قازاقتىڭ 73-ءشى باپكەرى

928

(ەلەۋلى ەلۋ توعىز)

بۇگىن - قالامى قارىمدى سپورت ءجۋرناليسى، جازۋ ونەرىنىڭ شەبەرى قىدىربەك رىسبەكتىڭ تۋعان كۇنى. بوزبالا كەزىمىزدە الماتىدا تابىستىق. ءبىز وقۋ ىزدەپ، وتتاي جانعان وڭتۇستىكتەن كەلدىك. ول قىر ارقاسىن سوقا جىرتقان، ورىسى مەن ورمانى كوپ سولتۇستىك جاقتان كەلدى. سودان با، ساناسى سەرگەك، ويى ورامدى ەدى. ۇلت ۇپايىن تۇگەلدەيدى دە جۇرەدى. ءبىز كازگۋ-ءدىڭ جۋرفاگىنا، ول كازپي-ءدىڭ تارفاگىنا ءتۇستى. بىراق جۋرناليستەرگە ەسەسىن جىبەرگەن جوق. ەركىن جازدى، ەسىلىپ جازدى، كوسىلىپ جازدى. "بەس عاسىر جىرلايدى" مەن "باتىرلار جىرىن" جاتا-جاستانا وقىعان ونىڭ ءتىلى كەرەمەت قۇنارلى ەدى. سول ءتىلدى سالدى كوركەم كوسەمسوزدىڭ كوكپارىنا... ارقادان الاتاۋعا دەيىن كوسىلە شاۋىپ كەلگەن قۇلاگەر سىندى ەدى ول... ءبىزدىڭ تۇسىمىزدا باسپاسوزدەگىلەردىڭ دە، باسقا سوزدەگىلەردىڭ دە الىمدىلىعى مەن شالىمدىلىعى جاعىنان وعان جەتەتىنى جوق ەدى. ول ءسوزىن كەستەلەي، سويلەمىن دەستەلەي ءبىلدى. ۇلتتىق ورنەك سالدى. Əر ءسوزىنىڭ استارى مەن قاتپارىن جاتىپ الىپ زەرتتەيتىن ەدىك ءبىز ونىڭ. قاتارلاستارىمىز اراسىندا العاشقى كىتاپتى دا قىدىر شىعاردى.

ورىمدەي جاس كەزىندە دۇنيە جۇزىندەگى قۇرلىقتار قۇلاق تۇرگەن وقيعالارعا ارناۋلى ءتىلشى اتتاندىرا الاتىن "ەر-دəۋلەت" اقپارات اگەنتتىگىن قۇردى. ءتورت-بەس جىل ءدəۋىرى جۇرگەن "ەر-دəۋلەت" رەسمي اگەنتتىكتەردەن كەم تۇسكەن جوق. كەيىپكەرىمىز سوڭعى وتىز جىلدا التى وليمپيادانىڭ كۋəگەرى بولدى. كəرى قۇرلىقتاردىڭ شاڭىن قاققان تالاي ءدۇبىرلى دودالاردان شۇعىل رەپورتاج جولدادى. كەيىن سپورت ءجۋرناليسىنىڭ قالامىنا قوسا سپورت شەنەۋنىگىنىڭ پورتفەلىن ۇستادى. ءىرىلى-ۇساقتى سپورت مەكەمەلەرىن باسقاردى. ەل ارالاپ، شىمىر دەنەلى قازاق بالالارىن ىزدەپ شارق ۇردى. ءوز ىسىنە əبدەن بەرىلدى. ەگىلدى. جەگىلدى. سوگىلدى. توگىلدى. بارعان جەرىنىڭ بəرىندە جايقالىپ وسكەن قۇراقتاي جاسوسپىرىمدەر بوي كورسەتتى. سونىڭ ءبəرى شىعارماشىلىعىنا ەپتەپ قولبايلاۋ بولعانى دا راس.

جوق، قولىن بايلاعانىمەن، جولىن بايلاي قويماپتى. بۇرىن سپورت əلەمىنە ات قوسقان ۇلت ۇلانىنا قاتىستى جىلت ەتكەن جاڭالىقتى ەلگە جەدەل جەتكىزىپ، تۇعىرلى تارلانداردى تەڭدەسسىز تەڭەۋلەر ارقىلى كەيىپتەسە، ەندى قازاق سپورتىنىڭ شەجىرەسىن جاساۋمەن اينالىستى. بالۋانداردى دا، بوكسشىلاردى دا تۇگەلدەپ شىقتى.

جاقىندا ءتورت اياعىن تەڭ باسقان تاعى ءبىر تۋىندىسىن ۇسىندى. "قازاقتىڭ 72 باپكەرى" دەگەن اۋقىمدى جيناق - شۇمەكتەپ ەمەس، شەلەكتەپ توگىلگەن تەردىڭ جەمىسى. وسىدان كەيىن تالاي سپورتشىنى توماعاسىن الىپ، توپقا سالعان ونى قاي باپكەردەن كەم دەي الامىز؟!

تۋعان كۇنىڭ قۇتتى بولسىن، اينالاڭ امان، توڭىرەگىڭ تۇگەل بولسىن، قازاقتىڭ 73-ءشى باپكەرى!

باۋىرجان ومارۇلى

پىكىرلەر
رەداكتسيا تاڭداۋى