Öz jūmysynyŋ qiyndyǧyna qaramai, ärdaiym özgelerge qamqor bop, azamattardy qauıp-qaterden saqtap jüretın qūtqaruşylardyŋ eŋbegı qaşan da erlıkpen teŋ. Sondai qūtqaruşylardyŋ bırı — Viktor Kosoves. Ol Aqtöbe oblysynyŋ tötenşe jaǧdailar departamentı jedel qūtqaru jasaǧynda 2009 jyldan berı qyzmet etıp keledı.
Ol biyl şılde aiynda Elek özenınıŋ «Jilgorodok» jaǧajaiynda tötenşe jaǧdailar departamentı jäne polisiia qyzmetkerlerımen reidtık ıs-şara kezınde demaluşylardyŋ arasynda bır er azamattyŋ suǧa batyp bara jatqandyǧyn baiqap qalyp, ony qūtqaryp, jaǧaǧa alyp şyǧady. Alǧaşqy medisinalyq kömek körsetılgen soŋ, er adamnyŋ alkogoldık ışımdık ışkenı belgılı bolady.
Mas küide bolǧan azamatty eŋ bırınşı Viktor su jaǧasyndaǧy qamystan baiqaidy. Qūtqaruşy jetken kezde 42 jastaǧy azamattyŋ älı qūryp, suǧa batady. Viktor öz ömırın qaterge tıgıp, tereŋ sudan seskenbei, yjdaǧattylyqpen älgı adamǧa qarai süŋgıp ony arqasyna salyp jaǧaǧa alyp şyǧady. Jaǧaǧa jetken soŋ jüregıne janama massaj jasap, azamatty alǧaşqy medisinalyq kömek körsetu üşın därıgerlerge tabystaidy.Viktor Kosovestıŋ aituynşa, jalpy köbıne suǧa batatyn eresek adamdar eken. — Keibır adamdar ışımdık ışken soŋ, öz-özın baqylai almai, suda batyp, esın joǧaltyp, kömek te sūrai almaidy. Sondyqtan jaǧajailardy ünemı baqylauda ūstauǧa tura keledı. Äsırese, jazǧy şomylu mausymynda bızdıŋ jūmysymyz ekı-üş esege deiın köbeiedı. Būl — menıŋ jūmysym. Sol sebeptı men adamdardy qūtqaryp qalyp jatsam, öz jūmysymdy adal atqarǧanym , — deidı Viktor. Öz mamandyǧyn maqtan tūtatyn Viktor Kosoves eŋbekte ǧana emes, otbasynda da syily, janaşyr. Ol özınıŋ ızınen ergen ekı balasy da abyroily eŋbek etıp, azamat boluyn qalaidy.
Jūmysyna qaşan da adal, ärdaiym jauapkerşılıkpen qaraityn qūtqaruşy 12 jyl qyzmet ötılınde 3 jäne 2 därejelı «Qūtqaruşy» tösbelgısı jäne QR Tötenşe jaǧdailar ministrlıgınıŋ Maqtau qaǧazymen marapattalǧan.
Oblysta kez kelgen apatty jaǧdaida qyraǧylyq tanytyp, elge qaltqysyz qyzmet etıp jürgen mamandardyŋ bırı – azamattyq qorǧau serjanty, Aqtöbe oblysy tötenşe jaǧdailar departamentı ört söndıru jäne apattyq-qūtqaru jūmystary qyzmetınıŋ №13 mamandandyrylǧan ört söndıru bölımınıŋ ört söndıruşı-qūtqaruşysy Altynbek Esenamanov. Ol būl qyzmetke 2020 jyldyŋ qaŋtar aiynda kelgen. Qyzmet atqarǧan uaqyt aralyǧynda departament basşylyǧy Altynbektıŋ jūmysyna oŋ baǧa berıp keledı.
Biylǧy jyldyŋ 5 nauryzynda “Badamşa - Nikeltau” tas jolynda 2 jolauşysy bar " Uaz" avtokölıgı qar qūrsauynda tūryp qalǧandyǧy jönınde dispetcherlık qyzmetke habarlama kelıp tüsedı. Atalǧan habarlama boiynşa oqiǧa ornyna ört söndıru bölımınen tehnika men jeke qūramnan 3 adam jöneltıledı. Şaqyrtu ornyna uaqytynda jetken qūtqaruşylar "Uaz" avtokölıgınıŋ qar qūrsauynda 2 jolauşysymen bırge tūryp qalǧandyǧyn anyqtap, onyŋ ışınde jüktı äiel adam bolǧandyǧyn bıledı.
Jolauşylar qatty toŋǧany sonşalyq, üsık tie bastaǧan. Ony körgen Altynbek Esenamanov jolauşylarǧa ystyq şai berıp, özı qalyŋ qardy aşuǧa kırısıp ketedı. Kölıktıŋ jan-jaǧyn tazartqanymen, tüngı uaqyttaǧy bolǧan qalyŋ jauyp jatqan qardyŋ äserınen aitarlyqtai nätije bolmaidy. Arnaiy tehnikanyŋ küşımen avtokölık qar qūrsauynan şyǧarylady. A. Esenamanovtyŋ zor täjıribesı arqasynda sol tünı 17 adam qar qūrsauynan qūtqarylady. Osylaişa Altynbek öz qyzmetın ülken jauapkerşılıkpen atqaryp, jolauşylardyŋ alǧysyn alady.
Osy oqiǧadan keiın Altynbektıŋ erlıgı el auzynda jür. Öz jūmysyna berılgen, ärqaşan adamdarǧa janaşyr, qaiyrymdy jas maman bolaşaqta qyzmette ösıp, elımızdıŋ belgılı azamaty boludy armandaidy. Bız jas mamanǧa sättılık tıleimız!
Danagül BAIMŪQAŞ,
"Adyrna" ūlttyq portaly.
Ūqsas jaŋalyqtar
