8 جىل بويى حالىقارالىق ىزدەۋدە جۇرگەن قازاقستاندىق رەسەيدە ۇستالدى

3059
Adyrna.kz Telegram

8 جىل بويى حالىقارالىق ىزدەۋدە جۇرگەن قازاقستاندىق رەسەي فەدەراتسياسىندا ۇستالدى، دەپ حابارلايدى "ادىرنا" ءتىلشىسى Polisia.kz-كە سىلتەمە جاساپ.

6 قاراشادا ماڭعىستاۋ وبلىسى پد كريمينالدىق پوليتسيا باسقارماسىنىڭ ىزدەستىرۋ تاپسىرماسىمەن ورلوۆسك وبلىسى بويىنشا رەسەي فەدەراتسياسى ءىىم-ءنىڭ نوۆوسيلسك بولىمشەسىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا قازاقستان رەسپۋبليكاسىنىڭ ازاماتشاسىن ۇستادى. ايەل الاياقتىق قىلمىس جاسادى دەگەن ايىپپەن ىزدەۋدە بولدى. ول 2010 جىلدىڭ ءساۋىر ايىندا جالعان قۇجاتتار بويىنشا الاياقتىق جولمەن 1,5 ملن تەڭگەگە جابىرلەنۋشىگە بانكتە كەپىلدە تۇرعان مۇنايلى اۋدانى مەكەنجايى بويىنشا جەر ۋچاسكەسىن ساتقان. سونداي-اق وسى جىلدىڭ ماۋسىم ايىندا ءوزىنىڭ قىلمىستىق نيەتىن جالعاستىرا وتىرىپ، جابىرلەنۋشىگە مۇنايلى اۋدانىنداعى جەر ۋچاسكەسىن جالعان قۇجاتتارمەن 4,5 ملن تەڭگەگە  بەرگەن.

جالپى كۇدىكتىنىڭ الاياقتىق ارەكەتتەرىنەن 74 جابىرلەنۋشى زارداپ شەكتى، كەلتىرىلگەن ماتەريالدىق شىعىن 50 ميلليون تەڭگەدەن استى. پوليتسيا قىزمەتكەرلەرى كۇدىكتى 71 جاستاعى ازاماتشانى رەسەي ءىىم نوۆوسيلسك بولىمشەسىنىڭ ۋاقىتشا ۇستاۋ يزولياتورىنا قامادى. قازىرگى ۋاقىتتا تەرگەۋ ارەكەتتەرى جۇرگىزىلۋدە.

پىكىرلەر