Elimizde tórt myńǵa jýyq dáriger jetispeıdi. Sonyń kesirinen halyq arnaıy mamandarǵa kóriný úshin aılap kezek kútýge májbúr. Bul týraly “Adyrna” ulttyq portaly 31-arnanyń “Informbıýro” jańalyqtar baǵdarlamasyna silteme jasap habarlaıdy.
Jas mamandardy áleýmettik qoldaýdyń jetispeýshiliginen dárigerler bul saladan da, elden de ketip jatyr dep topshylaıdy. Mınıstrliktiń málimetinshe qazir elde pedıatr, ınfekıonıst, kardıolog, epıdemıolog, pýlmonologtar tapshy. Al jalpy praktıka dárigerleri, anestezıolog-reanımatolog, terapevt, akýsher-gınekolog tipti joqtyń qasy.
Dáriger qabyldaýyna kire almaı júrgenderdiń biri aqtaýlyq Ásel. Turǵyn onlaın kezekti keıde bir aıǵa jýyq kútýge týra keledi deıdi.
“Otadan keıin dárigerge qaıta qaralmaq bolǵan áıel tipti kezek kelgen kezde qajetti maman tappaı qınalyp qalamyz. Óıtkeni kóp aýrahanalarda dáriger jetpeıdi, esesine emdelýshi kóp”, – deıdi ol.
Mańǵystaý oblystyq densaýlyq saqtaý basqarmasy óńirde 276 dárigerdiń jetispeıtinin aıtady. Basqarmadaǵylardyń aıtýynsha, baspanamen qamtamasyz etetin áleýmettik baǵdarlamalardyń baryna qaramastan maman tapshylyǵy joıylmaı otyr. Oblysta anestezıolog-reanımatolog pen tájirıbelik dárigerler asa tapshy bolyp otyr deıdi.
“Jalpy tájirıbelik dárigerler jetispeıdi. Ol bizdiń barlyq bastapqy-sanıtarlyq kómek kórsetý uıymdaryna qajet. Aqtaý qalasy jergilikti bıýdjet esebinen 75-ke jýyq maman ınternatýrada jáne rezıntýrada daıyndalyp jatyr. Ol mamandar daıyndalyp kelgennen keıin 5 jyl jumys jasap óteıtin bolady”, – deıdi Mańǵystaý oblystyq densaýlyq saqtaý basqarmasynyń bólim basshysy Aıgúl Telegenova.
Al elimizdiń soltústiginde aýrýhanaǵa emdelýge kelgen naýqastardyń dárigerge qaralýynyń ózi muń bolyp tur. Mundaǵy turǵyndar da aılap kezek kútetinderin aıtady. Ásirese, terapevt, kóz dárigeri, gınekologqa qaralý úshin eki aı buryn kezekke turý kerek eken. Al, uzyn-sonar kezek kútkende aýrýy asqynyp bara jatqandar, amalsyzdan aqyly emhanalarǵa barýǵa májbúr bolǵandaryn aıtady.
”Adyrna” ulttyq portaly
