وسكەمەن تۇرعىنى كوروناۆيرۋسقا قارسى «ۆاكتسيناتسيالانعانىن» اياق-استى بىلگەن، بىراق شىن مانىندە ول ۆاكتسينا الماعان، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
شىعىس قازاقستان وبلىسىندا دەرەكتەر بازاسىنداعى قاتەلىككە بايلانىستى 47 جاستاعى ايەل ۆاكتسينا سالعان دەپ تانىلدى. ول بۇل تۋرالى ۆاكتسينا الۋعا كەلگەن ەمحاناسىندا بىلگەن. دارىگەرلەر مۇنداي قاتەلىكتەر بۇعان دەيىن دە ورىن العانىن ايتقان.
«مەن ۆاكتسينانى الۋ ءۇشىن بولمەگە كىردىم. باسقا ءبىر مەديتسينا قىزمەتكەرى: «توقتاڭىز، ول ۆاكتسينا الىپ قويعان» دەپ ايقايلاپ جاتىر. بەلگىلى بولعانداي، مەن ۇرجار قالاسىندا ۆاكتسينا الىپپىن. مەن ءۇرجار قايدا ەكەنىن بىلمەيمىن، بىراق ول جەردە ەشقاشان بولعان ەمەسپىن. وندا تۋىستارىمىز دا، دوستارىمىز دا جوق»، - دەدى يرينا بوچارنيكوۆا.
دەرەكتەر بازاسىندا يرينا ۆاكتسينانىڭ العاشقى كومپونەنتىن 19 ماۋسىمدا الدى دەپ جازىلعان. قۇجاتتاردا ونىڭ قولى بار. قۇجاتقا سايكەس، ەندى ول ەكپەنىڭ ەكىنشى كومپونەنتىن الۋى كەرەك.
«كارتادا: شقو دەنساۋلىق ساقتاۋ باسقارماسىنىڭ ءۇرجار اۋداندىق №2 اۋرۋحاناسى، بيۋنتينوۆا انار باقتىقانقىزى وعان رۇقسات بەرگەنى جازىلعان. اقپاراتتىق كەلىسىم دە بار. بارلىعى جازىلىپ تۇر. وعان «سپۋتنيك V» ەگىلگەن»، - دەپ حابارلادى ۋچاسكەلىك مەدبيكە ايگەرىم قۇسمانوۆا.
دارىگەرلەردىڭ ايتۋىنشا، جسن دۇرىس ەنگىزىلمەگەن نەمەسە باعدارلامانىڭ ءوزى ىستەن شىققان بولۋى مۇمكىن.
«ءمان-جاي انىقتالعانعا دەيىن ءبىز وعان ۆاكتسينا ەكپەيمىز. قازىر قاتە تۋرالى ءتيىستى ورگاندارعا حابارلايمىز، قۇجاتتاردى رەتكە كەلتىرەمىز. ەگەر ونىڭ ۆاكتسيناتسيالانباعانى راستالسا، ءبىز وعان ءبىرىنشى كومپونەنتتى ەگە الامىز. بۇل تاجىريبەمىزدەگى ەكىنشى جاعداي»، - دەپ ءتۇسىندىردى وسكەمەن قالاسىنداعى «ۆيتا-1» ەمحاناسىنىڭ ديرەكتورى رايا راحيموۆا.
ايتا كەتەيىك، رەسمي دەرەكتەر بويىنشا، شقو-دا بۇگىنگى كۇنى تۇرعىنداردىڭ 90 پايىزى ءبىرىنشى كومپونەنتىن ەكتى. ال ەكىنشى كومپونەنت حالىقتىڭ 65 پايىزىنا سالىندى.
"ادىرنا" ۇلتتىق پورتالى
