قر ءبىلىم ءمينيسترى پاۆلودار وبلىسىندا جاڭا مەكتەپتىڭ اشىلۋ سالتاناتىنا قاتىستى، دەپ حابارلايدى “ادىرنا” ءتىلشىسى وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
باياناۋىل اۋدانى، قاراجار اۋىلىندا جاڭا مەكتەپ پايدالانۋعا بەرىلدى.
ءبىلىم ورداسىنىڭ اشىلۋ سالتاناتىنا قازاقستان رەسپۋبليكاسىنىڭ ءبىلىم ءمينيسترى عاني بەيسەمباەۆ، پاۆلودار وبلىسىنىڭ اكىمى اساين بايحانوۆ، اۋىل تۇرعىندارى مەن وقۋشىلار قاتىستى.
ءبىلىم ءمينيسترى عاني بەيسەمباەۆ مەملەكەت تاراپىنان مۇعالىمدەردىڭ مارتەبەسىن كوتەرۋ، ينفراقۇرىلىمدى دامىتۋ، جايلى جانە قاۋىپسىز مەكتەپتەر بويىنشا بارلىق مىندەتتەمەلەر ورىندالىپ جاتقانىن اتاپ ءوتتى.
“تەك 1 قازانعا دەيىن رەسپۋبليكا بويىنشا 78 مىڭ 500 ورىندىق 77 جاڭا مەكتەپ اشىلدى. بۇل كورسەتكىشتى 132 مىڭ جاڭا وقۋ ورىنعا دەيىن جەتكىزۋدى جوسپارلاپ وتىرمىز، بۇل 12 اپاتتى جانە 29 ءۇش اۋىسىمدىق مەكتەپتىڭ ماسەلەلەرىن، سونداي-اق 113 ەلدى مەكەندەگى وقۋشىلار ورنىنىڭ تاپشىلىعىن شەشەدى. «جايلى مەكتەپ» ۇلتتىق جوباسى اياسىندا الداعى ءۇش جىلدا 740 مىڭ ورىندىق 369 مەكتەپتىڭ قۇرىلىسىن باستاۋ جوسپارلانۋدا. بۇل ماسەلەنى شەشۋدە بيزنەس وكىلدەرى دە قالىس قالماعانى قۋانتادى»، - دەدى ەلىمىزدىڭ باس ۇستازى بەيسەمباەۆ.
اشىلۋ سالتاناتى وتكەن بۇل عيمارات 1958 جىلى سالىنعان توزىعى جەتكەن توعىز جىلدىق مەكتەپتىڭ ورنىنا سالىنعان ەكەن.
ول 100 ورىنعا ەسەپتەلگەن مەكتەپتىڭ قۇنى 650 ميلليون تەڭگە.
ەكى قاباتتى عيماراتتا اسحانا، كونفەرەنتس-زال، IT سىنىبى سىندى 11 وقۋ كابينەتى بار.
بۇگىندە قاراجار ورتا مەكتەبىندە قازىر 72 بالا ءبىلىم الۋدا.
