الماتى وبلىسىندا ۇندىستاندىق ستۋدەنتتەر مىنگەن كولىك جول اپاتىنا ۇشىرادى، دەپ حابارلايدى «ادىرنا» ءتىلشىسى.
وبلىستىق پد مالىمەتىنشە، قايعىلى وقيعا 6 قاڭتار كۇنى «الماتى – بىشكەك» اۆتوجولىنىڭ 86-شاقىرىمىندا بولعان. اپات سالدارىنان ءۇش ادام قازا تاۋىپ, تاعى ءۇش ادام جاراقات العان.
پوليتسيا اتالعان فاكتى بويىنشا قىلمىستىق ءىس قوزعاعان.
«الدىن الا مالىمەتتەرگە سايكەس، 33 جاستاعى Toyota Alphard كولىگىنىڭ جۇرگىزۋشىسى رولگە يە بولا الماي، سالدارىنان كولىك اۋدارىلىپ كەتكەن. جۇرگىزۋشى وقيعا ورنىندا كوز جۇمدى. تاعى ەكى جولاۋشى مەديتسينالىق مەكەمەدە قايتىس بولدى، ال ءۇش ادام ءتۇرلى جاراقاتتارمەن اۋرۋحاناعا جاتقىزىلدى»،-دەلىنگەن حابارلامادا.
ءۇندىستاننىڭ قازاقستانداعى ەلشىلىگىنىڭ مالىمەتىنشە، اتالعان كولىكتە بەس ۇندىستاندىق ازامات بولعان. ولاردىڭ تورتەۋى – شىمكەنت قالاسىنداعى وڭتۇستىك قازاقستان مەديتسينا اكادەمياسىنىڭ ستۋدەنتتەرى, ال بىرەۋى – ءۇندىستاننان كەلگەن تۋريست. ەلشىلىك قازا تاپقان ازاماتتاردىڭ وتباسىلارىنا كوڭىل ايتتى.
