قاراعاندى وبلىسىندا سوڭعى ءۇش جىلدا ينۆاتاكسي كولىكتەرىنىڭ سانى ءۇش ەسەگە ارتتى. بۇگىندە ولاردىڭ سانى 118-گە جەتتى. مۇگەدەكتىگى بار ادامدار بۇل قىزمەتتى بارلىق قالالار مەن اۋدانداردا پايدالانادى.
«ينۆاتاكسي قىزمەتىمەن قامتۋ جىل سايىن وسۋدە. ەگەر 2021 جىلى قىزمەت وبلىستىڭ سەگىز ايماعىندا جۇمىس ىستەسە جانە 35 ماشينا بولسا، ءۇش جىل ىشىندە تاعى بەس ايماق قوسىلىپ، 118 كولىك بولدى. قازىر قىزمەت بۇكىل وبلىس بويىنشا قولجەتىمدى»، – دەپ حابارلادى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىندا.
سونىمەن قاتار، ينۆاتاكسيدى پايدالانۋعا قۇقىلى ادامدار ءتىزىمى دە كوبەيدى. باستاپقىدا بۇل قىزمەت تىرەك-قيمىل اپپاراتى، كورۋ قابىلەتى بۇزىلعان ادامدارعا عانا ارنالعان ەدى. وتكەن جىلدان باستاپ ولاردىڭ قاتارىنا پسيحيكالىق اۋىتقۋلارى بار بالالار قوسىلدى.
– مەنىڭ ۇلىم ءتورت جاستا، وعان دتسپ دياگنوزى قويىلعان. استانا قالاسىنان قاراعاندىعا ءجيى ماماندار مەن جاتتىقتىرۋشىلار كەلەدى. ءبىز اباي قالاسىندا تۇراتىندىقتان، ولاردىڭ قابىلداۋىنا بارۋ قيىن بولاتىن، ويتكەنى ەكى اپتا قاتارىنان ەم الۋ ءۇشىن بارۋ كەرەك ەدى. اۆتوبۋسپەن ەرەكشە بالامەن ءجۇرۋ قيىن، ال تاكسي قىمبات. جاقىندا ءبىزدىڭ قالادا ينۆاتاكسي قىزمەتى جۇمىس ىستەي باستادى. بۇل وتە ىڭعايلى بولدى: جۇرگىزۋشىلەر سىپايى، اپارادى، كۇتەدى جانە قايتا الىپ كەتەدى. وسىنداي قولداۋ كورسەتكەنى ءۇشىن مەملەكەتىمىزگە العىس ايتامىن، – دەپ ءبولىستى اباي قالاسىنىڭ تۇرعىنى ءمولدىر.
– بۇل مۇگەدەك ادامداردىڭ ءومىرىن جەڭىلدەتەتىن كەرەمەت جوبا. ينۆاتاكسي وتە ىڭعايلى: ءسىزدى كىرەبەرىستەن الىپ، قاجەتتى جەرگە جەتكىزەدى. مەن بۇل قىزمەتتى ۇنەمى قولدانامىن. ەگەر بۇل ءبىر كەزدەرى تاڭسىق بولسا، قازىر ول ابدەن ۇيرەنشىكتى جاعدايعا اينالدى. ەشقانداي پروبلەما جوق، ماشينالار جەتكىلىكتى، – دەيدى Qamqor plus مۇگەدەكتەر قوعامدىق بىرلەستىگىنىڭ توراعاسى، قاراعاندىداعى تen Qogam مۇگەدەكتىگى بار ادامداردى الەۋمەتتىك بەيىمدەۋ ورتالىعىنىڭ باسشىسى نياز سۇندەتاليەۆ. – جاقىندا پايدالانۋشىلار ءتىزىمى كەڭەيتىلۋى مۇمكىن. وبلىس اكىمى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا 18 جاستان اسقان اقىل-ەسى كەم ادامدارعا دا بۇل قىزمەتتى تەگىن كورسەتۋ ماسەلەسىن قاراۋدى تاپسىردى.
ءوتىنىش بەرۋ ءۇشىن ارنايى چات بار. ءوتڭنىم جوسپارلانعان ساپاردان ءبىر كۇن بۇرىن بەرىلەدى. ديسپەتچەرمەن ۋاقىت كەلىسىلەدى.
قىزمەت اشىق جانە جاريالى يۋولۋى ءۇشىن قاراعاندىدا ONAY! جۇيەسى ەنگىزىلدى. ينۆاتاكسيدە ۆاليداتورلار ورناتىلعان، ولار ءار ساپاردى تىركەيدى.
