Aron Atabektiń qyzy: Aqyry maǵan ákemdi kórýge múmkindik berdi!

11191
Adyrna.kz Telegram

Kesheden beri men, bizdiń otbasymyz tóńireginde bári beıne bir áldekimniń ámirimen júrip jatqandaı, abdyraǵan jáne erkimnen aıyrylǵan sezimde júrmin. Maǵan kenet Almatydaǵy jeke klınıkanyń ákem jatqan palatasynda onymen birneshe mınýt júzdesý múmkindigin berdi, jáne bul joly eshkim menen Atabektiń qyzysyń ba, joq pa degen qujat talap etpedi.

Bári negizgi áreketter perde syrtynda júrip, al olar jóninde entigip jetken qýǵynshy habarlaıtyn ejelgi grek pesasyndaǵydaı. Keshe túske salym bizge jýrnalıst Qanat Tileýhan qońyraýlatty: «Aron Atabek tabyldy! Pálenshe klınıkada jatyr, kovıdten jazylǵan, alyp ketýlerińizge bolady». Batyrdyń jatqan jeri biz úshin jańalyq emes edi; tańdandyrǵany, ony bizge óıstip op-ońaı, teorııa júzinde, bere salatyndyǵy boldy. Áıtpese, 1-shi qazanda ony túrmeden bosatqaly beri bizdiń apashkamyz Razııa Nýtýsheva óz úıin alynbas qamalǵa aınaldyryp, meniń ákeme jolyǵý múmkindigin shektep qoıyp edi ǵoı. Odan keıin Aron jeke klınıkadan bir-aq shyqty, alaıda onda da bizdi, Aronnyń áıeli men balalaryn, kirgizbedi. Bizdiń búgeli-shigeli suraqtarymyzǵa Qanat Tileýhan ózine ákemizdiń «saýyqqany jáne ony úıge áketýge bolatyny» jóninde qoǵam qaıratkeri Muhtar Taıjan habarlap, al buǵan parlament depýtaty Irına Smırnova aıtqan dep jaýap berdi. Jáne aıtqany, «áý bastan Arondy óz qamqorlyǵyna da alyp, jeke klınıkaǵa da jatqyzǵan», jalpy, Smırnova eken. Al Muhtar Taıjan Qanat Tileýhanǵa «Arondy úıge áketýimizge bolatynyn» habarlaýdy tapsyrǵan. Bizge klınıkanyń bas jetekshisiniń uıaly telefon nómirin de berdi.

Nesi bar, «jarylqaýshylar» qatary kóbeıdi dep «qýanǵan» biz klınıkaǵa jedel shaýyp bardyq. Kovıdti jeńgeni jaqsy, biraq Aronnyń taǵy eki-úsh óte aýyr dıagnozy bar ǵoı, shynymen-aq sonyń bárinen saýyqtyrǵany ma? Shynymen-aq Aron endi ony polıııa túrmeden aparǵan óz qaryndasynyń úıindegi úıqamaq rejıminen azat bola ma? Onda, Razııa apashkanyń úıinde, ony qorshap alǵan qaıdaǵy bir túsiniksiz jat adamdar Aronnyń atynan kúdikti saıası málimdemeler jasap, onyń densaýlyǵy jóninde shekteýli jáne jalǵan aqparat taratyp jatyr ǵoı. Ol úıde maǵan, Aronnyń týǵan qyzyna, ony tek eki ret qana kórýge ruqsat berdi ǵoı. Men ákemniń ótinishimen Feısbýkte onyń qazir ataqty beınege aınalǵan «Býhenvaldtyq fotosyn» ornalastyrdym. Soǵan oraı rejım «aq dambaldy erkektiń fotosy beıestetıkalyq» ekendigi týraly aıqaı shyǵarǵan óziniń «eń jaqsy» seksottarynyń betin ashyp aldy. Keıbir ekijúzdi «qaıratkerler» «Arondy otbasyndaǵy urys-keris qınap, týysqandary arasynda túrli kıkiljiń júrip jatqandaı» áser qaldyrýǵa tyrashtandy. Munyń bári Keńes Odaǵynda bolǵan, qýdalaýdyń mundaı tehnologııasy týraly men oqyǵam. Al, qandaı qoǵam qaıratkerleriniń osy kúz kúnderi qandaı satqyndyq jasaǵanyn ýaqyty kelgende aıtyp beremiz.

«Shynymen-aq endi Arondy óz úıimizge, onyń otbasyna alyp ketemiz be?» – dep oıladym men, Aronǵa jaqyn adamdar ortasynda taksımen júıtkip bara jatyp. Klınıkanyń kireberisinde ózimizdi tanystyrdyq, dereý bizdi onyń jetekshisi qarsy aldy. Sál alǵa ozyp, ol klınıkanyń ataýyn men áli de aıta almaıtynymdy eskertem. Bul joly dárigirlerdiń óz ótinishimen. Ákemniń ómiri solardyń qolynda, demek, men olardyń Gıppokrat antyna adaldyǵyna kámil úmit artamyn. Ilgeridegi postymda aıtqanymdaı, buǵan deıin, 22 qazanda, klınıka jetekshisi Atabektiń «jeke ótenishine» siltep, onyń jaǵdaıy týraly qandaı da bolsyn aqparat berýden úzildi-kesildi bas tartty. Sondaı-aq, ol joly meniń týý týraly kýáligimde áke retinde «Aron Aıdarhan» kórsetilip, al olardyń qolynda «Aron Edigeev» ekenin kóldeneń tartqan bolatyn. Dıssıdenttiń ómiri shym-shytyryq jáne qaýipti oqıǵalarǵa toly, sondyqtan aty-jónin ózgertýmen qatar tipti keıbir dostary men týystary satyp ketip, tek onyń lıberaldyq senimi ǵana ózgerissiz qalady. Aıtqandaı, ótken joly menen famılııamdy ózgertkenim týraly qujat talap etti, al ondaı qujat tek sot sheshimi negizinde ǵana beriletindikten, qazir men Aronnyń ózime ákeligin rastaý úshin sotqa júgindim. Formaldy proedýra, biraq odan ótý qajet.

Keshegi kún men úshin tús kórgendeı kúıde ótti. Bul joly men úshin kútegen jaǵdaı – klınıkada menen eshqandaı qujat suramady. Meni bir bólmede jalǵyz qaldyryp, birge kelgen adamdardy qoıarda-qoımaı shyǵaryp jiberdi. Klınıka jetekshisi ákemniń jaǵdaıy jóninde qysqasha aıtty da, maǵan sterıldengen kıim kıgizip, birden meniń bu dúnıedegi eń qymbat adamym jatqan palataǵa apardy.

Ákem kereýette sulyq jatyr eken. Tamaǵyna, erlerdiń jutqynshaǵy turatyn jerge, áldebir tútik tyǵyp qoıǵan. Sol arqyly demalady, sol arqyly, demek, suıyq tamaq ishkizedi. Taza, jaryq palata, batys kınolaryndaǵydaı zamanaýı jabdyqtar. Tek ákemniń terimen qaptalǵan jartylaı tiri qańqasy men býryl saqal-murt qyltandy beınesi júregime aıazdaı tıdi! Ákem meni jyldam tanydy. Jartylaı susty, jartylaı kýaqy kózderi jarq ete qaldy. Sodan ózimniń burynǵy ákemdi tanydym. 2006 jyldyń ystyq shildesinde kerek bolar dep alyp ketken zattarymen bizdiń lashyǵymyzdan «Shańyraq isi» boıynsha tergeýge ketip, qaıtyp oralmaǵan ákemdi. Sodan, mine, 15 jyl ótipti!

Papama kóp nárseni aıtyp úlgerdim. Kóp nárseni – úlgermedim. Ol birese menimen kelisken raıda basyn shulǵyp, birese, áldene unamaǵanda, kózi tunjyrap jatty. Aron sóıleı almaıdy. Tamaǵynda tútik shoshaıyp tur. Onyń ne aıtqysy kelgenin maǵan áli aldaǵy ýaqytta estýge týra keledi. Onyń qoldaryn qımyldatý, óz aıaǵymen júrý, óz betimen otyrý jáne ózin kútý qabiletteri qaıtyp oralsa eken! Qazir meniń búkil oılarym osy jóninde. Aron óziniń komada bolǵan-bolmaǵanyn, onyń qanshalyqty uzaqqa sozylǵanyn bilmeıdi. Meniń tuspaldap bergen suraqtaryma tek birneshe ret esinen tanǵanyn biletinin baıqatty. Sondaı-aq, men ózimniń resmı anyqtama alý úshin sotqa júgingenimdi aıttym. Ol muny quptady.

Dárigerler maǵan kovıdti jeńýdiń sáti túskenin aıtty. Biraq ishinara bolsa da saýyǵyp ketýine burylys ázir joq. Basqa da ótkir syrqattar boıynsha kúrdeli proedýralar kútip tur. Bári bolýy múmkin, talaı nárse aıqyndalyp, ashylýy kádik. Kesheden beri ózime oryn taba almaı, tún uıqtamadym, biraq kúshimdi jınap, sizderge ákem týraly osy jańalyqty habarlap otyrmyn.

Aıdana AIDARHAN,

"Adyrna" ulttyq portaly

Pikirler