30 شىلدە كۇنى ەل تاۋەلسىزدىگىنىڭ 30 جىلدىعىنا وراي، «رۋحاني جاڭعىرۋ» باعدارلاماسى اياسىندا فورت-شەۆچەنكو قالاسىنىڭ جاستارى تاريحي ورىندارعا جاياۋ جورىق جاسادى.
جورىقتىڭ ماقساتى - قالانىڭ مادەني-تاريحي ورىندارىن، ولاردىڭ قۇندىلىعىن جاستارعا تانىستىرۋ بولىپ تابىلادى. جاستاردان قۇرالعان جاياۋ جورىق جاساعى ساۋلەت قۇرىلىسىنىڭ سيرەك كەزدەسەتىن ەسكەرتكىشىنە جاتاتىن، ۇستا ءىدىرىس سەرىكباەۆتىڭ ۇيىنە، قازاق، تۇرىكمەن، ورىس، ۋكراين حالىقتارىنىڭ بىرلەسە وتىرعىزعان ورتالىق ساياباعىنا، نوۆوپەتروۆسك قامالىنىڭ قيراندىلارى ساقتالعان ورىن مەن گوتيكالىق ستيلدە سالىنعان تاريحي «كوك مەكتەپ» عيماراتىنا باردى. بۇدان بولەك، جاياۋ جورىق جاساعى ءجۇرىپ وتكەن جەرلەر تىزىمىندە ساياسي قۋعىن-سۇرگىن قۇرباندارىنىڭ مەموريالى دا، 1909-1911 جىلدارى سالىنعان اقمەشىت عيماراتى دا بار.
«ماڭعىستاۋ تاريحىنىڭ قاراشاڭىراعى سانالاتىن تۇپقاراعان اۋدانى تاريحي ورىندارعا باي ەكەنى بەلگىلى. مۇنداي ورىندار فورت-شەۆچەنكو قالاسىنىڭ اۋماعىندا دا كوپ. ءبىزدىڭ ماقساتىمىز – وسى ورىنداردى قاستەرلەي ءبىلۋدى، تاريحىن جادىمىزعا توقىپ، وزگە زامانداستارىمىزعا تانىستىرا ءجۇرۋدى كوزدەۋ. جاياۋ جورىعىمىزعا 30 جاستى تارتتىق. ولاردىڭ بۇگىن ساناسىن سەرگىپ، تاريحي مالىمەتتەرگە قانىققانىنا سەنىمدىمىن. مەنىڭشە، ەلدى ءسۇيۋ ءۇشىن الدىمەن تاريحىڭدى ءبىلۋىڭ قاجەت دەپ ويلايمىن»،- دەيدى ۇيىمداستىرۋشى، تۇپقاراعان اۋداندىق جاستار رەسۋرستىق ورتالىعى ديرەكتورىنىڭ مىندەتىن اتقارۋشى تاجبەنوۆا گۇلعاسيرا.
«ادىرنا» ۇلتتىق پورتالى
