(تويدان تىس تىلەك)
بۇل اۋلەتتەن ءبىر ەمەس، بىرنەشە عالىم شىققان. جالپى، سالقىنبايدىڭ سالقىنقاندى ۇرپاقتارى شەتىنەن ىزدەنىمپاز، قاي-قايسىسى دا ءبىر نارسەنى قولعا السا، تۇبىنە جەتپەي تىنبايدى. ماسەلەن، انار سالقىنباي – فيلولوگيا عىلىمدارىنىڭ دوكتورى، پروفەسسور، ەلىمىزدەگى تانىمال لينگۆيستەردىڭ ءبىرى. زەينوللا سالقىنباەۆ – ادەبيەتتانۋشى، فيلولوگيا عىلىمدارىنىڭ كانديداتى. ال مۇحيت (مۇحيددين) سالقىنباەۆ – بەلگىلى شىعىستانۋشى عالىم. كازگۋ-ءدىڭ تۇلەگى. اراب ءتىلىنىڭ مامانى. ادەبيەت جانە ونەر ينستيتۋتىندا اسپيرانتۋرادا وقىدى. جيىرماسىنشى عاسىرداعى قازاق-اراب ادەبي بايلانىستارىن زەرتتەپ، كانديداتتىق ديسسەرتاتسيا قورعادى.
سودان سوڭ ءوزى وقىعان ۋنيۆەرسيتەتتىڭ شىعىستانۋ فاكۋلتەتىندە بىرنەشە جىل ءدارىس بەردى. اراب ءتىلى كافەدراسىنىڭ مەڭگەرۋشىسى بولدى. عىلىمي ىزدەنىستەرىن دە جۇيەلى جالعاستىردى. ميلليونداردى تامساندىرعان «مىڭ ءبىر ءتۇننىڭ» تىلسىمىنا دەن قويدى، تامىرى تەرەڭدە جاتقان «كاليلا مەن ديمنانىڭ» باستاۋ-بۇلاعىنا ءۇڭىلدى.
قىسقاسى، قازاق ەلىندەگى شىعىستانۋ عىلىمىنىڭ ءتۇتىنى ءتۇزۋ ۇشۋىنا ەلەۋلى ۇلەس قوستى. سونىمەن قاتار بىرقاتار بۇقارالىق اقپارات قۇرالدارىندا دا مەديامەنەدجەر مۇحيتتىڭ قولتاڭباسى قالدى. قازىر مەملەكەتتىك قىزمەتتە. نەسى بار، عىلىمي وي-تۇجىرىمعا بەيىم جىگىتتەر بۇل سالاعا دا قاجەت.
* * *
بۇگىن سول مۇحيت ەڭسەلى ەلۋدىڭ قاقپاسىن قاقتى. مەرەيلى جاسىڭمەن قۇتتىقتايمىز! اماندىق تىلەيمىز! جارىق دۇنيەدەگى جولىڭدى جالعاعان جارتى عاسىرىڭنىڭ جەمىسى الداعى عۇمىرىڭا ازىق بولسىن!
باۋىرجان ومارۇلى
