ەلىمىزدە ءتورت مىڭعا جۋىق دارىگەر جەتىسپەيدى. سونىڭ كەسىرىنەن حالىق ارنايى ماماندارعا كورىنۋ ءۇشىن ايلاپ كەزەك كۇتۋگە ءماجبۇر. بۇل تۋرالى “ادىرنا” ۇلتتىق پورتالى 31-ارنانىڭ “ينفورمبيۋرو” جاڭالىقتار باعدارلاماسىنا سىلتەمە جاساپ حابارلايدى.
جاس مامانداردى الەۋمەتتىك قولداۋدىڭ جەتىسپەۋشىلىگىنەن دارىگەرلەر بۇل سالادان دا، ەلدەن دە كەتىپ جاتىر دەپ توپشىلايدى. مينيسترلىكتىڭ مالىمەتىنشە قازىر ەلدە پەدياتر، ينفەكتسيونيست، كارديولوگ، ەپيدەميولوگ، پۋلمونولوگتار تاپشى. ال جالپى پراكتيكا دارىگەرلەرى، انەستەزيولوگ-رەانيماتولوگ، تەراپەۆت، اكۋشەر-گينەكولوگ ءتىپتى جوقتىڭ قاسى.
دارىگەر قابىلداۋىنا كىرە الماي جۇرگەندەردىڭ ءبىرى اقتاۋلىق اسەل. تۇرعىن ونلاين كەزەكتى كەيدە ءبىر ايعا جۋىق كۇتۋگە تۋرا كەلەدى دەيدى.
“وتادان كەيىن دارىگەرگە قايتا قارالماق بولعان ايەل ءتىپتى كەزەك كەلگەن كەزدە قاجەتتى مامان تاپپاي قينالىپ قالامىز. ويتكەنى كوپ اۋراحانالاردا دارىگەر جەتپەيدى، ەسەسىنە ەمدەلۋشى كوپ”، – دەيدى ول.
ماڭعىستاۋ وبلىستىق دەنساۋلىق ساقتاۋ باسقارماسى وڭىردە 276 دارىگەردىڭ جەتىسپەيتىنىن ايتادى. باسقارماداعىلاردىڭ ايتۋىنشا، باسپانامەن قامتاماسىز ەتەتىن الەۋمەتتىك باعدارلامالاردىڭ بارىنا قاراماستان مامان تاپشىلىعى جويىلماي وتىر. وبلىستا انەستەزيولوگ-رەانيماتولوگ پەن تاجىريبەلىك دارىگەرلەر اسا تاپشى بولىپ وتىر دەيدى.
“جالپى تاجىريبەلىك دارىگەرلەر جەتىسپەيدى. ول ءبىزدىڭ بارلىق باستاپقى-سانيتارلىق كومەك كورسەتۋ ۇيىمدارىنا قاجەت. اقتاۋ قالاسى جەرگىلىكتى بيۋدجەت ەسەبىنەن 75-كە جۋىق مامان ينتەرناتۋرادا جانە رەزينتۋرادا دايىندالىپ جاتىر. ول ماماندار دايىندالىپ كەلگەننەن كەيىن 5 جىل جۇمىس جاساپ وتەيتىن بولادى”، – دەيدى ماڭعىستاۋ وبلىستىق دەنساۋلىق ساقتاۋ باسقارماسىنىڭ ءبولىم باسشىسى ايگۇل تەلەگەنوۆا.
ال ەلىمىزدىڭ سولتۇستىگىندە اۋرۋحاناعا ەمدەلۋگە كەلگەن ناۋقاستاردىڭ دارىگەرگە قارالۋىنىڭ ءوزى مۇڭ بولىپ تۇر. مۇنداعى تۇرعىندار دا ايلاپ كەزەك كۇتەتىندەرىن ايتادى. اسىرەسە، تەراپەۆت، كوز دارىگەرى، گينەكولوگقا قارالۋ ءۇشىن ەكى اي بۇرىن كەزەككە تۇرۋ كەرەك ەكەن. ال، ۇزىن-سونار كەزەك كۇتكەندە اۋرۋى اسقىنىپ بارا جاتقاندار، امالسىزدان اقىلى ەمحانالارعا بارۋعا ءماجبۇر بولعاندارىن ايتادى.
”ادىرنا” ۇلتتىق پورتالى
