باتىس قازاقستان وبلىسىنىڭ جانىبەك اۋدانىندا دالا ءورتىن ءسوندىرۋ كەزىندە توتەنشە جاعدايلار دەپارتامەنتىنىڭ قىزمەتكەرى قازا تاپتى، دەپ حابارلايدى "ادىرنا" ءتىلشىسى.
قايعىلى وقيعا 3 قىركۇيەكتە قىستاق اۋماعىندا بولعان. الەۋمەتتىك جەلىدە تاراعان اقپاراتقا سايكەس، ءورت ءسوندىرۋ جۇمىستارى كەزىندە قۇتقارۋشى ارنايى كولىكتىڭ استىندا قالعان. كولىكتى ونىڭ ارىپتەسى باسقارعان. الدىن الا مالىمەت بويىنشا، قويۋ ءتۇتىن سالدارىنان جۇرگىزۋشى قىزمەتكەردى بايقاماي قالعان.
باتىس قازاقستان وبلىسىنىڭ تجد قىزمەتكەردىڭ قازا بولعانىن راستادى. الايدا ۆەدومستۆو وقيعانىڭ ناقتى ءمان-جايىن جاريالامادى.
ء«ورتتى ءسوندىرۋ كەزىندە قىزمەتتىك مىندەتىن اتقارىپ جۇرگەن تجد قىزمەتكەرى جاراقات الدى. ول اۋرۋحاناعا جەتكىزىلگەنىمەن، دارىگەرلەردىڭ كومەگىنە قاراماستان كوز جۇمدى»، – دەلىنگەن دەپارتامەنت حابارلاماسىندا.
قازىر اتالعان دەرەك بويىنشا تەكسەرۋ جۇرگىزىلىپ، وقيعانىڭ بارلىق ءمان-جايى انىقتالىپ جاتىر.
توتەنشە جاعدايلار دەپارتامەنتى مارقۇمنىڭ وتباسىنا قاجەتتى كومەك كورسەتىلگەنىن، ونىڭ ىشىندە جەرلەۋ ءراسىمىن ۇيىمداستىرۋعا قولداۋ بىلدىرىلگەنىن حابارلادى.
