6 قاڭتار كۇنى تاڭەرتەڭ فرانتسيانىڭ مەدون كوممۋناسىندا رەسەيدەن قاشىپ بارعان رەسەيلىك جۋرناليست ءولى كۇيىندە تابىلدى. بۇل تۋرالى Le Figaro گازەتى جازدى، دەپ حابارلايدى «ادىرنا» ءتىلشىسى.
الدىن الا مالىمەت بويىنشا، ەر ادام جەتىنشى قاباتتاعى پاتەرىنىڭ تەرەزەسىنەن قۇلاپ كەتكەن. پوليتسيا تەكسەرۋ بارىسىندا پاتەردەن تەرەزە تۇبىنە قويىلعان ورىندىقتى، سونداي-اق قوقىس جاشىگىنەن ءدارى-دارمەكتەردى تاپقان. باسىلىم دەرەگىنشە، مارقۇم 38 جاستا بولعان، وزگە جەكە مالىمەتتەر ازىرگە جاريالانبادى.
قازىرگى ۋاقىتتا نەگىزگى نۇسقا رەتىندە سۋيتسيد قاراستىرىلىپ وتىر. قۇقىق قورعاۋ ورگاندارى ء«ولىمنىڭ ءمان-جايى مەن مارقۇمنىڭ جەكە باسىن انىقتاۋ» ءۇشىن تەرگەۋ باستاعان. Le Figaroمالىمەتىنشە، جۋرناليست بۇعان دەيىن رەسەي تاراپىنان قوقان-لوقى كورگەن بولۋى مۇمكىن.
سونداي-اق وقيعا كەزىندە پاتەردە مارقۇمنىڭ كورشىسى بولعانى انىقتالعان. ول قاتتى كۇيزەلىسكە تۇسكەن جانە تەك ورىس تىلىندە سويلەگەن، سوندىقتان ونىڭ وقيعاعا كۋا بولعان-بولماعانى ازىرگە بەلگىسىز. كورشى پوليتسيانىڭ باقىلاۋىمەن اۋرۋحاناعا جەتكىزىلگەن.
