مەكتەپتە حيدجاب كيۋگە قاتىستى داۋدىڭ شەشىمى تابىلعان سىڭايلى. ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ بۇگىن ارنايى جەكە مەكتەپتەر اشۋ كەرەك دەدى. ياعني، ەر بالالار مەن قىزداردى ءبولىپ وقىتۋعا مۇمكىندىك بەرىلمەك. الايدا، كەيبىر دەپۋتاتتار «زاڭ بارىنە ورتاق» دەپ وتىر.
اقتوبەگە ارنايى بارعان دەپۋتاتتارعا اتا-انالار وسىلاي ارىزدارىن ايتقان بولاتىن. ءبارى دە مەكتەپتە حيدجاب كيگىزبەيتىنىنە نارازى. ماجىلىسمەن باقىتبەك سماعۇل وقۋ ورنىنىڭ تالاپتارىن ورىنداۋ كەرەك دەپ تۇسىندىرمەك بولعانىمەن، اتا-انالاردىڭ دەنى كەلىسپەگەن. ءتىپتى، بىرنەشەۋى سول جيىننان شىققاننان كەيىن مەكتەپ الدىندا ناماز وقىعان بولاتىن.
باقىتبەك سماعۇل، قر پارلامەنتى ءماجىلىسىنىڭ دەپۋتاتى:
— مەشىت بار، سول ءۇشىن سالىنعان اللانىڭ ءۇيى بار. نامازعا ەشكىم شەك قويىپ جاتقان جوق، ورازاعا ەشكىم شەك قويىپ جاتقان جوق. سەن ساناڭمەن جيھاد جاسا. ساناڭمەن كۇرەس. بالالاردى اداستىرما!
بىراق، دەپۋتات ول قانداي جيھاد ەكەنىن ناقتىلامادى. ال، قوعامدا قىزۋ تالقىعا تۇسكەن 4 كەلىنشەكتىڭ كىمدەر ەكەندىگى كوپ ۇزاماي انىقتالىپتى. ولاردىڭ بۇل ارەكەتى زاڭعا قايشى جانە ول ءۇشىن 50 مىڭ تەڭگەگە دەيىن ايىپپۇل قاراستىرىلادى ەكەن.
سونداي-اق، اقتوبەدەگى جيىندا اتا-انالار ءوز قىزدارىنا جەكە مەدرەسە اشىپ بەرۋدى سۇراعان-دى. بۇل ۇسىنىستى ءدىن ىستەرى مينيسترلىگى قاراستىرىپ جاتقان كورىنەدى.
نۇرلان ەرمەكباەۆ، قر ءدىن ىستەرى جانە ازاماتتىق قوعام ءمينيسترى:
— ەگەر سونداي اتا-انالار بولسا، قىزدارىن تەك ورامال تاعىپ، حيدجاب كيگىزىپ مەكتەپكە جىبەرەتىن بولسا، ولار وزدەرى جينالىپ، دەمەۋشىلەردى ىزدەپ، ونداي جەكە مەكتەپ اشۋعا بارلىق جاعداي بار. قۇقىقتارى دا بار.
ياعني، ەر بالالاردان بولەك وقىتاتىن جەكە مەكتەپ اشىپ، سول جەردە ورامالسىز جۇرۋگە جاعداي جاساۋ كوزدەلىپ وتىر. بۇل - ءدىني ءبىلىم بەرەتىن ورىن ەمەس، زاڭعا سايكەس زايىرلى وقۋ ورداسى بولماق. بىراق، ونى مەملەكەت ەمەس، اتا-انالار وزدەرى سالىپ الۋلارى كەرەك.
مينيسترلەر جەكە مەكتەپكە رۇقسات بار دەپ الەك بولىپ جاتقاندا اقتوبەدە ورامال تاققان وقۋشىلاردىڭ سانى ازايىپ كەلەدى ەكەن.
ەربول نۇرعاليەۆ، اقتوبە وبلىسى اكىمىنىڭ ورىنباسارى:
— ءبىز مىنە وسى 1 اپتانىڭ ىشىندە 75 بالا مەكتەپ فورماسىن ساقتاۋعا كوشتى. 75 بالا. ەندى 269 بالا قالىپ وتىر.
ارينە، ءدال وسىنداي حيدجاب ماسەلەسى بىرنەشە وبلىسقا ءتان. الايدا، بالاسىنا مەكتەپ فورماسىن كيگىزگىسى كەلمەيتىن اتا-انانىڭ سانى بويىنشا ءبارىبىر اقتوبە وبلىسى الدا تۇر. استاناعا ەسەپ بەرۋگە كەلگەن كەزىندە ايماق باسشىسى بەردىبەك ساپارباەۆ «ماسەلە وڭ شەشىمىن تاپپاسا ءوزىم ارالاسامىن» دەگەن بولاتىن. بىراق، جاعداي قانشا ۋشىقسا دا، ساپارباەۆ مىرزا سول كۇيى ارالاسپادى.
باقىتنۇر ءالىباي، نۇركەن توقمۋرزين
informburo.31.kz
ۇقساس جاڭالىقتار
