كەلىنجان: 4 ماۋسىمدى تۇسىرۋگە كەلىسسوزدەر ءجۇرىپ جاتىر

2861

كوپتىڭ كوڭىلىنەن شىعىپ، ىقىلاسىنا بولەنگەن، قازىرگى تاڭدا حالىق اۋزىنان ءبىر ەلى تۇسپەيتىن «كەلىنجان» سەريالىنىڭ جالعاسى تۇسىرىلە مە؟ 3 ماۋسىم بويىنا تۇسىرىلگەن بۇل سەريال تۋرالى شىن مانىندە كورەرمەندەردىڭ پىكىرى قانداي؟ وسى ساۋالدار اياسىندا «ادىرنا» ۇلتتىق پورتالىنىڭ ءتىلشىسى ءبىراز كورەرمەنمەن پىكىر الماسىپ، «كەلىنجان» جەلىسىن اشۋعا تىرىستى.

    «اتىڭ وشكىر ايسارا»، «ايسارا، بارىنە كىنالى ايسارا»

«ايسارا» اتتى كەيىپكەر بولماسا بۇل سەريال قىزىق بولار ما ەدى؟ راسىمەن، ءوزىنىڭ مىنەزىمەن، سويلەۋ مادەنيەتىمەن ەرەكشەلەنگەن كەيىپكەردىڭ جانكۇيەرلەرى دە وتە كوپ.

العاشقى پىكىر يەسى قۇلسارى قالاسىنىڭ تۋماسى، 4 بالانىڭ اناسى نازيرا حانىم:

-«كەلىنجاندى» ءبىرىنشى ماۋسىمنان بەرى ۇزبەي كورىپ كەلەمىن. ءار ماۋسىم ەرەكشە ەپيزودقا تولى. ءار كەيىپكەردىڭ تاعدىرى كورەرمەنگە تاڭسىق ەمەس. ويتكەنى كەز-كەلگەن شاڭىراقتا ورىن الاتىن قاراپايىم كۇندەلىكتى ءومىردى سيپاتتاي ءبىلدى. شىنايىلىقتى شىڭداي العاندارى ءۇشىن ريزامىن.

ماعان قاتتى ۇناعان كەيىپكەر – ايسارا. ءبىرىنشى ماۋسىمدى ەسكە تۇسىرەيىك. ەنەسىنىڭ قولىندا بىرگە تۇراتىن 3 كەلىن. ءبارىنىڭ ويىندا بولەك شىعۋ. ءبىزدىڭ ءتالىم-تاربيە بويىنشا ءۇيدىڭ ۇلكەن ۇلدارى بولەك كەتىپ، كەنجە كەلىن شاڭىراقتىڭ ءتۇتىنىن تۇتاتۋشى ەدى.

قازىرگى قوعامدا دا وسى ماسەلە ءۇشىن كوپ ابىسىن ابىرويدان اتتاپ، ەنەگە دەگەن قۇرمەتتى ۇمىتۋدا.

ايسارا – شاڭىراقتىڭ ۇلكەن كەلىنى. ەنەسىنىڭ وڭ قولى دەسەك تە ارتىق ەمەس.

ويىنداعىنى ايتا سالاتىن تىكمىنەزدىلىك، اڭگىمەقۇمارلىق، بوس سويلەۋ سىندى قاجەت ەمەس قاسيەت كەلىندەردىڭ 3/1-ىندە كەزدەسەدى. مەن دە كەلىنمىن. اينالامداعىنىڭ ءبارى كەلىن ستاتۋسىن يەلەنگەندەر.

كۇيەۋىنە قارسى شىعۋ، ايتقاندارىنا كەلىسپەۋ، ءوز ىعىنا كوندىرۋ – وكىنىشكە قاراي، ايەل باسشىلىق ەتەتىن جانۇيالار بار. وتە كوپ. ەركەكتى ىنجىق ەتىپ، ايداعانىنا سالىپ، باۋىرلارىمەن ارالاستىرماي قوياتىندار دا جەتەرلىك.

سەريالدى وتباسىممەن بىرگە تاماشالايمىز. كۇيەۋىم قىلىشتى كورگەندە توبە شاشى تىك تۇرادى. «جاي سەريال عوي، نەگە جىنداناسىڭ؟» دەگەنىم دە بارلىق نارسە ومىردەن الىنادى. بار عوي مۇندايلاردا... دەپ جاۋاپ قاتقان.

كوردىڭىز بە؟ ايەلىنە «قوي!» دەي المايتىن ەركەكتەر ءتۇبى ونىڭ بار ايتقانىنا كونىپ، كوشكە ىلەسىپ كەتەدى.

باۋىرلاردىڭ اراسىنا ءتۇسۋ، سىزا ءتۇسىرۋ – «ءوز انامىز كۇيەۋگە شىعاردا ابىسىنمەن ءبىر استى ءبولىپ ىشەسىڭ. ىشكەن اسقا، بولىسكەن قاسىققا ۋ قۇيما. بەلى بەكەم بۋىلعان باۋىرلاردىڭ اراسىنا ينە سۇقپا، ايەل جاقسى بولسا باۋىرلاردىڭ ارا-قاتىناسى ولەلگەنشە مىعىم بولادى» دەۋشى ەدى. راسىمەن، بىرەۋدىڭ شاڭىراعىن بۇزۋعا ەش حاقىمىز جوق. بالا كەزىنەن ءبىر توسەكتە بىرگە جاتقان اعالى-ءىنىل، اپالى-قارىنداستىڭ اراسىن بۇزۋعا كەشە عانا شاڭىراققا قوسىلعان كەلىننىڭ قۇدىرەتى جەتەدى، بىراق ارانى اجىراتقاننان كىم باقىتتى بولادى؟

3 ماۋسىمدا ايسارا بالقياعا ۇلكەن قاستاندىق جاسادى. وتباسىنىڭ شىرقىن بۇزدى. قاتەسىن ءتۇسىنىپ، مويىندادى. كەشىرىم سۇرادى، بالقيا كەشىرىمدى بولدى. ايسارانىڭ سول جەردە ايتقان ءسوزى كوپ ايەلدىڭ باستى پروبلەماسى ەدى. ول كۇيەۋىنەن كورمەگەن جىلۋلىقتى، وزگەدەن كورىپ قىزىقتى، قىزعاندى. وعان ءوزىن كىنالادى. «نەگە مەن وسىندايمىن؟» دەگەن سۇراق قويىپ جاقسى جاققا وزگەرۋگە تىرىستى.

باۋىرجان مومىشۇلى ايتقانداي، ەڭ باتىل ادام – كۇيەۋگە شىققان قىز دەيدى. شىنىمەن، ءبىز كۇيەۋگە شىعىپ، باسقا مۇلدە تانىمايتىن وتباسىنىڭ كوڭىلىن تاۋىپ، بىرلىگىن نىعايتىپ، تاستاي باتىپ، سۋداي سىڭەمىز. ونىڭ ءبارى كىم ءۇشىن؟ كۇيەۋىمىزدىڭ رازىلىعى، سول كىسى ءماز بولسا ەكەن دەپ ارەكەتتەنەمىز. ال ولاردان كەرەگى تەك جىلۋلىق قانا. ول جەتىسپەسپە، ايەل توقىرايدى. وزگەرەدى...

ايسارا سەريالدا جامان كەلىن بولعانىمەن، بۇل ءرول ءار شاڭىراقتاعى ءبىر كەلىننەن تاعدىرى. مۇمكىن «ايسارانى» كورگەن كەلىندەر ءوز بويىنان وسى قاسيەتتەردىڭ بار ەكەنىن ءبىلىپ، وزگەرۋگە تىرىساتىن بولار. ماعان وسى ءۇشىن قاتتى ۇناعان كەيىپكەر – ايسارا.

ەركەك ءتۇزدىڭ ادامى: ءۇش باۋىردىڭ بوتەلكەلەس بولۋى

«ەركەك ءتۇزدىڭ ادامى» دەگەن ماقالدى ءجيى ەستيمىز. ءتۇزدىڭ ادامى دەگەندى ءبىرى وتباسىن اسىراۋ ءۇشىن دالا كەزىپ جۇمىس ىستەيتىندەردى اتاسا، ءبىرى ءجۇرىسى كوپ، قۋلىعى كوپ ەر ازاماتتاردى ايتادى.

قۇلسارى قالاسىنىڭ تۋماسى، پسيحولوگ ب. ايگەرىم حانىم:

-«كەلىنجان» سەريالىنداعى مادىبەكتىڭ بالقياعا وپاسىزدىق جاساۋى، ءتىپتى بۇرىن اكەسىنىڭ باسقا بىرەۋدەن ءبىر بالاسى بار ەكەندىگى كەيىن بەلگىلى بولدى.

بايقاپ قاراساق، كەلىندەردىڭ ىشىندەگى ەنەسىنە جاقىنى، ءسوزىن سويلەر، قارسى شىقپايتىن، ءاي-ءجايىن ىم-جىمسىز شەشەتىن اقىلدى كەلىنى وسى بالقيا. كۇيەۋىنە دە كوزقاراسى كەرەمەت بولدى. بىراق نەگە مادىبەك وپاسىزدىق جاسادى؟ قازىر ينستاگرامدا وتباسىلىق كوۋچتار كوبەيىپ كەتتى. بارلىعىنىڭ ايتاتىنى «ايەل دۇرىس بولسا ەركەك ەشقايدا كەتپەيدى» دەيدى. ايەل بايعۇس وسى ءسوزدى ەستىپ الىپ، بار كىنانى وزىنەن كورەدى. «دۇرىستالام، ادەمى بولام،مىنەزىم جامان، سويلەمەۋىم كەرەك ەدى» دەگەن ويلار ونى جەگىدەي جەيدى.

جالپى «ايەل قىرىق شىراقتى» دەگەن ماقالدى دا ەركەكتىڭ بار قاتەسىن كەشىرۋ ماقساتىندا قولدانامىز. وسىدان باستاپ ءتۇرلى وتباسىلىق كيكىلجىڭدەر پايدا بولادى. ءبىر رەت باسىلعان قيسىق قادام تۇزەلەر اۋ. كوڭىل قيسايسا، ورنىنا كەلتىرۋ قيىنعا تۇسەدى.

مادىبەكتىڭ ۆاليانى ۇناتقانى سەكىلدى، كوپ ايەلدەر دە وپاسىزدىقتىڭ وتىن سەزىپ وتىر. جانعا باتسا دا ونى كەشىرىپ، وتباسىنىڭ وشاعىن وشىرمەيمىز. وتباسى سوندا ايەلگە عانا قاجەت پە؟

پسيحولوگ مامان رەتىندە، 9 بالاسى بار ءبىر ايەلگە كونسۋلتاتسيا جۇرگىزدىم. ءدال وسى ماسەلە اياسىندا. كۇيەۋى 9 بالاسى بولا تۇرا، وتباسىن تاستاپ، باسقا ايەلدىڭ سوڭىنان كەتكەن. 5 اي باسقا جاقتا بوپ، كەيىن وتباسىنا ورالعان. ايەلدىڭ ماعان كەلگەندەگى ماسەلەسى – «كەشىرىم سۇراپ تۇر، بىراق قاتتى جەك كورىپ كەتتىم، قالاي قايتادان قابىلدايمىن؟»

50-دەن كەتكەن تاعى ءبىر ايەل جولىقتى. ايەل ءارى اجە. جۇبايى نەمەرەلەرى بولا تۇرا، باسقا ايەلگە كەتىپ قالعان. بۇل ەركەكتە 5 ايدان سوڭ قايتا كەلگەن. «شاڭىراق كوتەرگەن 3 بالام بار. 6 نەمەرەم بار. سولار ءۇشىن كەشتىم. بىراق كۇندە تۇندە جىلايمىن. جانىما جولاتقىم كەلمەيدى، ساتقىندىق دەگەن جۇرەككە قاتتى باتادى»،- دەدى.

ايتا بەرسەك، بۇعان ۇقساس وقيعالار وتە كوپ. ەركەكتىڭ ايەل جامان بولعاننان ەمەس، ءوزى سولاي قالاعاندىقتان باسقاعا كەتەتىنىن ۇعىنۋ كەرەك. كەيىن كەلەتىن وكىنىش كومەكتەسپەۋى دە مۇمكىن. وتباسىنىڭ جاعدايىن ويلاعان ايەل ءوز جانىن ەزگىگە سالىپ، كەشىرە سالادى.

ۆاليا مەن بالقيا جانداي قۇربى. ساتقىندىق تەك كۇيەۋدەن ەمەس، قۇربىمەن قاتار كەلسە ودان اسقان قيانات جوق. بىراق، بالقيا ونى دا كەشىردى. سەريالدىڭ وسى جەرى مەنىڭ ىزاما ءتيدى. كوپ ايەلدەر وسىلاي وزدەرىن ادام تۇرعىسىنان قۇربان ەتىپ جاتىر. مۇمكىن سەريال وسىنى كورسەتكىسى كەلگەن بولار، بىراق ايەل – تۇلعا. تۇلعالىق كەيپىن جوعالتپاۋى ءتيىس.

سوڭعى بولىمگە جاقىنداعان ساتتە ءۇش اعايىندىنىڭ بوتەلكەلەس بولعانىن كورسەتەدى. نەگىزى قازاقتا باۋىرلار اراق تۇگىلى باسقا سۋسىندى دا سوعىستىرىپ ىشپەيدى. ۇياڭدىق، سىيلاستىق، قامقورلىق بار...

بالا بەرسەڭ سانا بەر: كۇلىمحانداي كەمپىر بارلىق شاڭىراققا كەرەك

كەلەسى پىكىر يەسى 74 جاستاعى مايرا اجەي:

-25 جاسىمدا 2 بالاممەن جەسىر قالدىم. جولداسىم جويقىن جول اپاتىنان ءتىل تارتپاي كەتتى. شاعالاقتاي بالامەن قالعانىمدا، بارىمنان ايىرىلعانداي كۇي كەشتىم.

ءوزىم جەتىم قىز ەدىم، جولداسىم كەتكەن سوڭ كىمگە قول جايىپ بارارىمدى بىلمەي اتا-ەنەمنىڭ قولىندا قالدىم. اتام دا ەنەم دە وتە قاتال كىسىلەر ەدى. بالاسىنىڭ ولىمىنە مەنى كىنالادى. ويتكەنى، پەرزەنتحاناعا كەلە جاتقان جەرىنەن ۇلكەن جۇك كولىگىنە سوعىسىپ، قايتىس بولعان ەدى.

ءتىپتى، ەنەم مەنى ۇراتىن. ەكى بالام ءۇشىن ءومىر سۇرەم دەپ وزىمە ۋادە ەتتىم. قايتا كۇيەۋگە شىقپادىم. قازىر كوپ نەمەرەلەرىم بار. باقىتتى اجەمىن. بىراق مەندە كۇلىمحان سياقتى، بالالاردىڭ قىزىعىن دا شىجىعىن دا قاتار كورۋدەمىن. ەكى كەلىن بىرگە تۇرادى. كەيدە تاتۋ كەيدە قيسىق. ايتەۋىر سولاي ءومىر ءوتىپ جاتىر. ءبىرى قالاعا بولەك شىعامىن دەسە، ەكىنشىسى دە قالىسپايدى. قيسىق جەرلەرىن تۇزەتىپ، دۇرىس جولدى كورسەتىپ جىبەرەتىن كۇلىمحانداي كەيىپكەر ءار شاڭىراققا كەرەك...

«ەنەممەن بىرگە تۇرا المايمىن» دەيتىندەردىڭ ۋاجىندە قابىلداي الامىن. ويتكەنى ەنە دە ادام. ونىڭ دا ءوز قاتەلىگى جەتەرلىك، قالىپتاسىپ كەتكەن ادامنىڭ قاتەلىگىن تۇزەمەي، كەرىسىنشە سولاي قابىلداۋ كەرەك.

ءبارىن ايتتا ءبىرىن ايت، «كەلىنجان» ناعىز شىن ءومىردى سۋرەتتەگەن سەريال.

ءبىرى پسيحولوگ، ءبىرى اجەي، ءبىرى كەلىن. بىراق «كەلىنجان» تۋرالى ويلارىنىڭ ءتۇپ نەگىزى ءبىر-بىرىنە ۇقساس. كۇلىمحان، ايسارا، مادىبەك. ءۇش كەيىپكەردىڭ بەينەسى تۇتاس ءبىر قوعامدى بەينەلەپ تۇرعانداي.

تۋىندىنىڭ باس پروديۋسسەرى گۇلنۇر ماماساريپوۆا سەريالعا ارقاۋ بولعان وقيعالاردى ومىردەن العانىن باسا ايتتى. ءتىپتى كەيىپكەرلەردىڭ ءوزى مەنىڭ اينالامداعى ادامدار دەيدى.

«قازىرگى جاستار وتباسى بولۋدى جاسىلدى-قىزىلدى قىپ ەلەستەتەدى. الايدا كۇندە كوڭىلدى جاعدايلار بولا بەرمەيدى. داعدىعا ۇيرەنۋ قاجەت. كيكىلجىڭسىز ومىرگە ۇيرەنىپ قالعان قىزدار ءبىر ۇرىس شىقسا «بولدى، مەن كۇيەۋگە ءساتسىز شىقتىم» دەپ شىعادى. اجىراسامىز دەيدى، سەبەبى جوق. وسىنداي قوعامنىڭ دەرتىنە اينالعان دۇنيەلەردى ءبىر ارناعا سيعىزىپ، كورەرمەنگە ۇسىندىق. ءبىر قۋانارلىعى، «وتباسىمدى ساقتاپ قالۋعا سەپتىگىن تيگىزدىڭىزدەر» دەگەن پىكىرلەر وتە كوپ كەلدى. ءبىزدىڭ ماقساتىمىز سول ەدى»، - دەدى گۇلنۇر ماماساريپوۆا حابار ارناسىنداعى «بۇگىن» تەلەباعدارلاماسىنا بەرگەن سۇحباتىندا.

كورەرمەندەر اراسىندا قىزۋ تالقىعا تۇسكەن سۇراقتاردىڭ ءبىرى «4 ماۋسىم بولا ما؟»

« ادامنىڭ ەمەس، اللانىڭ دەگەنى بولادى. قازىرگى تاڭدا كەلىسسوزدەر جۇرگىزىلىپ جاتىر. قۇجاتقا قول قويىلماي تۇرىپ، بىردەڭە دەۋ قيىن. الايدا تەلەارنا تاراپىنان دا، ءبىزدىڭ تاراپتان دا ۇسىنىستار ءتۇسىپ، كەلىسسوز جۇرگىزۋدەمىز. جالعاسىن تابۋى ابدەن مۇمكىن»،- دەدى ءوز سوزىندە ماماساريپوۆا.

سونىمەن، كەلەسى ماۋسىم بولىپ جاتسا، قانداي قىزىقتى وقيعالارىمەن تاڭقالدىرادى ەكەن؟ ونى ۋاقىتتىڭ ەنشىسىنە قالدىردىق...

ءىنجۋ ومىرزاق،

"ادىرنا" ۇلتتىق پورتالى

 

 

 

 

 

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket