مادەنيەت جانە اقپارات ءمينيسترى ايدا بالاەۆا ەلدى شۋلاتقان “حابار” ارناسىنداعى “بىراق” باعدارلاماسىنا قاتىستى مالىمدەمە جاساپ، ونىڭ جابىلاتىنى تۋرالى ايتقان بولاتىن. ال الەۋمەتتىك جەلىدە ءمينيستردىڭ مالىمدەمەسى تالقىعا سەبەپ بولدى، دەپ حابارلايدى “ادىرنا” ۇلتتىق پورتالى.
13 ناۋرىز كۇنى “حابار” تەلەارناسىنداعى تۇرمىستىق زورلىق-زومبىلىق تاقىرىبى قوزعالعان “بىراق” باعدارلاماسىنىڭ شىعارىلىمى قوعامدا ۇلكەن رەزونانس تۋدىرعان بولاتىن. مادەنيەت جانە اقپارات ءمينيسترى ايدا بالاەۆا اتالمىش جاعدايدى نازاردان تىس قالدىرماي، الەۋمەتتىك جەلىدەگى پاراقشاسىنا مالىمدەمە جاسادى.
ول تەلارنادا بولعان جاعداي ۇلكەن ساباق بولعانىن اتاپ، توك-شوۋدىڭ جابىلاتىنىن جازدى.
“مەملەكەتتىك يدەولوگيانى جۇرگىزىپ وتىرعان مەملەكەتتىك تەلەارنا بۇنداي ولقىلىققا جول بەرمەۋى ءتيىس ەدى. ەڭ الدىمەن، رەداكتسيا بارلىق ەتيكالىق نورمالاردى ساقتاپ، وتباسىلىق-تۇرمىستىق زورلىق-زومبىلىق پەن ارانداتۋشىلىققا جول بەرمەۋگە، كەيىپكەرلەردى كوپشىلىك الدىندا قورلاماۋ قاجەت ەدى.
سوندىقتان تەلەارنا رەداكتسياسىنا بۇل ۇلكەن ساباق بولادى دەپ سانايمىز. اتالعان توك-شوۋ جابىلادى” دەلىندى مينيستر پوستىندا.
ءمينيستردىڭ وسى مالىمدەمەسى الەۋمەتتىك جەلىدە تالقى تۋدىرىپ، قولدانۋشىلار ءوز پىكىرلەرىن ورتاعا سالىپ جاتىر.
جەلى قولدانۋشىلارىنىڭ ءبىر بولىگى باعدارلامانىڭ جابىلعانىن قولداسا، ەندى ءبىر بولىگى «قالاۋلىم»، «قوسىلايىق»، «ءبىر بولايىق» سىندى باعدارلامالاردىڭ دا جابىلۋىن تالاپ ەتۋدە.
سونداي-اق، جەلى قولدانۋشىلارىنىڭ ءبىرى: «اتالعان توك-شوۋ جابىلا سالماي، وسى باعدارلامانى شىعارعان كوماندا جاۋاپقا تارتىلۋ كەرەك. ەندى ايەلگە كەلتىرگەن مورالدىق سترەسسكە كىم جاۋاپ بەرەدى؟ ەندى ول ايەلگە جالا جاۋىپ، پسيحولوگسىماقتارعا قاراتىپ، دياگنوز قويعىزىپ، بالالاردى تارتىپ المايتىنىنا كىم كەپىل؟” دەپ جازدى.
