فوتو: اشىق دەرەككوز
قىرعىزستاندا پرەزيدەنت سايلاۋىنا كانديداتتاردى ۇسىنۋ مەرزىمى اياقتالدى. ورتالىق سايلاۋ جانە رەفەرەندۋم وتكىزۋ جونىندەگى كوميسسيانىڭ مالىمەتىنشە، الداعى سايلاۋعا قاتىسۋعا 11 ادام نيەت بىلدىرگەن، دەپ حابارلايدى “ادىرنا” پورتالى Kazinform اگەنتتىگىنە سىلتەپ.
پرەزيدەنتتىككە ۇمىتكەرلەر قاتارىندا قازىرگى مەملەكەت باسشىسى سادىر جاپاروۆ تا بار. سونىمەن بىرگە سايلاۋعا كاسىپكەرلەر، بۇرىنعى مەملەكەتتىك قىزمەتشىلەر مەن پارلامەنتتىڭ ەكس-دەپۋتاتتارى قاتىسۋعا ءوتىنىش بەرگەن.
كانديداتتار تىزىمىنە مىنالار ەندى:
- سادىر جاپاروۆ – قازىرگى پرەزيدەنت;
- ايمەن كاسەنوۆ – كاسىپكەر;
- ازامات ەسەنبەكوۆ – بيزنەسمەن;
- سىيمىك جاپىكەەۆ – قارجى پوليتسياسىنىڭ بۇرىنعى باسشىسى;
- اكاي كىدىروۆ – كاسىپكەر;
- يسحاك ماساليەۆ – جوگوركۋ كەنەشتىڭ بۇرىنعى دەپۋتاتى;
- باكتىبەك كالماماتوۆ – جوگوركۋ كەنەشتىڭ بۇرىنعى دەپۋتاتى;
- باكىتبەك ادىلوۆ – مەملەكەتتىك كوشى-قون قىزمەتىنىڭ بۇرىنعى توراعاسى;
- امۋر ايبا مەدەر – «بويل» جشس ديرەكتورى;
- مامبەتجۇنىس ابىلوۆ – ورتالىق سايلاۋ كوميسسياسى مەن توتەنشە جاعدايلار مينيسترلىگىنىڭ بۇرىنعى باسشىسى;
- كلارا سوورونقۇلوۆا – جوعارعى سوتتىڭ كونستيتۋتسيالىق پالاتاسىنىڭ بۇرىنعى سۋدياسى.
قازىر كانديداتتاردى قولدايتىن سايلاۋشىلاردىڭ ەلەكتروندىق قولتاڭبالارىن جيناۋ كەزەڭى ءجۇرىپ جاتىر. بۇل جۇمىس 2026 جىلعى 7 جەلتوقسانعا دەيىن جالعاسادى. زاڭ تالاپتارىنا سايكەس، ءار ۇمىتكەر پرەزيدەنتتىككە كانديدات رەتىندە تىركەلۋ ءۇشىن كەمىندە 30 مىڭ سايلاۋشىنىڭ قولىن جيناۋى قاجەت.
تىركەۋگە قاجەتتى قۇجاتتار 13 جەلتوقسانعا دەيىن قابىلدانادى. ال پرەزيدەنتتىككە كانديداتتاردى رەسمي تىركەۋ 23 جەلتوقسانعا دەيىن اياقتالۋى ءتيىس.
ەسكە سالايىق، قىرعىزستاندا پرەزيدەنت سايلاۋى 2027 جىلعى 27 قاڭتارعا بەلگىلەنگەن. بۇعان دەيىن العاشقى ۇمىتكەر 14 قازاندا ءوتىنىش تاپسىرعان. سونداي-اق سايلاۋ ناۋقانىن وتكىزۋگە 1,2 ميلليارد سوم (شامامەن 6,06 ميلليارد تەڭگە) جۇمساۋ جوسپارلانىپ وتىر.
