس دەر ەدىم. قازاق جەرىنە قونىستانعان ەتنوس وكىلدەرىنە ءوزىمىزدى سىيلاتىپ، ءوزىمىزدى ۇلگى ەتىپ، تاتۋلىقتى تۋ ەتىپ جايدارلى كۇن كەشكەنگە نە جەتەر!؟ بەرەكە-بىرلىگىمىز ارتا بەرسىن دەپ تىلەيمىن!
- جىل سايىن اسسامبلەياعا قىرۋار قارجى بولىنەدى. كوپشىلىك ول قارجى نەگىزسىز جۇمسالادى دەگەن ويدا. شىندىعىندا وبلىستىق اسسامبلەيا قارجىسى قايدا جانە قالاي جۇمسالادى؟ دوستىق ۇيىندە بيىلعى جىلى اتقارىلعان شارالارعا قانشا قاراجات ءبولىندى جانە ول قالاي يگەرىلدى؟
- 2021 جىلدىڭ اعىمداعى كەزەڭىنە جوسپارلانعان ءىس-شارالارعا 50 500 000 تەڭگە 25 جوباعا بولىنگەن. ونىڭ ىشىندە: 76% نەمەسە 19 جوبا جۇزەگە اسىرىلدى (31 300 000 ت.گ), 6 جوبا (16 250 000 تگ.) جۇزەگە اسىرىلۋدا. وبلىس بويىنشا 2021 جىلى قازاقستان حالقى اسسامبلەياسى 1,5 مىڭعا جۋىق ءىس-شارا وتكىزدى، ونىڭ ءبىر مىڭى ونلاين فورماتتا ءوتىپ، 100 مىڭنان استام ادام قامتىلدى.
3 توقسان ىشىندە قاراعاندى قالاسىنىڭ دوستىق ۇيىندە 10 مىڭنان استام ادامدى قامتىعان 150 ءىس-شارا وتكىزىلدى. ءىس-شارالاردىڭ نەگىزگى ماقساتى – قوعامدىق كەلىسىم مەن ۇلتتىق بىرلىكتى قامتاماسىز ەتۋگە باعىتتالعان. ماسەلەن، جىل ىشىندە كەلەسى باعىتتار بويىنشا ءىس-شارالار ۇيىمداستىرىلدى: قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا، «رۋحاني جاڭعىرۋ» باعدارلاماسىن جۇزەگە اسىرۋ، مەملەكەت باسشىسىنىڭ قازاقستان حالقىنا جولداۋىن جۇزەگە اسىرۋ ماقساتىندا، مەملەكەتتىك جاستار ساياساتىن جۇزەگە اسىرۋ، «قازاقتانۋ» جوباسىن جۇزەگە اسىرۋ، «قوعامدىق بىرەگەيلىكتى قالىپتاستىرۋ» رەسپۋبليكالىق جوباسىن جۇزەگە اسىرۋ، «وتباسى – جەكە تۇلعانىڭ رۋحاني-قۇندىلىقتار تاربيەسىنىڭ نەگىزى» سەمينار-ترەنينگتەرى، «Social trust» الەۋمەتتىك سالا كاسىپكەرلىك مەكتەبى، «تاريحتان تاعىلىم – وتكەنگە تاعزىم» ايماقتىق جوباسى، «جاڭعىرۋ جولى» جانە ت.ب.
- ءوزىڭىزدى مەتسەنات رەتىندە جاقسى تانيمىز. وسى تۇستا قاراعاندى وبلىسى قحا قوعامدىق كەلىسىم كەڭەسى تاراپىنان ۇيىمداستىرىلعان قايىرىمدىلىق شارالارعا توقتالىپ وتسەڭىز، ناتيجەسى قالاي؟
- وبلىستىق اسسامبلەيا ايماقتاعى الەۋمەتتىك كومەككە ءزارۋ تۇرعىنداردىڭ جاعدايىنان ۇنەمى حاباردار بولىپ، كەز كەلگەن ۋاقىتتا قول ۇشىن بەرۋگە دايار. قحا جانىنىن قۇرىلعان قايىرىمگەرلەر مەن مەتسەناتتار كلۋبىنا بيزنەستە جۇرگەن ازاماتتار كىرەدى. ەتنومادەني بىرلەستىكتەردىڭ كوپتەگەن وكىلدەرى قايىرىمدى ىستەرىن جاريالاماي، ەشكىمگە دابىرا قىلماي جاساعاندى قۇپ كورەدى. اتىمتاي جومارت ازاماتتاردىڭ اتسالىسىپ، دەمەۋشىلىك كورسەتۋىمەن بىرقاتار اۋىلداردا مادەني-الەۋمەتتىك نىساندار جاڭارتىلىپ، الەۋمەتتىك تۇرعىدان از قامتىلعان وتباسىلارعا قوماقتى قولداۋ كورسەتىلدى. «مەكتەپكە جول»، «مەيىرىم شۋاعى»، «قايىرىمدىلىق كەرۋەنى» سىندى جالپىحالىقتىق اكتسيالار بارىسىندا دا قاراعاندىلىق مەتسەناتتار كوش باستاپ ءجۇر. ولاردىڭ قاتارىندا جەكە كاسىپكەر نۇرلان قالتاەۆ، «ASYL ADAM» قايىرىمدىلىق قورىنىڭ نەگىزىن قالاۋشى كوڭىلباي شوكەنوۆ، جەكەلەگەن ۆايناح، دجوردجيا، كارىس، وزبەك، ءازىربايجان، تۇرىك، تاجىك، تاتار-باشقۇرت ەتنومادەني بىرلەستىكتەرىنىڭ وكىلدەرىن قۇرمەتپەن اتار ەدىم. مىسالى گيۋلاگا رزاەۆ مايقۇدىقتاعى دامۋى تەجەلگەن بالالار ينتەرناتىن شەفتىككە الىپ، اي سايىن سىرت كيىم، كەڭسە قۇرالدارى، تاتتىلەردى ءۇيىپ اپارادى. ارىس، ماقتاارال وقيعالارىندا، پاندەميا كەزىندە قىرۋار كومەك كورسەتىلدى.
جەكە كاسىپكەر رەتىندە مەنىڭ ءوزىم دە جەزقازعان-ۇلىتاۋ وڭىرىندە ءبىرشاما قايىرىمدىلىق اكتسيالارىن وتكىزىپ، ساۋاپتى شارالارعا ۇيىتقى بولىپ ءجۇرمىن. ماسەلەن، ءوزىم قۇرىلتايشى بولىپ وتىرعان مەكەمەنىڭ جاس ماماندارىن تەگىن باسپانامەن قامتاماسىز ەتىپ، از قامتىلعان وتباسىلاردىڭ بالالارىنا قايراتكەر تۇلعالار اتىنداعى شاكىرتاقىلارمەن ىنتالاندىرىپ، ءتىپتى، ۇلگەرىمى جاقسى ستۋدەنتتەردىڭ جىلدىق وقۋ اقىسىن 100 پايىز تولەپ بەردىك. وتكەن جىلى سەمەي پوليتەحنيكالىق كوللەدجىنىڭ مەرەيتويىنا وراي اتالعان كوللەدجگە ءىت سىنىبىن جابدىقتاپ بەردىم. جەزقازعان قالاسىندا مۇمكىندىگى شەكتەۋلى سەرىك اقبوكەندى تۇراقتى جۇمىسقا قابىلداپ، لايىقتى ايلىق جالاقى تاعايىندالدى.
تاعى دا جەزقازعان قالاسىنداعى №9, 13 مەكتەپتەرگە ويىن الاڭدارىن سىيعا تارتتىم. كوپتەگەن جەرگىلىكتى قالامگەرلەردىڭ كىتاپتارىنىڭ جارىق كورۋىنە تۇراقتى تۇردە دەمەۋشىلىك جاساپ، ونەر-مادەنيەت قايراتكەرلەرىنە ارنايى ستيپەنديالار ۇلەستىرىپ ءجۇرمىن. ءوزىمنىڭ جەكە يەلىگىمدەگى كوللەدج جاتاقحاناسىندا از قامتىلعان وتباسىلاردىڭ بالالارى تەگىن تۇرىپ جاتىر. رەسپۋبليكالىق «مىڭ بالا» جوباسىنىڭ ۇلىتاۋ وڭىرىنە ساپارىن تولىق قارجىلاندىردىم. تىزبەلەي بەرسەم، كەۋدە سوعىپ ماقتانىپ كەتكەندەي بولارمىن. مۇنىڭ بارلىعى – مەنىڭ ارزان ابىروي ءۇشىن ەمەس، ەلىمىزدىڭ گۇلدەنۋىنە ۇلەسىمدى قوسىپ، قازاقستان ازاماتتارىنىڭ تەڭ دارەجەدە ءومىر سۇرۋىنە ىقپال ەتسەم دەگەن پەرزەنتتىك پەيىلمەن جاساپ جۇرگەن تەڭىزگە تامعان تامشىداي عانا ەڭبەگىم.
قازاقستان حالقى اسسامبلەياسى تۋرالى تەرىس پىكىر، جاڭساق وي قالىپتاسپاسا ەكەن. وسى جازبانى جاريالاۋداعى باستى ماقساتىم دا – وسى. اتقارعان ءىسىمىزدى كوپشىلىكپەن ءبولىسىپ، قحا توڭىرەگىندە جاسالىپ جاتقان يگى ىستەردى حالىق تانىسا ەكەن، كوڭىلگە تۇيسە ەكەن دەگەن نيەت بىزدىكى. ەلدەگى ساياسي تۇراقتىلىق پەن كەمەل كەلىسىمنىڭ كەپىلى بولىپ وتىرعان مارتەبەلى ورگاننىڭ بەت-بەدەلى الاسارماسا ەكەن!
...كورشىلەر كوشىنە كوز تىگىپ كورىڭىز. كەمسىتكەنىمىز ەمەس، تولقۋلار مەن تەراكتىدەن كوز اشپاي وتىر. «كارى قۇرلىقتى» قارجى داعدارىسى جايلاپ، كوپ ەلدەردە ساياسي توقىراۋ بەلەڭ الىپ جاتىر. ال، ءبىز شە؟ قازاقى ماتەلمەن مانەرلەسەك، «بوزدا ويناپ» ءجۇرمىز. بۇل – بىرلىگى بەكەم ەلدە عانا سالتانات قۇراتىن قۇبىلىس. بىز – بولاشاعى ءبىرتۇتاس ەلدەنبىز! ورتاق ءۇيىمىز – قازاقستان! مۇنىڭ بارلىعى – جالاڭ ۇران ەمەس، ءاربىر قازاقستاندىقتىڭ جۇرەگىنە ۇيالاعان ماقتانىش!
– Cۇحباتىڭىزعا راقمەت. حالىقتىڭ سەنىمىن ارقالاپ جۇرگەن ەڭبەگىڭىز تابىستى بولسىن!
سۇحباتتاسقان: زارينا اشىربەك،
«ادىرنا» ۇلتتىق پورتالى
