ماڭعىستاۋ وبلىسىندا 13–14 ناۋرىزدا امال مەرەكەسىنە وراي «امال – كەلىسىم جانە بىرلىك مەرەكەسى» اتتى اۋقىمدى مادەني ءىس-شارا ۇيىمداستىرىلادى. مەرەكە باعدارلاماسى اياسىندا جەرگىلىكتى ونەرپازدارمەن قاتار شەتەلدىك ءداستۇرلى ونەر وكىلدەرى دە ونەر كورسەتىپ، تۇركى حالىقتارىنىڭ ۇلتتىق مۋزىكاسى مەن باي مادەني مۇراسىن تانىستىرادى، دەپ حابارلايدى "ادىرنا".
ولاردىڭ قاتارىندا وزبەكستان مەملەكەتتىك فيلارمونياسىنىڭ ءانشىسى ديلفۋزا كابىلەۆا بار، ول وزبەك حالىق اندەرىن شەبەر ورىنداۋىمەن تانىمال.
سونداي-اق قىرعىزستاننان بەلگىلى ءانشى، ت. ساتىلگانوۆ اتىنداعى قىرعىز مەملەكەتتىك فيلارمونياسىنىڭ ءسوليسى جانار تۋراتوۆا ونەر كورسەتەدى. ونىڭ ورىنداۋىنداعى قىرعىز حالىق اندەرى ەرەكشە ۇلتتىق بوياۋلارعا باي.
ازەربايجان رەسپۋبليكاسىنان ءداستۇرلى ءانشى سەفالي ميرزەليەۆ (Vatan Musik Group ءانسامبلىنىڭ ۆوكاليسى) كەلەدى، ول ازەربايجان حالىق مۋزىكاسىن زاماناۋي ستيلدە ناسيحاتتاۋشى ونەرپازداردىڭ ءبىرى.
سونىمەن قاتار، تۇركيادان نيلگيۋن كىزىلدجى قاتىسادى. ول انكارا مەملەكەتتىك تۇرىك حالىق مۋزىكاسى حوراسىنىڭ ۆوكاليسى، بۇل حور تۇركيا مادەنيەت جانە تۋريزم مينيسترلىگىنىڭ بەينەلەۋ ونەرى باسقارماسىندا جۇمىس ىستەيدى.
