شىمكەنت رەسپۋبليكالىق قالا ستاتۋسىنا يە بولعالى قالانىڭ الەۋمەتتىك-ەكونوميكالىق دامۋ قارقىنى ىلگەرىلەپ، وڭ وزگەرىستەر بايقالۋدا. ءۇش جىلدىڭ ىشىندە قالاعا 1 ترلن. تەڭگەدەن استام ينۆەستيتسيا تارتىلعان. 1,7 ملن. شارشى مەتر تۇرعىن ءۇي پايدالانۋعا بەرىلدى.
بۇل تۋرالى شىمكەنت قالاسى اكىمىنىڭ ورىنباسارى ەرعالي بىلىسبەكوۆ اقپاراتتىق-كوممۋنيكاتسيالىق ورتالىعى الاڭىندا قالانىڭ دامۋ ستراتەگياسى بويىنشا اتقارىلىپ جاتقان جۇمىستار تۋرالى ءباسپاسوز بريفينگىندە مالىمدەدى. وسىدان 3 جىل بۇرىن ونەركاسىپ ءونىم كولەمى 425 ملرد.تەڭگەنى قۇراسا، جىل سوڭىندا 710 ملرد.تەڭگە بولادى دەپ جوسپارلانۋدا. قالا بيۋدجەتى 2017 جىلدان بەرى 3,7 ەسە ءوسىپ، 131,2 ملرد.تەڭگەدەن بيىل 481,6 ملرد.تەڭگەگە جەتتى. سالىق بازاسى ءوسىپ، جەرگىلىكتى بيۋدجەتكە وزىندىك تۇسىمدەر 57 ملرد. تەڭگەدەن 150 ملرد. تەڭگەگە ارتقان.
– وزدەرىڭىزگە بەلگىلى بۇكىل الەمدە ورىن العان پاندەميا الەمدىك ەكونوميكاعا وراسان زيانىن تيگىزىپ وتىر. بۇل جاعداي ءبىزدىڭ قالامىزدى دا اينالىپ وتكەن جوق. كارانتيندىك شەكتەۋلەرگە بايلانىستى ساۋدا، كولىك، قىزمەت كورسەتۋ سالالارى ۇلكەن زارداپ شەكتى. ناتيجەسىندە ىسكەرلىك بەلسەندىلىك ايتارلىقتاي باياۋلادى. دەسەك تە، 2021 جىلدىڭ قاڭتار-مامىر ايىنىڭ قورىتىندىسىمەن شىمكەنتتە ونەركاسىپ ءونىم كولەمى 295 ملرد.تەڭگە بولىپ، وتكەن جىلدىڭ سايكەس كەزەڭىنەن 10,1 پايىزعا ارتتى، – دەدى ەرعالي داۋلەتبەكۇلى.
ەسەپتى كەزەڭدە وڭدەۋ ونەركاسىبىندەگى حيميا ونەركاسىبى – 2,1 ەسەگە، فارماتسەۆتيكالىق ونىمدەر ءوندىرىسى – 28,1 پايىزعا، توقىما بۇيىمدارى – 23,7 پايىزعا، تاماق ونىمدەرىن ءوندىرۋ – 15,8 پايىزعا، مەتاللۋرگيا ءوندىرىسى – 15 پايىزعا ارتىپ وتىر.
قالادا سونداي-اق ءوندىرىستى دامىتۋ ماقساتىندا، اۋدانى 718 گا 4 ونەركاسىپتىك ايماق جۇمىس ىستەيدى. اتاپ وتەر بولساق، «وڭتۇستىك» جانە «تاسساي» يندۋستريالدى ايماقتارى مەن «وڭتۇستىك» كولىك-لوگيستيكالىق ايماعى، «وڭتۇستىك» ارنايى ەكونوميكالىق ايماقتارىندا 11 مىڭنان استام جاڭا جۇمىس ورىندارىن قۇرۋمەن 254,2 ملرد. تەڭگە سوماسىنا 174 ينۆەستيتسيالىق جوبا ىسكە اسىرىلۋدا. ونىڭ ىشىندە، بۇگىنگى تاڭدا 137,5 ملرد.تەڭگە سوماسىنا 7,5 مىڭعا جۋىق جۇمىس ورنىمەن 112 جوبا ىسكە قوسىلدى. قالا ەكونوميكاسىن الداعى 5 جىلعا دامىتۋ ماقساتىندا بيىلدان باستاپ 2021-2025 جىلدارعا دامىتۋ باعدارلاماسى جاڭا فورماتتا ازىرلەنىپ، ىسكە اسىرىلۋدا.
شىمكەنت قالاسى اكىمدىگىنىڭ ءباسپاسوز قىزمەتى
