بەلگىلى كومپوزيتور تولەگەن مۇحامەدجانوۆ جۋرناليست نارتاي ارالبايۇلىنا بەرگەن سۇحباتىندا الماتى قالاسىنىڭ اتاۋىنا قاتىستى پىكىر ءبىلدىردى، دەپ حابارلايدى "ادىرنا" ءتىلشىسى.
سۇحبات بارىسىندا قوعامنىڭ ايشىقتى ماسەلەلەرى جانە ساياسات جايىندا ءسوز قوزعالىپ، ءتۇرلى پىكىرلەر ايتىلدى. نارتاي ارالبايۇلى مۇحامەدجانوۆتان ولجاس سۇلەيمەنوۆتىڭ الماتى قالاسىنىڭ اتاۋىن "الما-اتا" دەپ وزگەرتۋگە قاتىستى بىلدىرگەن پىكىرىنە دەگەن كوزقاراسىن سۇرادى. وعان تولەگەن مۇحامەدجانۇلى:
"ونىڭ ەشقانداي ارتىقشىلىعى جوق. ويتكەنى ءبىز موسكۆانى "ماسكەۋ" دەپ ايتامىز عوي قازاقتار. قازاقتىڭ ترانسكريپتسياسىندا پەكيندى "بەيجىڭ" دەپ، ستامبۋلدى "ىستامبۇل" دەپ تە اتايمىز. ورىس ترانسكريپتسياسى بولۋى مۇمكىن "الما-اتا" دەگەن. ال قازاقشاسى - الماتى. اۋىستىرۋدىڭ قاجەتى جوق، بىراق ورىس ترانسكريپتسياسىندا "الما-اتا" دەلىنگەنى دە دۇرىس سياقتى. "الما-اتا" دەگەن اتاۋ وتە جاعىمدى، جاقسى ەستىلەدى. بۇل ارادا ۇلكەن ايقاي-شۋ جاساپ، ولجاستىڭ ايتقانىن دا جوققا شىعارۋعا بولمايدى. ورىس ترانسكريپتسياسى بولۋى مۇمكىن، ورىستار ايتا بەرسىن، باسقا ۇلت وكىلدەرى ايتا بەرسىن" دەپ جاۋاپ بەردى.
تولىعىراق ۆيدەودا:
