الماتى وبلىسىنىڭ جامبىل اۋدانىندا قايعىلى وقيعا بولدى، دەپ حابارلايدى "ادىرنا" ۇلتتىق پورتالى.
ۇمبەتالى اۋىلىنداعى سۋ ايدىنىندا ءجاسوسپىرىم مۇز استىنا ءتۇسىپ، كوز جۇمدى.
بۇل تۋرالى 2 قاڭتاردا قر توتەنشە جاعدايلار مينيسترلىگى حابارلادى.
مالىمەتكە سايكەس، «112» نومىرىنە ءجاسوسپىرىمنىڭ قازا تاپقانى جونىندە حابارلاما تۇسكەن. وقيعا ورنىنا جەدەل تۇردە تجم قۇتقارۋشىلارى مەن رەسپۋبليكالىق جەدەل-قۇتقارۋ جاساعى جەتكەن.
الدىن الا دەرەكتەر بويىنشا، ءتورت ءجاسوسپىرىم ويىن بارىسىندا جۇقا مۇزدىڭ ۇستىنە شىققان. الايدا مۇز بالالاردىڭ سالماعىن كوتەرە الماي، ولار سۋعا قۇلاعان. جاقىن ماڭدا بالىق اۋلاپ جۇرگەن كۋاگەر دەرەۋ كومەككە كەلىپ، ءۇش بالانى قۇتقارىپ قالعان. وكىنىشكە قاراي، ءتورتىنشى بالانى امان الىپ قالۋ مۇمكىن بولمادى.
قازا تاپقان ءجاسوسپىرىمنىڭ ءمايىتىن روسو تجم سۇڭگۋىرلەرى سۋدان شىعارىپ، ءارى قاراي تەرگەۋ امالدارىن جۇرگىزۋ ءۇشىن پوليتسيا قىزمەتكەرلەرىنە تاپسىردى.
توتەنشە جاعدايلار مينيسترلىگى ازاماتتاردى سۋ ايدىندارى ماڭىندا قاۋىپسىزدىك شارالارىن قاتاڭ ساقتاۋعا، بالالاردى قاراۋسىز قالدىرماۋعا جانە جۇقا مۇزدىڭ ۇستىنە شىقپاۋعا تاعى دا شاقىردى. توتەنشە جاعداي تۋىنداعان جاعدايدا «112» نومىرىنە حابارلاسۋ قاجەت.
