قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ مالىمەتىنشە، 30-دان استام قازاقستاندىق وقۋشى روبوتوتەحنيكادان FIRST حالىقارالىق چەمپيوناتىنىڭ ۇلتتىق فينالىنىڭ قورىتىندىسى بويىنشا اقش-قا جولداما جەڭىپ الدى. ولار الەمنىڭ 200 بەدەلدى ۋنيۆەرسيتەتىنىڭ بىرىندە وقۋ ءۇشىن گرانت پەن شاكىرتاقى الۋعا مۇمكىندىك بەرەتىن FIRST Alumni مارتەبەسىنىڭ يەگەرلەرى.
جارىسقا قازاقستاننىڭ تۇكپىر-تۇكپىرىنەن 700-دەن استام وقۋشى قاتىستى. ناتيجەسىندە 4 وقۋشى سۋلەيمان دەميرەل اتىنداعى ۋنيۆەرسيتەتتە وقۋعا مۇمكىندىك بەرەتىن گرانت ۇتىپ الدى. سونىمەن قاتار چەمپيوناتقا قاتىسقان 10 كوماندا ماسكەۋ قالاسىنداعى FIRST جارىسىنا، ال كراسنويارسك قالاسىنا 6 كوماندا اتتانادى.
«بيىل قاتىسۋشىلار «جۇك تاسىمالى» تاقىرىبى بويىنشا تاپسىرمالار ورىندادى. سوندىقتان وقۋشىلار وزدەرى ويلاپ تاپقان شاعىن جۇكتەردى تاسىمالدايتىن، تاۋارلاردى سۇرىپتايتىن جانە كەدەرگىلەردى اينالىپ وتەتىن روبوتتاردى تانىستىردى. چەمپيوناتتىڭ قورىتىندىسى بويىنشا ءتورت كوماندا اقش-قا جولداما جەڭىپ الدى. سونىمەن قوسا الماتى، سەمەي جانە تۇركىستان وبلىسىنان 4 وقۋشى ءبىلىم گرانتتارىن جەڭىپ الدى. چەمپيوناتقا ەلىمىزدىڭ شاعىن اۋىلدارى مەن قالالارىنان كەلگەن مەكتەپ وقۋشىلارىن اتاپ وتكىم كەلەدى. بۇعان دەيىن تۇركىستان، قىزىلوردا جانە شىعىس قازاقستان وبلىستارىندا، اقمولا وبلىسىنىڭ اتباسار قالاسىندا مەكتەپ وقۋشىلارى مەن مۇعالىمدەرىنە روبوتوتەحنيكادان ترەنينگتەر مەن جارىستار وتكىزىپ، بالالار مەن وقىتۋشىلاردىڭ قىزىعۋشىلىعىن كوردىك. ولار چەمپيوناتقا كەلىپ، ءبىلىم جاعىنان ۇلكەن قالالاردىڭ وقۋشىلارىنان كەم تۇسپەيتىنىنە كوزدەرىن جەتكىزە الدى»، - دەپ ايتتى قازاقستانداعى FIRST روبوتوتەحنيكا بويىنشا حالىقارالىق جارىسىنىڭ ۇيىمداستىرۋشىسى نۇرداۋلەت دوسماعامبەت.
وقۋشىلاردان بولەك، تاعى التى مۇعالىم «Best Mentor Award» نوميناتسياسى بويىنشا FIRST ماراپاتتارىنا يە بولدى.
ايتا كەتەيىك، FIRST قر ءبىلىم جانە عىلىم مينيسترلىگى وقۋشىلار مەن مۇعالىمدەردىڭ قاتىسۋى ءۇشىن ۇسىنعان وليمپيادالار تىزىمىنە ەنگىزىلگەن. جىل سايىن FIRST جارىسىنىڭ ۇيىمداستىرۋشىلارى 6 مەن 18 جاس ارالىعىنداعى بالالار اراسىندا ءتۇرلى بايقاۋلار وتكىزەدى. ءار سايىس تاقىرىبى مەن تاپسىرمالاردىڭ كۇردەلىلىگىمەن ەرەكشەلەنەدى. تاپسىرمالار ناقتى الەمدىك ماسەلەلەرمەن بايلانىستى، اتاپ ايتقاندا، ونەركاسىپتى اۆتوماتتاندىرۋ، تاۋ-كەن ءوندىرۋ، قالدىقتاردى وڭدەۋ، عارىشتى زەرتتەۋ، بيومەديتسينا جانە باسقا دا ماڭىزدى تاقىرىپتاردى قامتيدى.
«ادىرنا» ۇلتتىق پورتالى
