(سيپاتى بولەك سوزدىك)
«سوزتۇزەر» دەپ اتالاتىن جاڭا سوزدىك ساپقا قوسىلدى. تۇرقى دا، تۇرپاتى دا بولەك. ءمان-ماعىناسى دا ەرەكشە. الدىمەن بۇقارالىق اقپارات قۇرالدارىنداعى قاتە قولدانىلعان سوزدەر مەن تىركەستەر جيناقتالعان. سودان سوڭ سونىڭ ءبارى سوزدىكتىڭ تالاپتارىنا بەيىمدەلىپ، عىلىمي تۇرعىدان جۇيەلەنىپ، قايتا تۇزىلگەن. قاتە قولدانىستىڭ سەبەپتەرى سارالانىپ، بولدىرماۋ جولدارى كورسەتىلىپ، دۇرىس نۇسقاسى ۇسىنىلعان.
مەملەكەت باسشىسى قاسىم-جومارت توقاەۆ وسى كىتاپقا جازعان العى سوزىندە «ءتىل تازالىعىن ساقتاۋ ىسىندە بۇقارالىق اقپارات قۇرالدارى ەرەكشە ءرول اتقارادى. جۇرتتىڭ ءبارى مامان ەمەس. جۋرناليستەر ءسوزدى نەمەسە تەرميندى قالاي قولدانسا، كوپشىلىك سولاي بولۋى كەرەك دەپ قابىلدايتىنى راس. سوندىقتان مەديا سالاسى قىزمەتكەرلەرىنىڭ ءسوز ونەرىن جەتىك مەڭگەرۋى اسا ماڭىزدى» دەپ اتاپ كورسەتكەندەي، تىلدىك قورىن بايىتۋعا تىرىسقان بارشا جۇرتتىڭ باق-قا قاراپ بوي تۇزەيتىنى بەلگىلى.
وكىنىشكە قاراي، بۇقارالىق اقپارات قۇرالدارىنىڭ ءسوز قولدانىستارىندا كۇن سايىن قاتەنىڭ جەتى اتاسى كەتىپ جاتادى. ونىڭ سەبەپتەرى كوپ... بۇل - «ماناس» جىرى سەكىلدى تاۋسىلمايتىن تاقىرىپ. قازىر سەبەپ ىزدەۋگە ەمەس، ءسوزدى تۇزەۋگە ۇمتىلاتىن كەزەڭ. ولاي بولسا، پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆتىڭ يدەياسى بويىنشا جارىق كورگەن وسىناۋ سوزدىكتى كۇندەلىكتى جۇمىس بارىسىندا ۇنەمى پايدالانىپ وتىرعان ءجون. بۇل سوزدىك جۋرناليستەردىڭ ءتىلىن بىرەر كۇندە ارتىق-اۋىس كەمشىلىكتەن ارىلتىپ، بىردەن جاڭا ارناعا سالىپ جىبەرەدى دەۋدەن اۋلاقپىز. بىراق ۇسىنىلىپ وتىرعان ەڭبەك جۇيەلى قولدانىلعان جاعدايدا بىرتە-بىرتە قاتە تىركەستەرگە قارسى بەلگىلى ءبىر يممۋنيتەت قالىپتاستىراتىنىنا داۋ جوق. پرەزيدەنت ايتقان «ساۋاتتى جازىپ، دۇرىس سويلەي بىلەتىن حالىقتىڭ ءتىلى عۇمىرلى بولادى» دەگەن تۇجىرىم بۇقارالىق اقپارات قۇرالدارىنىڭ الدىنا جاڭا مىندەت جۇكتەيدى.
سوزتىزەر عالىمدار «سوزتۇزەر» دەپ اتاعان جاڭا كىتاپ بار-جوعى ءتورت-بەس ايدىڭ ىشىندە ازىرلەنىپ، جارىق كورگەن. جالپى، اكادەميالىق ۇلگىدەگى ساپالى سوزدىك ازىرلەۋ ءۇشىن بۇل مەرزىم جەتكىلىكسىزدەۋ. سوعان قاراماستان، بۇرىن تۇرەن تۇسپەگەن بۇل سالادا ەلەۋلى قادام جاسالدى.
سوزدىكتىڭ عىلىمي-پراكتيكالىق جانە تانىمدىق-تاعىلىمدىق دەڭگەيى كۇمان تۋدىرمايدى. جاۋاپتى رەداكتورى - بەلگىلى عالىم، سوزدىك جاساۋ سالاسىنىڭ مايتالمانى، مەملەكەتتىك سىيلىقتىڭ لاۋرەاتى، فيلولوگيا عىلىمدارىنىڭ دوكتورى، پروفەسسور بايىنقول قاليۇلى. ال جوبا جەتەكشىسى، قر ۇعا اكادەميگى، پروفەسسور شەرۋباي قۇرمانبايۇلى باستاعان شىعارماشىلىق توپتا جانتاس جاقىپوۆ، ورىناي جۇباەۆا، تىنىشتىق ەرمەكوۆا، بوتاگوز سۇيەرقۇل، قالامقاس قالىباەۆا (رەتسەنزەنت) سياقتى فيلولوگيا عىلىمدارىنىڭ دوكتورلارى، ۇلتتىق يممۋنيتەتى جوعارى باسپاگەر-رەداكتورلار نازگۇل قوجابەك پەن ارمان المەنبەت بار. پىكىر بەرۋشىلەر قاتارىندا بىرقاتار بۇقارالىق اقپارات قۇرالىنىڭ كورىگىندە شىڭدالعان، ءتىپتى ءبىرازىنىڭ تىزگىنىن ۇستاعان، جوعارى وقۋ ورنىندا جۋرناليستەردىڭ بىرنەشە بۋىنىن تاربيەلەگەن ۇستاز، قر ۇعا كوررەسپوندەنت-مۇشەسى، پروفەسسور امانتاي ءشارىپتىڭ بولۋى ساليقالى سوزدىكتىڭ سالماعىن ارتتىرا تۇسكەندەي.
ىلگەرىدە باق-تىڭ ءسوزىن حاقتىڭ سوزىندەي كورگەن ەل-جۇرتىمىز ءالى دە اينالاداعى قۇبىلىستاردى جۋرناليستەردىڭ وي-پىكىرى، ءتىل-تانىمى ارقىلى باعالايدى.
ەندەشە، كەشە عانا ءسوز الەمىنە ەنگەن «سوزتۇزەردىڭ» ورنى بولەك ەكەنى انىق.
باۋىرجان ومارۇلى
