5 جىل بويى سپورت سۇيەر قاۋىمدى سارعايتا كۇتتىرگەن توكيو وليمپياداسى انە-مىنە دەگەنشە ەسىگىمىزدى قاقپاقشى. "تويدىڭ بولعانىنان بولادىسى قىزىق" دەمەكشى اتالمىش دوداعا قاتىستى بىرنەشە اقپاراتتاردى نازارلارىڭىزعا ۇسىنىپ كورمەكپىز
جاپونيانىڭ ءتورتىنشى وليمپياداسى
بۇعان دەيىن كۇنشىعىس مەملەكەتى تورتجىلدىقتىڭ باستى دوداسىن ءۇش مارتە ءوز ەلدەرىندە وتكىزۋ مارتەبەسىنە يە بولدى. العاشىندا 1940 جىلعا جوسپارلانعان وليمپيادا ويىندارى ءبىرىنشى دۇنيەجۇزىلىك سوعىستىڭ باستالۋىنا بايلانىستى وتكىزىلمەگەن بولاتىن. كەيىنگى وليمپيادالار 1964 جانە 1998 جىلى جالاۋلارىن جەلبىرەتىپ، جاپون حالقىنىڭ ايدارىنان جەل ەستىردى.
توكيونىڭ ۇلكەن ءۇزىلىسى
2006 جىلى جاپونيا بيلىگىنىڭ باستاماسىمەن «توكيونىڭ ۇلكەن ءۇزىلىسى» اتتى باعدارلاما قابىلدانىپ، كەيىن «Tokyo 2020 Vision» دەگەن اتاۋعا اۋىستىرىلدى. باعدارلامانىڭ باستى ماقساتى وليمپيادادان كەيىنگى قالا تىرشىلىگىن جوعارى دەڭگەيدە ۇستاۋ. توكيو قالاسىنا بوي كوتەرەتىن «وليمپيادا قالاشىقتارى» الامان دودا بىتكەن سوڭ دا ءوز دامۋلارىن جالعاستىرىپ، قالانىڭ كوركەيۋىنە ۇلكەن ۇلەسىن قوسپاق. وسىعان دەيىن وڭتۇستىك امەريكا، ەۆروپا ەلدەرىندە وتكىزىلگەن كوپتەگەن وليمپيادا ويىندارىنان كەيىنگى قالالاردىڭ داعدارىسقا ۇشىراعانىن ەسكەرىپ، ۇلكەن قادامعا بارعان جاپوندىقتارعا تاڭ قالماسقا بولمايدى.
باستى ستاديون
وليمپيادا ويىندارىنىڭ باستى ورداسى رەتىندە ەسەپتەلىپ وتىرعان الاڭ 2014 جىلى ەسكى وليمپيادالىق ستاديوننىڭ ورنىنا بوي كوتەرگەن بولاتىن. العاشىندا رەگبيدەن الەم كۋبوگى جارىستارىن وتكىزۋ ءۇشىن جوندەلگەن ستاديون ۋاقىتىندا دايىن بولماعاندىعىنا بايلانىستى بىردەن وليمپيادا ويىندارىن قابىلداماق. قۇرىلىستىڭ باعاسى باستاپقىدا 22ملرد دوللارعا باعالانعان بولاتىن، بىراق اتالعان باعا ەل حالقىنىڭ اراسىندا دۇربەلەڭ تۋدىرىپ، حالىقارالىق كوميتەتتەر شەشىمىمەن بيۋدجەت 1.2 ميلليون دوللارعا قىسقاردى.
وليمپيادالىق ستاديون اشىلۋ سالتاناتى، فۋتبول، رەگبي جانە كوركەم گيمناستيكا سەكىلدى سپورت تۇرلەرىن قامتىماق.
ەڭ زاماناۋي وليمپيادا
ۇيىمداستىرۋ القاسىنىڭ بولجامىنشا بۇل وليمپيادا جالپى سپورت تاريحىنداعى ەڭ زاماناۋي جانە جاڭا ونەرتابىس تەحنولوگيالارىنا تولى شارا بولماق. جاپونيالىقتار وليمپياداعا تەك سپورتتىق ەمەس، جالپى ادامزاتتىق جاڭا تەحنولوگيالاردى جۇمىلدىرماق نيەتتە.
ءۇش قاعيدا
توكيو وليمپياداسىنىڭ ىرگەسى ءۇش نەگىزگى قاعيدامەن قالانباق. ولار:
-اركەلكىلىك ارقىلى بىرلىك. بۇل ءبىزدىڭ «اقپىز، قارا، سارىمىز، اعايىنبىز ءبارىمىز»-دەگەن ماتەلەمىزگە ۇقسايدى. ۇيىمداستىرۋشىلاردىڭ تۇسىندىرۋىنشە وليمپيادا ماقساتى ادامداردى ۇلتىنا، ناسىلىنە قاراپ بولۋگە جول بەرمەۋ.
-دامۋعا ۇمتىلۋ. وليمپيادا قالاشىعىنىڭ وليمپيادادان كەيىن دە حالىق يگىلىگى ءۇشىن قىزمەت ەتۋىنىڭ ءوزى حالىقتى ءبىر ورىندا تۇرىپ قالماۋعا ۇيرەتەتىندىگى ايتپاسا دا تۇسىنىكتى. بۇل جولعى تورتجىلدىقتىڭ باسەكەسى سپورتشىلاردى دا جانكۇيەرلەردى دە ءاردايىم ءوز-ءوزىن دامىتۋ، جەتىلدىرۋ ماقساتىندا ەڭبەك ەتۋگە، ءبىلىم الۋعا شاقىرماق.
-مۇرا. سپورتتىق داستۇرلەر مەن ادامگەرشىلىك قاعيداتتارىن توكيو وليمپياداسى ءوزىنىڭ باستى قۇندىلىقتارى رەتىندە قاراستىرۋدا. بۋىندار اراسىنداعى ساباقتاستىق، كەلەر ۇرپاققا اتالعان قۇندىلىقتاردىڭ بەرىلۋى دە وليمپيادانىڭ باستى العىشارتتارىنىڭ ءبىرى رەتىندە كورىنىس تابۋدا.
5G ينتەرنەت جانە شيرتۋالدى شىندىق
2018 جىلدىڭ قىس مەزگىلىندە Intel جانە NTT كومپانيالارى 5G ينتەرنەتتىڭ دايىن ەكەندىگى تۋرالى باستاما كوتەرگەن بولاتىن. اتالعان ۇسىنىستاردى ەسكەرگەن حالىقارالىق وليمپيادا كوميتەتى Intel كومپانياسىمەن كەلىسىمگە كەلدى. ەندىگى ۋاقىتتا قالا تۇرعىندارى مەن وليمپيادا قوناقتارى جىلدام ينتەرنەتتى قولدانۋشى العاشقى تولقىننىڭ قاتارىنا قوسىلادى. بۇدان بولەك كورەرمەندەر كەز كەلگەن سپورت جارىسىن ۆيرتۋالدى شىندىق كوزىلدىرىكتەرى ارقىلى ستاديونعا بارماي-اق كورە الادى.
جەدەل پويىز
عالىمدار جەدەل جىلدامدىقتى پويىزدار 2030 جىلعا تامان قولدانىسقا ەنەدى دەپ بولجاعان بولاتىن. بىراق جاپون وندىرۋشىلەرى اتالعان بولجامدى 10 جىلعا جاڭىلدىردى. وليمپيادا ۋاقىتىندا حالىقتىڭ قاتىناۋى ءۇشىن جىلدامدىعى 600 كم/ساع-تان اساتىن جىلدام پويىزدار ىسكە قوسىلماق. پويىزدىڭ سىناق ۇلگىلەرى قازىرگى ۋاقىتتا توكيودا قولدانىسقا ەندى.
نازارلارىڭىزعا توكيو وليمپياداسىنىڭ اينالاسىنداعى اقپاراتتاردىڭ العاشقى توپتاماسىن ۇسىندىق. الداعى ۋاقىتتا تاعى دا بىرنەشە قىزىقتى فاكتتاردى ۇسىناتىن بولامىز. جاڭا زاماننىڭ وليمپياداسىن اسىعا كۇتەيىك، سپورتشىلارىمىزعا ساتتىلىك تىلەيىك، تەك اتى جامان دەرت دودانىڭ شىرقىن بۇزباسا ەكەن دەيمىز.
قۋاندىق كورگەنوۆ
