مەملەكەتتىك جانە جەكە مەنشىك مەكتەپتە حيدجاب كيۋ زاڭعا قايشى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ مالىمدەدى، دەپ حابارلايدى "ادىرنا" ۇلتتىق پورتالى، "Qasqa jol" يۋتۋب كانالىنا سىلتەمە جاساپ.
- ەندى، بىزدە زايىرلى مەملەكەت قوي. جالپى زايىرلى مەملەكەت بولعاننان كەيىن ءدىني ماسەلە، باسقا ماسەلە دەپ بولە المايمىز. مەكتەپتىڭ قابىلداعان ءتيىستى تالاپتارى بار. ءبىلىم ءمينيسترىنىڭ 2016 جىلعى 26-بۇيرىعى شەڭبەرىندە جۇمىس ىستەۋىمىز كەرەك، - دەدى ا.ايماعامبەتوۆ.
مينيستر كونستيتۋتسيادا قازاقستاننىڭ زايىرلى مەملەكەت ەكەنىن ەسكە سالدى. ال مەكتەپكە باراتىنداردىڭ بارلىعى مىندەتتى تۇردە ءبىلىم جانە عىلىم ءمينيسترىنىڭ بۇيرىعىن، ء"دىني قىزمەت جانە ءدىني بىرلەستىكتەر تۋرالى" زاڭ مەن كونستيتۋتسيانى ورىنداۋى ءتيىس ەكەنىن ايتتى.
- ماسەلە ءدىني دە ەمەس، باسقا دا ەمەس. مەيلى قىسقا يۋبكا بولسىن، الدە باسقا ءبىر ءبىزدىڭ فورماعا سايكەس كەلمەيتىن اتريبۋتتار بولسىن، مەكتەپكە بالالاردى ونداي كيىممەن كەلۋىنە رۇقسات ەتىلمەيدى.
- سوندىقتان، بۇل ماسەلەنى تەك قانا سول ءدىن جاققا، الدە باسقا جاققا كەلتىرۋ دۇرىس ەمەس دەپ ويلايمىن. ويتكەنى، جالپى مەكتەپ فورماسىنان باسقا كيىممەن كەلۋدىڭ ءوزى تارتىپكە قايشى كەلەدى،- دەپ مالىمدەدى مينيستر.
ءسوز سوڭىندا قر ءبىلىم جانە عىلىم ءمينيسترى تالاپ بارلىعىنا بىردەي ەكەندىگىنە توقتالدى. مەكتەپ فورماسىنا قويىلاتىن تالاپتار بار، مەملەكەتتىك ستاندارت بار، ءبىزدىڭ ەلدىڭ جەكە مەنشىك مەكتەپتەرى بولسىن، مەملەكەتتىك مەكتەپتەرى بولسىن وسى مەملەكەت تالاپتارىن جانە جالپى العاندا ەلىمىزدىڭ بارلىق زاڭدارىن ورىنداۋى ءتيىس ەكەندىگىن اتاپ ءوتتى.
"ادىرنا" ۇلتتىق پورتالى
