سوڭعى كەزدەرى شىمكەنت قالاسىندا دەنساۋلىق ساقتاۋ سالاسى بويىنشا ۇلكەن وزگەرىستەر ورىن الدى. اتاپ ايتساق، بۇيرەك الماستىرۋ، باۋىر اۋىستىرۋ سياقتى كۇردەلى وتا تۇرلەرى جاسالا باستادى. بىرنەشە جاڭا عيماراتتار بوي كوتەردى. جەدەل-جاردەم قىزمەتىنىڭ ساپاسى دا ارتقان. مىقتى-مىقتى ماماندار ارنايى شاقىرتۋمەن تارتىلا باستادى. مۇنىڭ ءبارى دە ءولىم-ءجىتىمنىڭ ازايۋىنا سەپتىگى ءتيىپ وتىر.
بۇل تۋرالى بىزگە شىمكەنت قالاسى دەنساۋلىق ساقتاۋ باسقارماسىنىڭ باسشىسى باقىتجان پازىلوۆ اڭگىمەلەپ بەردى.
سۇحبات بارىسىندا بۇگىنگى تاڭداعى قالالىق ايماقتارداعى ەمحانالاردىڭ تىنىس-تىرشىلىگى مەن اۋرۋحانالارداعى كۇردەلى وتالارعا قاتىستى، دەنساۋلىق ساقتاۋعا بولىنەتىن قارجى مەن نازاردىڭ بۇگىنگى جاي كۇيىنە بايلانىستى ءتۇرلى ساۋالدارعا جاۋاپ الىندى. باقىتجان پازىلوۆ ءوز سوزىندە:
"جالپى بيىلعى تاۋەلسىزدىگىمىزدىڭ 30 جىلدىعى وتە ۇلكەن، اسا اۋقىمدى مەيرامداردىڭ ءبىرى. اتا بابالارىمىزدىڭ اڭساپ كەتكەن تاۋەلسىزدىگىنىڭ ارقاسىندا ەشكىمگە قول جايىپ، ەشكىمنەن نان سۇراپ وتىرعان جوقپىز. سونىڭ ىشىندە مەديتسينا سالاسىنا كەلەتىن بولساق، بيىل وسى شىمكەنت بولىپ بولىنگەنىمىزگە دە ءبىراز ۋاقىت بودى. بۇل دا ءبىر دەربەستىگىمىزدى بىلدىرەدى. قازىر مىنە وزىمىزشە وبلىس، وزىمىزشە قالا بولدىق. سونىڭ ىشىندە مەگاپوليس بولعاننان كەيىن ءار سالاعا جاۋاپكەرشىلىك ارتا ءتۇستى. ونىڭ ىشىندە مەديتسينا سالاسى دا بار. ەڭ باستى ماقسات بىزدەگى، ول مەديتسينا سالسىنىڭ ساپاسىن كوتەرۋ. مىسال رەتىندە الاتىن بولساق بىزدە شىمكەنت قالاسىنان وتە كوپ ناۋقاستارىمىز نۇر-سۇلتان، الماتى، شەت ەل اسىپ تاشكەنت، ءتىپتى كورەيا ەلىنىڭ قالالارىنان ەم ىزدەپ كەتەتىن ەدى. سەبەبى ءبىز ول ۋاقىتتاردا كۇردەلى وتالاردى جاساي المايتىن ەدىك. وعان دا سەبەپ كوپ ەدى. بىرىنشىدەن ماماندار، ەكىنشىدەن قۇرال جابدىقتار دايىن ەمەس ەدى. ەكونوميكامىز سونشالىقتى قۇرال جابدىقتاردى ساتىپ الۋعا مۇمكىندىك جاساي المايتىن ەدى. ال ءدال بۇگىنگى كۇنى، وسى 30 جىلدىقتىڭ توڭىرەگىندە الىپ قارايتىن بولساق اتالعان وسىنداي وتە كۇردەلى وپەراتسيالاردى ءبىز ءوزىمىز جاساپ وتىرمىز" دەدى.
تۋ كورسەتكىشى بويىنشا شىمكەنت قالاسى ەڭ الدىڭعى قاتارلى قالالاردىڭ ءبىرى ەكەنىن باسا ايتتى. پازىلوۆتىڭ سوزىنشە شىمكەنتتە ءار 15 مينۋت سايىن دۇنيەگە ءسابي كەلەدى ەكەن. سونىمەن قاتار 14 مەملەكەتتىك، 20 جەكە مەنشىك ەمحانا دەنساۋلىق سالاسىن دامىتۋدا تىنباي ەڭبەكتەنىپ جاتقانىن تىلىنە تيەك ەتتى. حالىقتىڭ 30 پايىزى جەكە مەنشىك ەمحاناعا تىركەلگەن بولسا، قالعانى مەملەكەتتىك ەمحانانىڭ كومەگىنە جۇگىنەتىنىن ايتا كەتتى.
"بۇكىل قازاقستان بويىنشا قامتىپ وتىرعان KAZمEDPRIBOR اتتى كاسىپورىن كومپانياسى قازىرگى تاڭدا وكپەنى جاساندى جەلدەتۋ اپپاراتىن، مونيتورلاردى، ۋزي، رەنتگەن جانە تاعىسىن تاعى، كوپتەگەن قاجەتتى مەديتسينالىق قۇرال جابدىقتاردىڭ ءبارىن شىعارىپ جاتىر" دەدى باۋىرجان پازىلوۆ.
