اقتاۋداعى نازارباەۆ زياتكەرلىك مەكتەبىنىڭ وقۋشىلارى ءامينا تايجانوۆا مەن سارا سايرانوۆا سانكت-پەتەربۋرگتە پروفەسسور ۆلاديمير كۋرباتوۆ اتىنداعى «حيميا: ناۋكا ي يسكۋسستۆو» اتتى XIV حالىقارالىق عىلىمي جوبالار بايقاۋىندا ءبىرىنشى ورىندى يەلەندى.
عىلىمي جوبا اۆتورلارى قاراكول كولىندەگى اققۋلاردىڭ قىرىلۋى ماسەلەسىن كوتەردى. ىزدەنىس بارىسىندا امينا مەن سارا قاراكول كولىنىڭ ورنيتوفاۋناسى مەن سۋىنىڭ حيميالىق قۇرامى، ونىڭ قونىس اۋداراتىن قۇستارعا، ونىڭ ىشىندە قىزىل كىتاپقا ەنگىزىلگەن تۇرلەرگە قولايلى سۋلى-باتپاقتى القاپ رەتىندە قالىپتاسۋى تۋرالى، سونداي-اق قۇس تۇماۋىنان 1200-گە جۋىق سىبىرلاق اققۋدىڭ ءولىمى تۋرالى مالىمەتتەرى بار مامانداردان كەڭەس الدى.
NIS وقۋشىلارىنىڭ جۇمىسىنا رەتسەنزيا دايىنداعان عالىمدار اۆتورلاردىڭ تەوريانى پراكتيكامەن شەبەر ۇشتاستىرعانىن اتاپ ءوتتى. جاس زەرتتەۋشىلەر سۋدىڭ حيميالىق قۇرامىن انىقتاۋ ءۇشىن تالداۋلار جۇرگىزدى، زەرتتەۋ بارىسىندا زاماناۋي قۇرالداردى دا، لاستاۋشى زاتتاردى تالداۋدىڭ ءداستۇرلى ادىستەرىن دە قولداندى.
اۆتورلار كول سۋىنىڭ حيميالىق قۇرامىنىڭ اققۋلار اراسىندا قۇس تۇماۋىنىڭ تارالۋىنا اسەرى تۋرالى گيپوتەزا بويىنشا دالەلدەر بازاسىن جاساقتادى، ەكسپەريمەنت ناتيجەلەرىن تالداپ، جوعارى اناليتيكالىق قابىلەتتەرىن كورسەتتى، – دەلىنگەن جوبا رەتسەنزيالارىنىڭ بىرىندە.
بايقاۋعا وقۋشىلاردى «ECOJER» قازاقستاندىق ەكولوگيالىق باستامالار قاۋىمداستىعىنىڭ ماڭعىستاۋ وڭىرىندەگى كەڭەسىنىڭ مۇشەسى، اقتاۋداعى NIS مۇعالىمى جانە مەكتەپتەگى «ەكوليدەر» كلۋبىنىڭ جەتەكشىسى باقىتگۇل جاقسىلىقوۆا، سونداي-اق «ECOJER» قازاقستاندىق ەكولوگيالىق باستامالار قاۋىمداستىعىنىڭ ماڭعىستاۋ وڭىرىندەگى كەڭەسىنىڭ مۇشەسى، ورتالىق ازيا بويىنشا رامسار ايماقتىق باستاماسىنىڭ قوعاممەن بايلانىس جونىندەگى وكىلى، باتىس قازاقستان «تابيعي ورتا» ۇەۇ وڭىرلىك قاۋىمداستىعى كەڭەسىنىڭ توراعاسى ادىلبەك قوزىباقوۆ دايىندادى.
سونىمەن قاتار «حيميا: ناۋكا ي يسكۋسستۆو» حالىقارالىق وليمپياداسىندا «پەرۆىە شاگي ۆ حيمي» نوميناتسياسىندا اقتاۋداعى زياتكەرلىك مەكتەپتىڭ وقۋشىلارى مەرەي مۋسيراليەۆا، «حيميا ي ەكولوگيا» نوميناتسياسىندا فاريزا گينۋللا مەن اياۋلىم ۇمبەتوۆا جانە ماحمۇد مۇستافاۇلى مەن ەركەبۇلان بالعابەكوۆ، «حيميا ي جيزن» نوميناتسياسىندا ارۋجان بايانگالي مەن دينارا مەدال جانە ۇلان مۇرات ءۇشىنشى ورىندى يەلەندى.
