كەشەدەن بەرى مەن، ءبىزدىڭ وتباسىمىز توڭىرەگىندە ءبارى بەينە ءبىر الدەكىمنىڭ امىرىمەن ءجۇرىپ جاتقانداي، ابدىراعان جانە ەركىمنەن ايىرىلعان سەزىمدە ءجۇرمىن. ماعان كەنەت الماتىداعى جەكە كلينيكانىڭ اكەم جاتقان پالاتاسىندا ونىمەن بىرنەشە مينۋت جۇزدەسۋ مۇمكىندىگىن بەردى، جانە بۇل جولى ەشكىم مەنەن اتابەكتىڭ قىزىسىڭ با، جوق پا دەگەن قۇجات تالاپ ەتپەدى.
ءبارى نەگىزگى ارەكەتتەر پەردە سىرتىندا ءجۇرىپ، ال ولار جونىندە ەنتىگىپ جەتكەن قۋعىنشى حابارلايتىن ەجەلگى گرەك پەساسىنداعىداي. كەشە تۇسكە سالىم بىزگە جۋرناليست قانات تىلەۋحان قوڭىراۋلاتتى: «ارون اتابەك تابىلدى! پالەنشە كلينيكادا جاتىر، كوۆيدتەن جازىلعان، الىپ كەتۋلەرىڭىزگە بولادى». باتىردىڭ جاتقان جەرى ءبىز ءۇشىن جاڭالىق ەمەس ەدى; تاڭداندىرعانى، ونى بىزگە ءويستىپ وپ-وڭاي، تەوريا جۇزىندە، بەرە سالاتىندىعى بولدى. ايتپەسە، 1-ءشى قازاندا ونى تۇرمەدەن بوساتقالى بەرى ءبىزدىڭ اپاشكامىز رازيا نۋتۋشەۆا ءوز ءۇيىن الىنباس قامالعا اينالدىرىپ، مەنىڭ اكەمە جولىعۋ مۇمكىندىگىن شەكتەپ قويىپ ەدى عوي. ودان كەيىن ارون جەكە كلينيكادان ءبىر-اق شىقتى، الايدا وندا دا ءبىزدى، اروننىڭ ايەلى مەن بالالارىن، كىرگىزبەدى. ءبىزدىڭ بۇگەلى-شىگەلى سۇراقتارىمىزعا قانات تىلەۋحان وزىنە اكەمىزدىڭ «ساۋىققانى جانە ونى ۇيگە اكەتۋگە بولاتىنى» جونىندە قوعام قايراتكەرى مۇحتار تايجان حابارلاپ، ال بۇعان پارلامەنت دەپۋتاتى يرينا سميرنوۆا ايتقان دەپ جاۋاپ بەردى. جانە ايتقانى، «ءاۋ باستان اروندى ءوز قامقورلىعىنا دا الىپ، جەكە كلينيكاعا دا جاتقىزعان»، جالپى، سميرنوۆا ەكەن. ال مۇحتار تايجان قانات تىلەۋحانعا «اروندى ۇيگە اكەتۋىمىزگە بولاتىنىن» حابارلاۋدى تاپسىرعان. بىزگە كلينيكانىڭ باس جەتەكشىسىنىڭ ۇيالى تەلەفون ءنومىرىن دە بەردى.
نەسى بار، «جارىلقاۋشىلار» قاتارى كوبەيدى دەپ «قۋانعان» ءبىز كلينيكاعا جەدەل شاۋىپ باردىق. كوۆيدتى جەڭگەنى جاقسى، بىراق اروننىڭ تاعى ەكى-ءۇش وتە اۋىر دياگنوزى بار عوي، شىنىمەن-اق سونىڭ بارىنەن ساۋىقتىرعانى ما؟ شىنىمەن-اق ارون ەندى ونى پوليتسيا تۇرمەدەن اپارعان ءوز قارىنداسىنىڭ ۇيىندەگى ۇيقاماق رەجيمىنەن ازات بولا ما؟ وندا، رازيا اپاشكانىڭ ۇيىندە، ونى قورشاپ العان قايداعى ءبىر تۇسىنىكسىز جات ادامدار اروننىڭ اتىنان كۇدىكتى ساياسي مالىمدەمەلەر جاساپ، ونىڭ دەنساۋلىعى جونىندە شەكتەۋلى جانە جالعان اقپارات تاراتىپ جاتىر عوي. ول ۇيدە ماعان، اروننىڭ تۋعان قىزىنا، ونى تەك ەكى رەت قانا كورۋگە رۇقسات بەردى عوي. مەن اكەمنىڭ وتىنىشىمەن فەيسبۋكتە ونىڭ قازىر اتاقتى بەينەگە اينالعان «بۋحەنۆالدتىق فوتوسىن» ورنالاستىردىم. سوعان وراي رەجيم «اق دامبالدى ەركەكتىڭ فوتوسى بەيەستەتيكالىق» ەكەندىگى تۋرالى ايقاي شىعارعان ءوزىنىڭ «ەڭ جاقسى» سەكسوتتارىنىڭ بەتىن اشىپ الدى. كەيبىر ەكىجۇزدى «قايراتكەرلەر» «اروندى وتباسىنداعى ۇرىس-كەرىس قيناپ، تۋىسقاندارى اراسىندا ءتۇرلى كيكىلجىڭ ءجۇرىپ جاتقانداي» اسەر قالدىرۋعا تىراشتاندى. مۇنىڭ ءبارى كەڭەس وداعىندا بولعان، قۋدالاۋدىڭ مۇنداي تەحنولوگياسى تۋرالى مەن وقىعام. ال، قانداي قوعام قايراتكەرلەرىنىڭ وسى كۇز كۇندەرى قانداي ساتقىندىق جاساعانىن ۋاقىتى كەلگەندە ايتىپ بەرەمىز.
«شىنىمەن-اق ەندى اروندى ءوز ۇيىمىزگە، ونىڭ وتباسىنا الىپ كەتەمىز بە؟» – دەپ ويلادىم مەن، ارونعا جاقىن ادامدار ورتاسىندا تاكسيمەن جۇيتكىپ بارا جاتىپ. كلينيكانىڭ كىرەبەرىسىندە ءوزىمىزدى تانىستىردىق، دەرەۋ ءبىزدى ونىڭ جەتەكشىسى قارسى الدى. ءسال العا وزىپ، ول كلينيكانىڭ اتاۋىن مەن ءالى دە ايتا المايتىنىمدى ەسكەرتەم. بۇل جولى دارىگىرلەردىڭ ءوز وتىنىشىمەن. اكەمنىڭ ءومىرى سولاردىڭ قولىندا، دەمەك، مەن ولاردىڭ گيپپوكرات انتىنا ادالدىعىنا كامىل ءۇمىت ارتامىن. ىلگەرىدەگى پوستىمدا ايتقانىمداي، بۇعان دەيىن، 22 قازاندا، كلينيكا جەتەكشىسى اتابەكتىڭ «جەكە وتەنىشىنە» سىلتەپ، ونىڭ جاعدايى تۋرالى قانداي دا بولسىن اقپارات بەرۋدەن ءۇزىلدى-كەسىلدى باس تارتتى. سونداي-اق، ول جولى مەنىڭ تۋ تۋرالى كۋالىگىمدە اكە رەتىندە «ارون ايدارحان» كورسەتىلىپ، ال ولاردىڭ قولىندا «ارون ەدىگەەۆ» ەكەنىن كولدەنەڭ تارتقان بولاتىن. ديسسيدەنتتىڭ ءومىرى شىم-شىتىرىق جانە قاۋىپتى وقيعالارعا تولى، سوندىقتان اتى-ءجونىن وزگەرتۋمەن قاتار ءتىپتى كەيبىر دوستارى مەن تۋىستارى ساتىپ كەتىپ، تەك ونىڭ ليبەرالدىق سەنىمى عانا وزگەرىسسىز قالادى. ايتقانداي، وتكەن جولى مەنەن فاميليامدى وزگەرتكەنىم تۋرالى قۇجات تالاپ ەتتى، ال ونداي قۇجات تەك سوت شەشىمى نەگىزىندە عانا بەرىلەتىندىكتەن، قازىر مەن اروننىڭ وزىمە اكەلىگىن راستاۋ ءۇشىن سوتقا جۇگىندىم. فورمالدى پروتسەدۋرا، بىراق ودان ءوتۋ قاجەت.
كەشەگى كۇن مەن ءۇشىن ءتۇس كورگەندەي كۇيدە ءوتتى. بۇل جولى مەن ءۇشىن كۇتەگەن جاعداي – كلينيكادا مەنەن ەشقانداي قۇجات سۇرامادى. مەنى ءبىر بولمەدە جالعىز قالدىرىپ، بىرگە كەلگەن ادامداردى قوياردا-قويماي شىعارىپ جىبەردى. كلينيكا جەتەكشىسى اكەمنىڭ جاعدايى جونىندە قىسقاشا ايتتى دا، ماعان ستەريلدەنگەن كيىم كيگىزىپ، بىردەن مەنىڭ بۇ دۇنيەدەگى ەڭ قىمبات ادامىم جاتقان پالاتاعا اپاردى.
اكەم كەرەۋەتتە سۇلىق جاتىر ەكەن. تاماعىنا، ەرلەردىڭ جۇتقىنشاعى تۇراتىن جەرگە، الدەبىر تۇتىك تىعىپ قويعان. سول ارقىلى دەمالادى، سول ارقىلى، دەمەك، سۇيىق تاماق ىشكىزەدى. تازا، جارىق پالاتا، باتىس كينولارىنداعىداي زاماناۋي جابدىقتار. تەك اكەمنىڭ تەرىمەن قاپتالعان جارتىلاي ءتىرى قاڭقاسى مەن بۋرىل ساقال-مۇرت قىلتاندى بەينەسى جۇرەگىمە ايازداي ءتيدى! اكەم مەنى جىلدام تانىدى. جارتىلاي سۇستى، جارتىلاي كۋاقى كوزدەرى جارق ەتە قالدى. سودان ءوزىمنىڭ بۇرىنعى اكەمدى تانىدىم. 2006 جىلدىڭ ىستىق شىلدەسىندە كەرەك بولار دەپ الىپ كەتكەن زاتتارىمەن ءبىزدىڭ لاشىعىمىزدان «شاڭىراق ءىسى» بويىنشا تەرگەۋگە كەتىپ، قايتىپ ورالماعان اكەمدى. سودان، مىنە، 15 جىل ءوتىپتى!
پاپاما كوپ نارسەنى ايتىپ ۇلگەردىم. كوپ نارسەنى – ۇلگەرمەدىم. ول بىرەسە مەنىمەن كەلىسكەن رايدا باسىن شۇلعىپ، بىرەسە، الدەنە ۇناماعاندا، كوزى تۇنجىراپ جاتتى. ارون سويلەي المايدى. تاماعىندا تۇتىك شوشايىپ تۇر. ونىڭ نە ايتقىسى كەلگەنىن ماعان ءالى الداعى ۋاقىتتا ەستۋگە تۋرا كەلەدى. ونىڭ قولدارىن قيمىلداتۋ، ءوز اياعىمەن ءجۇرۋ، ءوز بەتىمەن وتىرۋ جانە ءوزىن كۇتۋ قابىلەتتەرى قايتىپ ورالسا ەكەن! قازىر مەنىڭ بۇكىل ويلارىم وسى جونىندە. ارون ءوزىنىڭ كومادا بولعان-بولماعانىن، ونىڭ قانشالىقتى ۇزاققا سوزىلعانىن بىلمەيدى. مەنىڭ تۇسپالداپ بەرگەن سۇراقتارىما تەك بىرنەشە رەت ەسىنەن تانعانىن بىلەتىنىن بايقاتتى. سونداي-اق، مەن ءوزىمنىڭ رەسمي انىقتاما الۋ ءۇشىن سوتقا جۇگىنگەنىمدى ايتتىم. ول مۇنى قۇپتادى.
دارىگەرلەر ماعان كوۆيدتى جەڭۋدىڭ ءساتى تۇسكەنىن ايتتى. بىراق ءىشىنارا بولسا دا ساۋىعىپ كەتۋىنە بۇرىلىس ءازىر جوق. باسقا دا وتكىر سىرقاتتار بويىنشا كۇردەلى پروتسەدۋرالار كۇتىپ تۇر. ءبارى بولۋى مۇمكىن، تالاي نارسە ايقىندالىپ، اشىلۋى كادىك. كەشەدەن بەرى وزىمە ورىن تابا الماي، ءتۇن ۇيقتامادىم، بىراق كۇشىمدى جيناپ، سىزدەرگە اكەم تۋرالى وسى جاڭالىقتى حابارلاپ وتىرمىن.
ايدانا ايدارحان،
"ادىرنا" ۇلتتىق پورتالى
