سالتانات تۇرسىنبەكوۆا: "بالاعا اليمەنت تولەمەۋ – كۇن سايىن ۇلعايىپ بارا جاتقان كۇردەلى ماسەلە!"

1672
Adyrna.kz Telegram

قر پرەزيدەنتتىگىنە كانديدات سالتانات تۇرسىنبەكوۆا اقتاۋدا جالعىزباستى انالارمەن كەزدەسۋ وتكىزىپ، اليمەنت ماسەلەسىن تالقىلادى. بۇل تۋرالى "ادىرنا" ۇلتتىق پورتالى حابارلايدى. 

"بۇگىن مەن باتىس وڭىرىندە – اقتاۋ قالاسىندامىن! مەنى اسىعا كۇتكەن جالعىزباستى انالارمەن كەزدەسۋىم ءوتتى. ءبىز قوعامداعى شەشىمىن تاپپاي جۇرگەن – اليمەنت ماسەلەسىن تالقىلادىق. دالىرەك ايتسام، ولار اليمەنت تولەۋدەن جالتارىپ جۇرگەن ازاماتتاردىڭ ماسەلەسىن كوتەردى. كەزدەسۋگە بالاسى بار ءبىر ايەل قاتىستى. ول كۇيەۋىنىڭ كوپتەن بەرى اليمەنت تولەۋدەن قاشىپ جۇرگەنىن، ەندى بالانى مويىنداماي، دنك ساراپتاماسىن تالاپ ەتەتىن جاعدايعا جەتكەنىن ايتتى. دەمەك، الگى ايەلدىڭ بۇرىنعى جارى ءوز بالاسىن اسىراعىسى كەلمەيدى. بالاعا اليمەنت تولەمەۋ – كۇن سايىن ۇلعايىپ بارا جاتقان كۇردەلى ماسەلە. جالعىزباستى انالار بالاسى ءۇشىن اليمەنتتى سۇراپ الماۋى كەرەك، بۇرىنعى كۇيەۋى مەن بىرگە تۇراتىن ادامدارىنىڭ ارتىنان جۇگىرمەۋى ءتيىس. بالالارىن باعىپ-قاعىپ وسىرەدى، ولارعا ءبىلىم، لايىقتى تاربيە بەرەدى", - دەيدى سالتانات تۇرسىنبەكوۆا.

ونىڭ ايتۋىنشا، بۇل ايەلدەر بارلىق جاۋاپكەرشىلىك جۇگىن تەك ءبىر ءوزى كوتەرمەۋى قاجەت.

"مەن ىشكى ىستەر مينيسترلىگى مالىمدەگەن بىرنەشە تسيفردى مىسالعا كەلتىرە الامىن. 2021 جىلى قازاقستان رەسپۋبليكاسى قىلمىستىق كودەكسىنىڭ 139-بابى بويىنشا اليمەنت تولەمەگەنى ءۇشىن 300-گە جۋىق بورىشكەر قىلمىستىق جاۋاپكەرشىلىككە تارتىلسا، ونىڭ تەك جارتىسى عانا ناقتى مەرزىمدەرىن العان. تاعى 6 مىڭعا جۋىق بورىشكەر اكىمشىلىك جاۋاپكەرشىلىككە تارتىلدى. بۇل رەتتە قارىزدىڭ جالپى سوماسى جۇزدەگەن ميلليارد تەڭگەنى قۇراسا، سوت ورىنداۋشىلار مىڭداعان ىستەردى جۇرگىزىپ جاتىر. بورىشكەرلەردىڭ كوپشىلىگى ادىلدىكتەن جانە بۇرىنعى ايەلدەرىنەن ەش جازاسىز قاشىپ كەتۋدى كوزدەيدى. اليمەنت ءوندىرىپ الۋدىڭ نەگىزگى ماسەلەلەرىنىڭ ءبىرى – بورىشكەردىڭ كىرىسىن انىقتاۋدىڭ ءتيىمدى ادىستەرىنىڭ جوقتىعى. ەگەر بورىشكەردە جۇمىس بولماسا جانە جۇمىس ىزدەۋگە تىرىسپاسا، وندا اليمەنتتىك قارىز ورتاشا رەسپۋبليكالىق جالاقىعا سۇيەنە وتىرىپ ايقىندالادى. سوت ورىنداۋشىلارى مۇلىك تۋرالى اقپاراتتى تەك اشىق كوزدەردەن الادى. ءتىپتى ەگەر ادام قىمبات كولىك ءمىنىپ، شەتەلگە ساياحاتتاسا دا، بىراق ونىڭ رەسمي كىرىسى جاسىرىن بولسا، وعان اليمەنت تولەتۋ مۇمكىن ەمەس", - دەيدى پرەزيدەنتىككە ۇمىتكەر.

سونىمەن قاتار، ءتورت ساندىق ايىپپۇلدار نەمەسە ەكى جىلعا دەيىن قاماۋعا الۋمەن قورقىتۋ ولاردىڭ اليمەنت بويىنشا مىندەتتەمەلەرىن ورىنداۋىنا ءىس جۇزىندە اسەر ەتپەيدى.

"سەبەبى، اليمەنت تولەمەيتىن ازاماتقا قاتىستى قىلمىستىق ءىس قوزعالعان كەزدە ول ازداعان سومانى، ايتالىق، بىرنەشە مىڭ تەڭگە تولەپ، جاۋاپكەرشىلىكتەن جالتارۋى مۇمكىن. وسىنىڭ بارلىعىن نەگىزگە الا وتىرىپ، تۇراقتى اليمەنت تولەمەيتىندەردى جاۋاپقا تارتۋدىڭ قازىرگى مەحانيزمى ءتيىمسىز ەكەنىن مويىنداۋ كەرەك. نەلىكتەن جاعداي وزگەرمەيدى؟ مەنىڭ ويىمشا، ۇزاق ۋاقىت بويى وتباسىنداعى زورلىق-زومبىلىق سياقتى، بۇل دا ەكىنشى كەزەكتەگى ماسەلە بولىپ سانالادى. ال مەن ونى ءىرىڭى جارىلايىن دەپ تۇرعان جاراعا تەڭەر ەدىم. مەنىڭ ويىمشا، ءبىز قوعامىمىزدىڭ نازارىن وسى ايەلدەرگە بۇرۋىمىز كەرەك. مەن كوپتەن بەرى تولىق ەمەس وتباسىن قولداۋ تاقىرىبىن كوتەرىپ كەلەمىن. ونىڭ ىشىندە اليمەنت جانە باسقا دا رەفورمالار بار. ءوزىمنىڭ سايلاۋالدى باعدارلامامنىڭ شەڭبەرىندە تولىق ەمەس وتباسىلاردىڭ مارتەبەسىن زاڭنامالىق تۇرعىدان بەكىتۋدى جانە ناقتى وتباسىنىڭ قيىن جاعدايىن ەسكەرە وتىرىپ، تۇرعىن ءۇيدى دۇرىس ءبولۋ مەحانيزمىن ازىرلەۋدى ۇسىنامىن.
جالعىزباستى انالارعا دۇرىستاپ كوڭىل ءبولۋ كەرەك دەپ ويلايمىن. ايەلدەر قيىندىققا ۇزاق ۋاقىت شىداي الادى، بىراق ءومىر بويى ەمەس", - دەيدى پرەزيدەنتىككە كانديدات سالتانات تۇرسىنبەكوۆا.

"ادىرنا" ۇلتتىق پورتالى 

پىكىرلەر