وزبەكستاننىڭ سامارقاند وبلىسى پايارىق اۋدانىندا 30 جاستاعى ەر ادام ايەلىن كەتپەنمەن ۇرىپ ءولتىردى دەپ حابارلايدى «ادىرنا» ۇلتتىق پورتالى centralasia.media-عا سىلتەمە جاساپ.
بەلگىلى بولعانداي، ەرلى-زايىپتىلار ءۇيدىڭ ۇزاققا سوزىلعان جوندەۋ جۇمىستارىنا بايلانىستى جانجالداسقان. جانجال كەزىندە ايەل كەتپەنمەن كۇيەۋىنىڭ يىعىنان ۇرىپ جىبەرگەن. ەر ادام نامىسىنا تيگەن ايەلىنىڭ قولىنان كەتپەندى تارتىپ الىپ، ونى ماڭدايىنان ۇرعان.
ەر ادام ايەلى سوققىدان قۇلاعاننان كەيىن دە ونى الگى قۇرالمەن ۇرۋدى جالعاستىرعان.
وسىدان كەيىن قايىن اتاسىنىڭ ۇيىندە تۇرعان جاس جىگىت ول جەردەن قاشىپ كەتكەن. وقيعا تۋرالى بىلگەن ايەلدىڭ تۋىستارى ونى اۋرۋحاناعا جەتكىزگەن، الايدا ول قايتىس بولعان.
كوپ ۇزاماي ەر ادام اۋداندىق پوليتسيا بولىمىنە ءوز ەركىمەن بارىپ، ايەلىن ۇرعانىن مويىنداعان.
ەر ادام ايەلىنىڭ ولىمىنە كىنالى دەپ تانىلىپ، اۋداندىق سوت ونى 18 جىلعا باس بوستاندىعىنان ايىردى.
«ادىرنا» ۇلتتىق پورتالى.
