ءبىر كەزدەرى "گۇلدەر" ءانسامبلىنىڭ بەدەلدى ءسوليسى بولعان امانگەلدى شىڭعىسوۆ بۇگىندە دالادا قاڭعىپ ءجۇر. ايتۋىنشا، ۇلى مەن كەلىنى ونى ۇيدەن قۋىپ شىققان، دەپ حابارلايدى "ادىرنا" ۇلتتىق پورتالى Stan.kz سايتىنا سىلتەمە جاساپ.
82 جاستاعى امانگەلدى شىڭعىسوۆ قۇرمانعازى اتىنداعى قازاق ۇلتتىق كونسەرۆاتورياسىن بىتىرگەن. ونەردەگى جولىن ءبىر كەزدەرى اتاعى دۇركىرەگەن "گۇلدەر" انسامبلىنەن باستاعان. جۇبايى قايتىس بولعان قاريا وسى ۋاقىتقا دەيىن ۇلىمەن بىرگە تۇرىپ كەلگەن.
الايدا جالعىز اتۇستارى وتباسىن قۇرعان سوڭ، اكەسىن ۇيدەن قۋعان. قاريانىڭ سوزىنشە، ونى بۇعان يتەرمەلەگەن - كەلىنى.
"بالامدى ۇيلەندىرىپ، تويدى بىتىردىك. تويدان كەيىن ۇيگە قۇربى-قۇرداستارىمەن كەلدى. مەن كەدەرگى كەلتىرمەي-اق قويايىن دەپ تۋىسىمنىڭ ۇيىنە كەتىپ قالدىم. 2 كۇن قوندىم. بالام جولداستارىن شىعارىپ سالۋعا كەتكەن. كەلىن ۇيدە قالعان.
ماعان: "سەنى پوليتسياعا جىبەرەمىن. جىندىحاناعا تۇسىرەمىن", - دەدى. ۇلىما: "مىنا قىزدى قايدان تاپتىڭ؟" - دەدىم. ۇلىم ەشتەڭە دەمەدى، ايەلىنىڭ ايتقانىن تىڭدايدى", - دەيدى قاريا ۇلى ءسات جايىندا.
اقساقالدىڭ ايتۋىنشا، ونىڭ بار كىناسى كەلىنگە ۇناماعانىندا. الايدا باعدارلاماعا سۇحبات بەرگەن قاريانىڭ ۇلى اكەسىنىڭ ىشىمدىككە سالىنىپ، كۇن بەرمەگەنىن ايتادى.
"الدىمەن ول كىسى ساۋ دەگەن انىقتاما اكەلىڭىزدەر. سوسىن سويلەسەمىز. بارلىق تۋىستارىمىز دالەلدەيدى. مەن ەسىمدى بىلگەلى، اراق ىشەدى. مەن ۇيلەنگەنگە دەيىن دە اكەممەن ەشقانداي قارىم-قاتىناس بولعان ەمەس. تاۋلىكتەپ دالادا جۇرەتىنمىن، سەبەبى ول ىشەتىن", - دەدى ءسات امانگەلدىۇلى.
قاريا ۇلىنىڭ ءسوزىن جوققا شىعاردى. كەڭەستىك كەزەڭدە ىشكەنىن، سوڭعى 15 جىلدا اۋزىنا الماعانىن ايتتى.
"كەتپەسەڭ، ەكەۋى اجىراسامىز، دەدى. سوسىن مەن اقتوبەگە قارىنداسىما كەتىپ قالدىم. ەكى جىل تۇردىم. قارىنداسىم قايتىس بولعان سوڭ، كەتىپ قالدىم. ويتكەنى ءوزى بولماعان سوڭ، بالالارىنىڭ كوزقاراسى باسقاشا عوي", - دەيدى قاريا.
امانگەلدى شىڭعىسوۆتى بەيتانىس ازامات تەمىر جول ۆوكزالىنان بايقاپ قالعان. جاعدايىن بىلگەن شىڭعىس بايسەرىكوۆ قاريانى حوستەلگە دەيىن جەتكىزىپ سالعان. ايتۋىنشا، 117 مىڭ تەڭگە زەينەتاقى الاتىن قاريانىڭ بار اقشاسى قوناق ءۇي اقىسىنا كەتۋدە.
مۋزىكانتتىڭ قاڭعىباسقا اينالعانىنا جارتى ايدان اسىپتى. باعىنا وراي، حوستەل باسشىسى دا مەيىرىمدى جان بولىپ شىعىپتى. قادىربەك جولامانوۆ قاريانىڭ جاعدايىن ءبىلىپ، تەگىن تۇرۋعا رۇقسات بەرىپتى. باسقاسى ازداي، قاريا كەلىنىنەن تاياق جەگەنىن ايتادى.
"باسىمنان شۆابرامەن ۇرىپ، قول جۇمسادى. دارەتحاناعا كىرسەم، ارتىمنان تەۋىپ جىبەرەتىن", - دەيدى قاريا.
قاريا 1970 جىلداردان بەرى الماتى ورتالىعىندا ورنالاسقان ءۇش بولمەلى پاتەردە تۇرىپ كەلگەن. زاڭگەردىڭ ايتۋىنشا، ول ءۇي سول كەزدە تۇرعان (امانگەلدى قاريا، جۇبايى، ۇلى، قىزى) بارلىق ادامعا بىردەي تيەسىلى. ايتكەنمەن، ءۇيدىڭ كوپ بولىگى قاريانىڭ ەنشىسىندە. ال امانگەلدى شىڭعىسوۆتىڭ ءوزى ء"بىر بولمەنىڭ ءوزى جەتكىلىكتى" دەپ وتىر. بىراق تاسجۇرەك كەلىنىمەن بىرگە تۇرۋعا تۇبەگەيلى قارسى.
"ادىرنا" ۇلتتىق پورتالى
