(Eleýli elý toǵyz)
Búgin - qalamy qarymdy sport jýrnalısi, jazý óneriniń sheberi Qydyrbek Rysbektiń týǵan kúni. Bozbala kezimizde Almatyda tabystyq. Biz oqý izdep, ottaı janǵan Ońtústikten keldik. Ol qyr arqasyn soqa jyrtqan, orysy men ormany kóp Soltústik jaqtan keldi. Sodan ba, sanasy sergek, oıy oramdy edi. Ult upaıyn túgeldeıdi de júredi. Biz KazGÝ-diń jýrfagyna, ol KazPI-diń tarfagyna tústi. Biraq jýrnalısterge esesin jibergen joq. Erkin jazdy, esilip jazdy, kósilip jazdy. "Bes ǵasyr jyrlaıdy" men "Batyrlar jyryn" jata-jastana oqyǵan onyń tili keremet qunarly edi. Sol tildi saldy kórkem kósemsózdiń kókparyna... Arqadan Alataýǵa deıin kósile shaýyp kelgen Qulager syndy edi ol... Bizdiń tusymyzda baspasózdegilerdiń de, basqa sózdegilerdiń de alymdylyǵy men shalymdylyǵy jaǵynan oǵan jetetini joq edi. Ol sózin kesteleı, sóılemin desteleı bildi. Ulttyq órnek saldy. Ər sóziniń astary men qatparyn jatyp alyp zertteıtin edik biz onyń. Qatarlastarymyz arasynda alǵashqy kitapty da Qydyr shyǵardy.
Órimdeı jas kezinde dúnıe júzindegi qurlyqtar qulaq túrgen oqıǵalarǵa arnaýly tilshi attandyra alatyn "Er-Dəýlet" aqparat agenttigin qurdy. Tórt-bes jyl dəýiri júrgen "Er-Dəýlet" resmı agenttikterden kem túsken joq. Keıipkerimiz sońǵy otyz jylda alty Olımpıadanyń kýəgeri boldy. Kəri qurlyqtardyń shańyn qaqqan talaı dúbirli dodalardan shuǵyl reportaj joldady. Keıin sport jýrnalısiniń qalamyna qosa sport sheneýniginiń portfelin ustady. Irili-usaqty sport mekemelerin basqardy. El aralap, shymyr deneli qazaq balalaryn izdep sharq urdy. Óz isine əbden berildi. Egildi. Jegildi. Sógildi. Tógildi. Barǵan jeriniń bərinde jaıqalyp ósken quraqtaı jasóspirimder boı kórsetti. Sonyń bəri shyǵarmashylyǵyna eptep qolbaılaý bolǵany da ras.
Joq, qolyn baılaǵanymen, jolyn baılaı qoımapty. Buryn sport əlemine at qosqan ult ulanyna qatysty jylt etken jańalyqty elge jedel jetkizip, tuǵyrly tarlandardy teńdessiz teńeýler arqyly keıiptese, endi qazaq sportynyń shejiresin jasaýmen aınalysty. Balýandardy da, boksshylardy da túgeldep shyqty.
Jaqynda tórt aıaǵyn teń basqan taǵy bir týyndysyn usyndy. "Qazaqtyń 72 bapkeri" degen aýqymdy jınaq - shúmektep emes, shelektep tógilgen terdiń jemisi. Osydan keıin talaı sportshyny tomaǵasyn alyp, topqa salǵan ony qaı bapkerden kem deı alamyz?!
Týǵan kúniń qutty bolsyn, aınalań aman, tóńiregiń túgel bolsyn, qazaqtyń 73-shi bapkeri!
Baýyrjan OMARULY
