قازاقستانعا قىتايدان كەلگەن تۋريستەر اعىنى 17 ەسەگە ارتتى. بۇعان ءوزارا ۆيزاسىز رەجيمگە كوشۋ جانە ەلدەر اراسىندا تىكەلەي اۋە قاتىناسىنىڭ اشىلۋى ىقپال ەتتى، دەپ حابارلايدى “ادىرنا” ۇلتتىق پورتالى 24KZ سايتىنا سىلتەمە جاساپ.
تۋريزم مينيسترلىگى بيىل شەتەلدىك قوناقتاردىڭ سانى بۇدان دا كوپ بولادى دەپ سەنەدى. تۋريستەردى تارتۋ ءۇشىن 500 ميلليون تەڭگەدەن استام قارجى ءبولىنىپ، تۋريستىك سالىق تا الىنىپ تاستالدى.
ەلىمىزگە قىتاي ازاماتتارىمەن قاتار تۇركيا، ءۇندىستان جانە اقش ازاماتتارى دا ءجيى كەلۋدە. سونداي-اق كورشىلەس ەلدەردەن: وزبەكستان، رەسەي، قىرعىزستان جانە تاجىكستان ەلدەرىنەن تۋريستەر سانى تۇراقتى تۇردە ارتىپ كەلەدى.
“قازاقستان تۋريستەردى ءوزىنىڭ لاندشافتتارىمەن، مادەني بايلىعىمەن، مادەني مۇراسىمەن قىزىقتىرادى. شەتەلدىكتەر ءبىزدىڭ باستى قالالارىمىز – استانا، الماتى، شىمكەنت، سونداي-اق تۇركىستان جانە اتىراۋ وبلىستارىنا بارعاندى ءجون كورەدى. ترەندتەر تابيعي تۋريزم، ەكوتۋريزم سالاسىندا. تۋريستەردىڭ وزدەرى دە وسىعان ەرەكشە ءمان بەرەدى: «ولار ۇلتتىق ساياباقتاردا سەرۋەندەپ، جورىقتارعا قاتىسقىسى كەلەدى»، - دەيدى “Kazakh Tourism” ۇك” اق وكىلى الىشەر تۇرسىن.
”ادىرنا” ۇلتتىق پورتالى
