قازاقستان ەكولوگيا رەيتينگى بويىنشا ەڭ سوڭعى ورىندا تۇر، دەپ حابارلايدى “ادىرنا” ۇلتتىق پورتالى.
Energyprom.kz مالىمەتىنە سۇيەنسەك، قازاقستانداعى قورشاعان ورتانى قورعاۋعا، جاقسارتۋعا ميللياردتاعان دوللار دا كومەكتەسپەيتىن سياقتى. CCPI (Climate Change Performance Index) 2022 رەيتينگىنە سايكەس، قازاستان ەڭ تومەنگى ورىندى ۇپاي جيناقتادى، ياعني 19,81. وتكەن جىلمەن سالىستىرعاندا توعىز پوزيتسياعا تومەن.
CCPI - 2005 جىلدان بەرى جىل سايىن جاريالاناتىن كليماتتىڭ وزگەرىپ وتىرۋىن تەكسەرەدى. بۇل 60 ەل مەن ەۋروپالىق وداقتاعى كليماتتى قورعاۋدىڭ تيىمدىلىگىنە ارنالعان تاۋەلسىز باقىلاۋ قۇرالى.
كليمات وزگەرۋىنىڭ تيىمدىلىگى ءتورت سانات بويىنشا باعالانادى:
• پارنيكتىك گازدار شىعارىندىلارى;
• جاڭارتىلعان ەنەرگيا;
• ەنەرگيانى پايدالانۋ;
• كليماتتىق ساياسات.
ءتورت كاتەگوريا بويىنشا قازاقستاننىڭ رەيتينگى وتە تومەن.
ماسەلەن:
پارنيكتىك گازدار شىعارىندىلارى بويىنشا قازاقستان 64-ءتىڭ ىشىندە 63-ءشى ورىنعا
ال ەنەرگيانى پايدالانۋ ساناتىندا 63-ورىن
جاڭارتىلاتىن ەنەرگيا ساناتىندا 59-شى،
كليمات ساياساتى بويىنشا 54-ءشى ورىندا.
العاشقى ەڭ جاقسى دەگەن كورسەتكىشكە لايىق ءۇش ورىن بوس قالدى. ويتكەنى بىردە-ءبىر ەل يندەكس ساناتتارى بويىنشا جاقسى ناتيجە كورسەتكەن جوق. ۇزدىگى سكانديناۆيا ەلىندە بولدى:
4, 5 جانە 6 ورىنداردى دانيا (76,92 ۇپاي), شۆەتسيا (74,46 ۇپاي) جانە نورۆەگيا (73,62 ۇپاي) يەلەندى.
رەسەي دە رەيتينگى تومەن ەلدەر قاتارىندا: 56-ورىن جانە 35 ۇپاي. بەلارۋس بۇعان قاراعاندا ءبىرشاما جاقسىراق: 48-ورىن جانە 46,91 ۇپاي. الايدا بۇل دا تومەن رەيتينگتى بىلدىرەدى.
سوڭعى ورىنداردا قازاقستاننان بولەك ساۋد ارابياسى (63-ورىن، 24,45 ۇپاي) جانە يران (62-ورىن، 26,35 ۇپاي) ەلدەرى تۇر.
قازاقستاندا قورشاعان ورتانى قورعاۋعا باعىتتالعان نەگىزگى كاپيتالعا قۇيىلاتىن ينۆەستيتسيا كولەمى ءوستى. 2020 جىلعى قاڭتار-قىركۇيەكتە 115,9 ملرد تەڭگە بولسا، قازىر 118,9 ملرد تەڭگەنى قۇرايدى.
2021 جىلى سالاعا قۇيىلعان ينۆەستيتسيانىڭ جالپى كولەمىنىڭ ۇشتەن ءبىر بولىگى دەرلىك تەك جامبىل وبلىسىنىڭ ۇلەسىنە ءتيدى – 39,1 ملرد تەڭگە. ۇشتەن بىرىنەن استامى اقتوبە وبلىسىنا (18,8 ملرد تەڭگە), نۇر-سۇلتانعا (14,2 ملرد تەڭگە) جانە اتىراۋ وبلىسىنا (11 ملرد تەڭگە) تيەسىلى.
شوتلانديانىڭ گلازگو قالاسىندا وتكەن كليماتتىق كونفەرەنتسيادا قازاقستان 50-گە جۋىق مەملەكەت قول قويعان كومىردەن تازا ەنەرگياعا جاھاندىق كوشۋ جونىندەگى مالىمدەمەگە قوسىلدى.
“ادىرنا” ۇلتتىق پورتالى
