قازاقستاندا رەسپۋبليكالىق رۋحاني-اعارتۋشىلىق باعىتتاعى MUNARA TV تەلەارناسى اشىلدى، دەپ حابارلايدى "ادىرنا" ۇلتتىق پورتالى Stan.kz اقپارات اگەنتتىگىنە سىلتەمە جاساپ.
OTAU TV ۇلتتىق جەرسەرىكتىك تەلەۆيزيا جەلىسىندە 49-شى بولىپ تىركەلگەن تەلەارنا قازاقستان مۇسىلماندارى ءدىني باسقارماسى بازاسىندا قۇرىلدى دەپ حابارلادى قمدب-نىڭ اقپارات جانە قوعاممەن بايلانىس ءبولىمى.
"ەندى قازاقستان مۇسىلماندارى ءدىني باسقارماسىنىڭ تەلەۆيزيا سالاسىنداعى اقپاراتتىق-ناسيحات جۇمىستارى وسى MUNARA TV تەلەارناسى ارقىلى تاراتىلادى. MUNARA TV حالىقتىڭ ءدىني ساۋاتىن ارتتىرۋدى، جاس كورەرمەن بويىنا يماندىلىق، ادامگەرشىلىك، پاتريوتيزم سىندى قۇندىلىقتاردى قالىپتاستىرۋدى كوزدەيدى", – دەلىنگەن ءدىني باسقارما تاراتقان اقپاراتتا.
سونداي-اق تەلەارنا ونلاين ءدارىس ۇيىمداستىرۋدى، وزەكتى ماسەلەلەر توڭىرەگىندە تىكەلەي ەفيردە جاۋاپ بەرۋدى جوسپارلاپ وتىر.
قازاقستان مۇسىلماندارى ءدىني باسقارماسىنىڭ MUNARA رەسپۋبليكالىق رۋحاني-تانىمدىق گازەتى بار. كەلەشەكتە MUNARA FM راديوسىن اشۋ جوسپارلانعان.
ءدىني باسقارمانىڭ ءتول تەلەارناسى مەن راديوسىن اشۋ 2020-2025 ستراتەگيالىق دامۋ باعدارلاماسىندا جازىلعان.
2020 جىلدىڭ قاراشاسىندا قازاقستان مۇسىلماندارى ءدىني باسقارماسى "اسىل ارنانىڭ" جابىلىپ، "حالىق ارنا" تەلەارناسىنىڭ اشىلعانىن مالىمدەدى.
"ادىرنا" ۇلتتىق پورتالى
