بيىل العاش رەت ەلىمىزدىڭ ءاربىر مۇعالىمى جىلدىڭ باس پەداگوگيكالىق كەڭەسىنە قوسىلۋعا مۇمكىندىك الىپ وتىر. بۇگىندە NIS-ءتىڭ ورتالىق كەڭسەسىندە تىكەلەي ەفير ارقىلى اۋقىمدى كونفەرەنتسيانىڭ پاندىك سەسسيالارى ەل اۋماعىنا تارالاتىن ەكى تەلەستۋديا ۇزدىكسىز جۇمىس ىستەۋدە. مۇعالىم تاجىريبەسىن ادىستەمەلىك قولداۋ – جاڭا جاعدايداعى ءبىلىم بەرۋ تۋرالى كاسىبي ويتالقىنىڭ وزەگى.
9-17 تامىز ارالىعىندا وتەتىن ءداستۇرلى تامىز كونفەرەنتسياسى اياسىندا قازاق جانە ورىس تىلدەرىندە ون بەس ءپان بويىنشا تاقىرىپتىق سەسسيالار، سونداي-اق كىتاپحاناشىلار سەسسياسى جوسپارلانعان. «نازارباەۆ زياتكەرلىك مەكتەپتەرى» دببۇ، جەتەكشى جانە پيلوتتىق مەكتەپتەردىڭ پەداگوگتەرى ونلاين فورماتتا ۆەبينارلار، شەبەرلىك ساباقتار مەن پرەزەنتاتسيالار وتكىزەدى، حالىقارالىق ساراپشىلاردىڭ ەكسپەرتتىك پىكىرلەرى ۇسىنىلادى، سونداي-اق ى. التىنسارين اتىنداعى ۇلتتىق ءبىلىم اكادەمياسى جاڭا وقۋ جىلىندا وقۋ-تاربيە ۇدەرىسىن ۇيىمداستىرۋعا قاتىستى ۇسىنىستارىن بىلدىرەدى. قازىرگى تاڭدا پەداگوگتەر ءۇشىن ەڭ وزەكتى باسىمدىقتاردىڭ ءبىرى – ءپان اياسىندا فۋنكتسيونالدىق ساۋاتتىلىقتى قالىپتاستىرۋ، سونداي-اق اعىمداعى جانە قورىتىندى باعالاۋدىڭ فورماتى مەن مازمۇنى.
ونلاين-كەڭەستىڭ العاشقى كۇنى ەلىمىزدىڭ ءار وڭىرىنەن ونداعان مىڭ پەداگوگ جينالدى. پاندىك سەسسيالار باستاۋىش سىنىپ مۇعالىمدەرى مەن «جاراتىلىستانۋ» پانىنە ارنالدى. تىكەلەي ەفير ەىدۇ-نىڭ «ءبىلىم بەرۋ 2030» كومپاسىن تاماشالاۋدان باستالىپ، مەكتەپ تابالدىرىعىن ەندى عانا اتتاماق ايزەرە قايراتبەك پەن سامينا سەيتبەكوۆانىڭ سۇراق-جاۋاپ سۇحباتىمەن جالعاسىن تاپتى. ولار NIS تەلەستۋدياسىنا وزدەرىنىڭ ارمانداعان مەكتەپتەرى تۋرالى وي ءبولىسۋ ءۇشىن كەلدى. باستاۋىش سىنىپ مۇعالىمدەرىنە ارنالعان پاندىك سەسسيانىنىڭ شىمىلدىعىن بولاشاق مەكتەپ وقۋشىلارى ءتۇردى. ايزەرە مەن سامينا جاڭا ومىرگە جەتەلەۋشى بولاشاق ۇستازدارىنىڭ قانداي بولاتىنىن ەلەستەتىپ، بالا ارماندارىمەن ءبولىستى.
ساراپشىلار جاڭا وقۋ جىلىنا ارنالعان مىندەتتەردى، اعىمدىق جانە قورىتىندى باعالاۋدىڭ فورماتى مەن مازمۇنىن، وقۋشىلاردىڭ فۋنكتسيونالدىق ساۋاتتىلىعىن قالىپتاستىرۋدى تالدادى، ال زياتكەرلىك جانە جالپى ءبىلىم بەرەتىن مەكتەپتەردىڭ مۇعالىمدەرى شەبەرلىك سىنىپتارىن دايىندادى. سپيكەرلەر اراسىندا پەداگوگيكالىق شەبەرلىك ورتالىعىنىڭ وكىلدەرى: باستاۋىش مەكتەپ پاندەرى بويىنشا وقۋ باعدارلامالارىن جاساۋشى، مەكتەپكە دەيىنگى جانە باستاۋىش ءبىلىم بەرۋ ءبولىمىنىڭ باستىعى قالامقاس بايتەنوۆا، اعا مەنەدجەرلەر ناتاليا ورەحوۆا مەن گۇلميرا جاقىپوۆا، سونداي-اق ىبىراي التىنسارين اتىنداعى ۇلتتىق ءبىلىم اكادەمياسىنىڭ جمب جانە STEM-تەحنولوگيالار پاندەرى زەرتحاناسىنىڭ باس عىلىمي قىزمەتكەرى وردەنبەك مازباەۆ، پاۆلودار قالاسىنداعى NIS-ءتىڭ ونەر مۇعالىمى دينارا قابيەۆا جانە باسقالارى بولدى.
ونلاين-كونفەرەنتسياعا الماتى وبلىسى تەكەلى قالاسىنان قوسىلعان №8 ورتا مەكتەپتىڭ باستاۋىش سىنىپ مۇعالىمى گۇلنار مۇسابەكوۆا پاندىك سەسسيا بارىسىندا ودان ءارى جۇمىس ىستەۋ ءۇشىن كوپتەگەن جاڭا ءبىلىم مەن يدەيالاردىڭ تۇسباعدارىن تاپقانىن ايتادى:
كارانتيندىك شەكتەۋلەردەن تۋىنداعان قيىندىقتارعا قاراماستان ۇلگەرىم دەڭگەيىن ءتيىستى دارەجەدە ۇستاپ تۇرۋ مۇمكىندىگىنە يە بولدىق . باستاۋىش سىنىپ مۇعالىمدەرىنە ارنالعان كونفەرەنتسيا الداعى وقۋ جىلىندا ادەتتەگى وقىتۋ فورماتىنا ورالۋعا دايىندالۋعا ءوز سەپتىگىن تيگىزەرى انىق، – دەپ پىكىر ءبىلدىردى گۇلنار مۇسابەكوۆا.
قاراتال اۋدانى قوشقارباەۆ اتىنداعى ورتا مەكتەپتىڭ جاراتىلىستانۋ ءپانى مۇعالىمى اليشەر سوۆەتباەۆ NIS-كە كونفەرەنتسيانىڭ مازمۇندى ادىستەمەلىك ءبولىمى ءۇشىن العىسىن ءبىلدىرىپ، وقىتۋداعى ولقىلىقتاردىڭ ورنىن تولتىرۋ بويىنشا ساراپشىلار كەڭەسى بارلىق مۇمكىن قيىندىقتاردى ەڭسەرۋگە جانە وقۋ پروتسەسىن قالىپتى رەجيمدە سەنىمدى تۇردە جالعاستىرۋعا كومەكتەسەتىنىن ايتتى.
پاندىك سەسسيالاردىڭ ەكىنشى كۇنىنىڭ باستى نازارىندا – مۋزىكا، كوركەم ەڭبەك جانە دەنە شىنىقتىرۋ مۇعالىمدەرى بولدى.
ساراپشىلار مۋزىكالىق، تسيفرلىق جانە اقپاراتتىق ساۋاتتىلىقتىڭ بىرەگەي قوسىندىسى تۋرالى وي قوزعاپ، ساۋاتتىلىقتى دۇرىس دامىتا وتىرىپ، مۋزىكانى تىڭداۋ جانە ورىنداۋ ۇلتتىق جانە الەمدىك مادەنيەتتىڭ قۇندىلىعىن تۇسىنۋگە كومەكتەسەدى دەگەن قورىتىندىعا كەلدى. كوركەم ەڭبەك ساباقتارىندا ادەمىلىك پەن نازىكتىك سەزىمى قالىپتاسادى. ونەر سالاسىنداعى ساراپشىلاردىڭ پىكىرىنشە، بالالاردىڭ شىعارماشىلىق قابىلەتتەرىن دامىتۋ مۇعالىمنىڭ شىعارماشىلىعىنا تىكەلەي بايلانىستى.
شەبەرلىك ساباقتارى بارىسىندا NIS-ءتىڭ ءپان مۇعالىمدەرى – ءاليا كايداروۆا، الميرا دانياروۆا، گاۋحار قايىرباەۆا جانە ساۋلە احمەتقاليەۆا، سونداي-اق جالپى ءبىلىم بەرەتىن مەكتەپتەردىڭ پەداگوگتەرى يۋليا بەرەزكو، زەينوللا حاسەنوۆ جانە مۇحامەتقان احمەتجانوۆ ءوز بىلىمدەرىمەن ءبولىستى.
شىمكەنتتەگى فيزيكا-ماتەماتيكا باعىتىنداعى NIS-ءتىڭ دەنە شىنىقتىرۋ ءپانىنىڭ مۇعالىمى، «ۇزدىك پەداگوگ – 2019» رەسپۋبليكالىق بايقاۋىنىڭ جەڭىمپازى ەربول تىلەۋلوۆ شەبەرلىك ساباعى بارىسىندا دەنە شىنىقتىرۋ ساباقتارىندا فۋنكتسيونالدىق ساۋاتتىلىقتى دامىتۋعا بولاتىنىن جانە قاجەت ەكەنىن كورسەتتى.
ءوز دەنەڭمەن ۇيلەسىمدى ءومىر ءسۇرۋ – دەنى ساۋ ادامنىڭ سالاۋاتتى ءومىرىنىڭ مىندەتتى كومپونەنتى. بۇل قاعيدانى قوزعالىس بەلسەندىلىگى، سالاۋاتتى ءومىر سالتى جانە قوزعالىس داعدىلارى ارقىلى سىني ويلاۋدى دامىتۋعا نەگىزدەلگەن وقۋ باعدارلاماسىنىڭ باستى باعىتى ايقىنداي تۇسەدى، – دەيدى ەربول ەرنستوۆيچ.
سەگىز مىڭنان استام دەنە شىنىقتىرۋ مۇعالىمدەرى جاڭا وقۋ جىلىندا ءوز ساباقتارىندا وسى قۇرالداردى قالاي قولدانۋ كەرەكتىگى تۋرالى كورنەكى تۇسىنىك الدى.
ەل پەداگوگتەرىنە ارنالعان تامىز كونفەرەنتسياسىنىڭ ءۇشىنشى كۇنىنىڭ فوكۋسىن – فيلولوگتارعا ارنالعان پاندىك سەسسيالار قۇرادى.
جيىرما مىڭنان استام ءپان مۇعالىمدەرى پەداگوگيكالىق قوعامداستىق ءۇشىن وزەكتى تاقىرىپتاردى تالقىلاپ، ساراپشى ارىپتەستەرىنىڭ شەبەرلىك ساباقتارىنا قاتىسۋ ءۇشىن قازاق، ورىس جانە اعىلشىن تىلدەرىنەن ونلاين كونفەرەنتسياعا قوسىلدى.
فيلولوگتار وقۋشىلاردىڭ وقۋ ساۋاتتىلىعىن دامىتۋ جوسپارلارىن تالدادى، ويتكەنى ءارتۇرلى ماتىندەردى ءتۇسىنىپ وقىپ، قويىلعان مىندەتتەردى شەشۋ ءۇشىن اقپاراتتى پايدالانۋ قابىلەتى 21 عاسىرداعى ادامنىڭ ماڭىزدى قۇزىرەتتەرىنىڭ ءبىرى بولىپ تابىلادى. قازىرگى ادامداردىڭ تاعى ءبىر ماڭىزدى شەبەرلىگى – ۇلكەن كولەمدە اقپاراتپەن جۇمىس ىستەۋ.
مەن وقۋشىلاردىڭ ساۋاتتىلىعىن دامىتۋ ادىستەرى تۋرالى سۇراقتارعا جاۋاپ الدىم. ماتىنمەن جۇمىس ىستەۋ ءۇشىن بەرىلگەن تاپسىرمالار مەن اۆتورلاردىڭ ۇسىنىستارى پايدالى بولدى. ايتا كەتۋ كەرەك، اقپارات پەن قارالعان ماتەريالدار ماعان ءوز كوزقاراستارىمدى تاعى ءبىر رەت قايتا قاراپ، ىشكى دۇربەلەڭنەن ارىلۋعا، ءوزىمدى سەنىمدى سەزىنۋگە، فۋنكتسيونالدىق ساۋاتتىلىق تۋرالى ۇزىك ءبىلىمدى جۇيەگە كەلتىرۋگە جانە ءوز تاجىريبەمدى ودان ءارى جەتىلدىرۋدىڭ جولىن كورۋگە مۇمكىندىك بەردى، – دەپ ءوز اسەرىمەن ءبولىستى قاراعاندى وبلىسى قارقارالى اۋدانى №2 ورتا مەكتەپتىڭ ورىس ءتىلى مەن ادەبيەتى ءپانىنىڭ مۇعالىمى اراي توبىقوۆا.
كەلەسى كەزەكتە ونلاين-كونفەرەنتسيانىڭ تىكەلەي ەفيرىندەگى سەسسيالار ماتەماتيكا، ينفورماتيكا، فيزيكا، حيميا، بيولوگيا، گەوگرافيا، قازاقستان تاريحى، دۇنيەجۇزى تاريحى پاندەرىنىڭ مۇعالىمدەرىنە ارنالماق. اۋقىمدى پەدكەڭەس كىتاپحاناشىلارعا ارنالعان سەكتسيامەن قورىتىندىلاناتىن بولادى.
ايتا كەتۋ كەرەك، جىلدىڭ باستى پەداگوگيكالىق جيىنى وقۋ ۇدەرىسىندە وقۋشىلاردىڭ بويىندا فۋنكتسيونالدىق ساۋاتتىلىقتى قالىپتاستىرۋ جولدارىن، مەكتەپ قاۋىمداستىعىنداعى وقۋشىلاردىڭ قاۋىپسىزدىگى مەن ءال-اۋقاتى ماسەلەلەرىن، اعىمداعى جانە قورىتىندى باعالاۋدىڭ فورماتى مەن مازمۇنىن، كوۆيدتەن كەيىنگى كەزەڭدەگى وقۋ ۇدەرىسىنىڭ ەرەكشەلىكتەرىن، ءبىلىم بەرۋ سالاسىن تسيفرلاندىرۋدىڭ ماڭىزىن، ءبىلىم بەرۋدەگى جاساندى ينتەللەكتىنىڭ مۇمكىندىكتەرى، جاڭا وقۋ جىلىندا وقۋ-تاربيە ۇدەرىسىن ۇيىمداستىرۋدىڭ ەرەكشەلىكتەرىن كاسىبي ويتالقى وزەگىنە اينالدىردى.
بيىلعى تامىز كەڭەسى ەرەكشە فورماتتا وتۋدە. ەڭ باستىسى جاڭا وقۋ جىلىنىڭ ەرەكشەلىكتەرى مەن ءار ۇستازدىڭ كوكەيىندە جۇرگەن سۇراقتارعا جاۋاپ الىندى. وقۋشىلاردىڭ قابىلەتتەرىنە قاراي جۇرگىزىلەتىن جۇمىستارعا جەكەلەي توقتالا وتىرىپ، پراكتيكالىق تۇردە كورسەتىلدى. كونفەرەنتسيا بارىسىندا وي بولىسكەن ءار مامان ءوز ءىس-تاجىريبەسىن ۇلكەن دايىندىقپەن جيناقتاي كەلىپ، ءار ۇستازدىڭ جۇرەگىنە جول تابا ءبىلدى دەپ ويلايمىن، – دەيدى الكەي مارعۇلان اتىنداعى №40 مەكتەپ-ليتسەيى ديرەكتورىنىڭ وقۋ-تاربيە ءىسى جونىندەگى ورىنباسارى جۇماگۇل ەسىل.
ەستەرىڭىزگە سالا كەتسەك، ەلىمىزدىڭ ۇستازدار قاۋىمى اسىعا كۇتكەن ءداستۇرلى تامىز كەڭەسىنىڭ سەكتسيالىق وتىرىستارى NISTamyzConf2021 Youtube ارناسىندا قازاق جانە ورىس تىلدەرىندە كۇندەلىكتى تارالۋدا. سونىمەن قاتار، «نازارباەۆ زياتكەرلىك مەكتەپتەرى» دببۇ رەسمي ينتەرنەت رەسۋرستارىندا كونفەرەنتسياعا ەلىمىزدىڭ تۇكپىر-تۇكپىرىنەن قوسىلعان پەداگوگتەردىڭ بەينە پىكىرلەرى مەن كەرى بايلانىستارى جاريالانۋدا.
