ساتباەۆ قالاسىندا بەس جاسار قىزدى زورلاۋ ءىسى بويىنشا سوتتالعاندار سوت شەشىمىن وزگەرتۋدى سۇراپ، اپپەلياتسيالىق شاعىم ءتۇسىردى. ەرلى-زايىپتىلار ۇكىمدى جەڭىلدەتۋىن وتىنەدى، دەپ حابارلايدى "ادىرنا" ۇلتتىق پورتالى.
قاراعاندى وبلىستىق سوتىنا ساتباەۆتا بەس جاسار قىز بالانى قورلاۋ ءىسى بويىنشا سوتتالعان ەرلى-زايىپتىلاردان ۇكىمدى جەڭىلدەتۋ تۋرالى اپپەلياتسيالىق شاعىمدار كەلىپ ءتۇستى.
- سوتتالعاندار اپپەلياتسياعا بەردى. الايدا سوت جابىق پروتسەستى قاراۋ ساتىسىندا تۇسىنىكتەمە بەرە المايدى»، - دەپ ءتۇسىندىردى قاراعاندى وبلىستىق سوتىنىڭ ءباسپاسوز قىزمەتى.
سوتتىڭ ءباسپاسوز قىزمەتىنىڭ حابارلاۋىنشا، ءىس جىنىستىق قولسۇعۋشىلىققا قاتىستى بولعاندىقتان، تىڭداۋ جابىق رەجيمدە وتەدى.
- پروتسەسس جابىق وتۋىنە بايلانىستى سوت ءىستى قاراۋ كەزىندە پىكىر بىلدىرە المايدى، - دەپ حابارلادى سوتتىڭ ءباسپاسوز قىزمەتى. ءىس قورىتىندىسى بويىنشا قابىلدانعان شەشىم تۋرالى اقپارات جاريالانادى.
ەسكە سالا كەتەيىك، بىلتىر 24 شىلدەگە قاراعان ءتۇنى ساتباەۆ قالاسىندا اۋىر قىلمىس جاسالدى. قالالىق پوليتسيا بولىمىنە بەس جاسار قىزدىڭ اكەسى ارىزدانىپ، بالاسىنىڭ جوعالعانىن حابارلادى. وسىدان كەيىن ىزدەۋ شارالارى باستالدى. جەرگىلىكتى پوليتسيانىڭ جەكە قۇرامى تارتىلدى. جۇزدەگەن ەرىكتى دە قىزدى ىزدەۋگە شىقتى. ناتيجەسىندە 5 جاسار بالا كوپقاباتتى ۇيدەگى پاتەرلەردىڭ بىرىنەن تابىلعان بولاتىن.
ىسكە بايلانىستى القابيلەر سوتى ەرلى-زايىپتىنى قىلمىستىق كودەكستىڭ 121-بابى ("سەكسۋالدىق سيپاتتاعى زورلىق-زومبىلىق ارەكەتتەرى"), 120-بابى ("زورلاۋ") جانە 106-بابى ("دەنساۋلىققا قاساقانا اۋىر زيان كەلتiرۋ") بويىنشا كىنالى دەپ تانىدى.
ەر ادامنىڭ ماس كۇيىندە قىلمىس جاساۋى جاعدايى اۋىرلاتۋ رەتىندە تىركەلدى. سوتتالۋشىعا ءومىر بويى باس بوستاندىعىنان ايىرۋ جازاسى تاعايىندالدى. ونىڭ جۇبايىنا قىلمىستاردىڭ جيىنتىعى بويىنشا پەداگوگيكالىق لاۋازىمدى جانە كامەلەتكە تولماعاندارمەن جۇمىس ىستەۋگە بايلانىستى لاۋازىمدى اتقارۋ قۇقىعىنان ءومىر بويىنا ايىرا وتىرىپ، 22 جىلعا باس بوستاندىعىنان ايىرۋ جازاسى تاعايىندالدى.
ايتا كەتەيىك، بىلتىر 6 قازاندا قاراعاندى قالاسىنىڭ تەرگەۋ يزولياتورىندا ءۇشىنشى كۇدىكتىنىڭ ءولى دەنەسى تابىلدى. ول ءوز-وزىنە قول سالدى.
"ادىرنا" ۇلتتىق پورتالى
