مەملەكەت باسشىسى قازاقستان حالقىنا كەزەكتى جولداۋىنا بەس ناقتى باستامانى اتاپ ءوتتى. ولاردى ىسكە اسىرۋ حالىقتىڭ ءال-اۋقاتىن جاقسارتۋعا مۇمكىندىك بەرەدى. مۇنداي پىكىردى ۇلتتىق قوعامدىق سەنىم كەڭەسىنىڭ مۇشەسى ءلاززات قوجاحمەتوۆا ءبىلدىردى، دەپ "ادىرنا" پورتالى قازاقپاراتقا سىلتەپ حابارلايدى.
«قاسىم – جومارت توقاەۆ قازاقستان حالقىنا ءۇشىنشى جولداۋىن ارنادى. جولداۋدا ەكونوميكا مەن مەملەكەتتىك سەكتوردى تسيفرلاندىرۋ پروتسەسىن قايتا جۇكتەۋ مىندەتتەرى قويىلدى. دەنساۋلىق ساقتاۋ مەن بىلىمگە ەرەكشە كوڭىل ءبولىندى. پرەزيدەنت 5 ناقتى باستامانى اتاپ ءوتتى. ولاردى ىسكە اسىرۋ حالىقتىڭ ءال-اۋقاتىن جاقسارتۋعا مۇمكىندىك بەرەدى»،- دەيدى ءلاززات قوجاحمەتوۆا . ونىڭ ويىنشا، ەڭ تومەنگى جالاقىنى كوتەرۋ تۇرمىسى تومەن توپتىڭ ءال-اۋقاتىنا وڭ اسەر ەتەدى.
«ءتورت جىل ىشىندە ازاماتتىق قىزمەتشىلەردىڭ ەڭبەكاقىسىن 20 پايىزعا ارتتىرۋ 600 مىڭ قازاقستاندىققا قاتىستى بولادى. زەينەتاقى جيناعىنىڭ ءبىر بولىگىن «وتباسى بانكى» شوتىنا اۋدارۋ تۇرعىن ءۇي ساتىپ الۋ ءىسىن وڭتايلاندىرادى. سونداي-اق ەڭ تومەنگى جالاقىنى كوتەرۋ تۇرمىسى تومەن توپتىڭ ءال-اۋقاتىنا وڭ اسەر ەتەدى. بۇل وتە جاقسى»،- دەيدى ۇلتتىق قوعامدىق سەنىم كەڭەسىنىڭ مۇشەسى. سونىمەن قاتار، ول پرەزيدەنت ساياسي رەفورمالاردىڭ ءتورتىنشى پاكەتىن ۇسىنعانىن اتاپ ءوتتى. «بۇرىن تەك پارتيالىق تىزىمدەرگە قاتىستى قولدانىلاتىن دەپۋتاتتىق مانداتتاردى بولگەندە ايەلدەر مەن جاستار ءۇشىن 30 پايىزدىق كۆوتانى زاڭنامالىق تۇرعىدان بەكىتۋ مىندەتى قويىلعان. بۇگىن مەملەكەت باسشىسى كۆوتاعا مۇمكىندىگى شەكتەۋلى ادامداردى ەنگىزۋدى ۇسىندى. بۇل ۇلكەن قادام دەپ ويلايمىن. سونىمەن قاتار، پرەزيدەنت بالالارعا قارسى جىنىستىق قىلمىستاردىڭ جولىن كەسۋگە، قارسى ءىس-قيمىل جاساۋعا نازار اۋدارۋدى تاپسىردى»،- دەيدى ول.
"ادىرنا" ۇلتتىق پورتالى
