Qazaqstanda respýblıkalyq rýhanı-aǵartýshylyq baǵyttaǵy MUNARA TV telearnasy ashyldy, dep habarlaıdy "Adyrna" ulttyq portaly Stan.kz aqparat agenttigine silteme jasap.
OTAU TV ulttyq jerseriktik televızııa jelisinde 49-shy bolyp tirkelgen telearna Qazaqstan musylmandary dinı basqarmasy bazasynda quryldy dep habarlady QMDB-nyń aqparat jáne qoǵammen baılanys bólimi.
"Endi Qazaqstan musylmandary dinı basqarmasynyń televızııa salasyndaǵy aqparattyq-nasıhat jumystary osy MUNARA TV telearnasy arqyly taratylady. MUNARA TV halyqtyń dinı saýatyn arttyrýdy, jas kórermen boıyna ımandylyq, adamgershilik, patrıotızm syndy qundylyqtardy qalyptastyrýdy kózdeıdi", – delingen dinı basqarma taratqan aqparatta.
Sondaı-aq telearna onlaın dáris uıymdastyrýdy, ózekti máseleler tóńireginde tikeleı efırde jaýap berýdi josparlap otyr.
Qazaqstan musylmandary dinı basqarmasynyń MUNARA respýblıkalyq rýhanı-tanymdyq gazeti bar. Keleshekte MUNARA FM radıosyn ashý josparlanǵan.
Dinı basqarmanyń tól telearnasy men radıosyn ashý 2020-2025 strategııalyq damý baǵdarlamasynda jazylǵan.
2020 jyldyń qarashasynda Qazaqstan musylmandary dinı basqarmasy "Asyl arnanyń" jabylyp, "Halyq arna" telearnasynyń ashylǵanyn málimdedi.
"Adyrna" ulttyq portaly
