ءوز جۇمىسىنىڭ قيىندىعىنا قاراماي، ءاردايىم وزگەلەرگە قامقور بوپ، ازاماتتاردى قاۋىپ-قاتەردەن ساقتاپ جۇرەتىن قۇتقارۋشىلاردىڭ ەڭبەگى قاشان دا ەرلىكپەن تەڭ. سونداي قۇتقارۋشىلاردىڭ ءبىرى — ۆيكتور كوسوۆەتس. ول اقتوبە وبلىسىنىڭ توتەنشە جاعدايلار دەپارتامەنتى جەدەل قۇتقارۋ جاساعىندا 2009 جىلدان بەرى قىزمەت ەتىپ كەلەءدى.
ول بيىل شىلدە ايىندا ەلەك وزەنىنىڭ «جيلگورودوك» جاعاجايىندا توتەنشە جاعدايلار دەپارتامەنتى جانە پوليتسيا قىزمەتكەرلەرىمەن رەيدتىك ءىس-شارا كەزىندە دەمالۋشىلاردىڭ اراسىندا ءبىر ەر ازاماتتىڭ سۋعا باتىپ بارا جاتقاندىعىن بايقاپ قالىپ، ونى قۇتقارىپ، جاعاعا الىپ شىعادى. العاشقى مەديتسينالىق كومەك كورسەتىلگەن سوڭ، ەر ادامنىڭ الكوگولدىك ىشىمدىك ىشكەنى بەلگىلى بولادى.
ماس كۇيدە بولعان ازاماتتى ەڭ ءبىرىنشى ۆيكتور سۋ جاعاسىنداعى قامىستان بايقايدى. قۇتقارۋشى جەتكەن كەزدە 42 جاستاعى ازاماتتىڭ ءالى قۇرىپ، سۋعا باتادى. ۆيكتور ءوز ءومىرىن قاتەرگە تىگىپ، تەرەڭ سۋدان سەسكەنبەي، ىجداعاتتىلىقپەن الگى ادامعا قاراي سۇڭگىپ ونى ارقاسىنا سالىپ جاعاعا الىپ شىعادى. جاعاعا جەتكەن سوڭ جۇرەگىنە جاناما ماسساج جاساپ، ازاماتتى العاشقى مەديتسينالىق كومەك كورسەتۋ ءۇشىن دارىگەرلەرگە تابىستايدى.
ۆيكتور كوسوۆەتستىڭ ايتۋىنشا، جالپى كوبىنە سۋعا باتاتىن ەرەسەك ادامدار ەكەن.
— كەيبىر ادامدار ىشىمدىك ىشكەن سوڭ، ءوز-ءوزىن باقىلاي الماي، سۋدا باتىپ، ەسىن جوعالتىپ، كومەك تە سۇراي المايدى. سوندىقتان جاعاجايلاردى ۇنەمى باقىلاۋدا ۇستاۋعا تۋرا كەلەدى. اسىرەسە، جازعى شومىلۋ ماۋسىمىندا ءبىزدىڭ جۇمىسىمىز ەكى-ءۇش ەسەگە دەيىن كوبەيەدى. بۇل — مەنىڭ جۇمىسىم. سول سەبەپتى مەن ادامداردى قۇتقارىپ قالىپ جاتسام، ءوز جۇمىسىمدى ادال اتقارعانىم ، — دەيدى ۆيكتور.
ءوز ماماندىعىن ماقتان تۇتاتىن ۆيكتور كوسوۆەتس ەڭبەكتە عانا ەمەس، وتباسىندا دا سىيلى، جاناشىر. ول ءوزىنىڭ ىزىنەن ەرگەن ەكى بالاسى دا ابىرويلى ەڭبەك ەتىپ، ازامات بولۋىن قالايدى.
جۇمىسىنا قاشان دا ادال، ءاردايىم جاۋاپكەرشىلىكپەن قارايتىن قۇتقارۋشى 12 جىل قىزمەت وتىلىندە 3 جانە 2 دارەجەلى «قۇتقارۋشى» توسبەلگىسى جانە قر توتەنشە جاعدايلار مينيسترلىگىنىڭ ماقتاۋ قاعازىمەن ماراپاتتالعان.
بيىلعى جىلدىڭ 5 ناۋرىزىندا “بادامشا - نيكەلتاۋ” تاس جولىندا 2 جولاۋشىسى بار " ۋاز" اۆتوكولىگى قار قۇرساۋىندا تۇرىپ قالعاندىعى جونىندە ديسپەتچەرلىك قىزمەتكە حابارلاما كەلىپ تۇسەدى. اتالعان حابارلاما بويىنشا وقيعا ورنىنا ءورت ءسوندىرۋ بولىمىنەن تەحنيكا مەن جەكە قۇرامنان 3 ادام جونەلتىلەدى. شاقىرتۋ ورنىنا ۋاقىتىندا جەتكەن قۇتقارۋشىلار "ۋاز" اۆتوكولىگىنىڭ قار قۇرساۋىندا 2 جولاۋشىسىمەن بىرگە تۇرىپ قالعاندىعىن انىقتاپ، ونىڭ ىشىندە جۇكتى ايەل ادام بولعاندىعىن بىلەدى.
داناگۇل بايمۇقاش،
"ادىرنا" ۇلتتىق پورتالى.
