ايدا بالاەۆا «جۋرناليستيكا: اناليتيكا جانە زەرتتەۋ» ماماندىعىنىڭ اشىلۋىن قولدادى

3920
Adyrna.kz Telegram

قر اقپارات جانە قوعامدىق دامۋ ءمينيسترى ايدا بالاەۆا ەلىمىزدە جاڭادان اشىلعان «جۋرناليستيكا: اناليتيكا جانە زەرتتەۋ» ماماندىعىمەن تانىستى. م.س. نارىكباەۆ اتىنداعى كازگيۋ ۋنيۆەرسيتەتىنە ارنايى بارعان مينيستر Facebook-تەگى پاراقشاسىندا جوعارى وقۋ ورنىنان العان اسەرىمەن ءبولىستى.

«كازگيۋ — تەك ءبىلىم بەرۋگە عانا ەمەس، ستۋدەنتتىڭ دامۋىنا دا كوپ كوڭىل بولەتىن، حالىقارالىق دەڭگەيدەگى زاماناۋي ۋنيۆەرسيتەتتىڭ ەتالونى. سپورتقا باسا نازار اۋداراتىنىنا، ستۋدەنتتەردىڭ قىزىعۋشىلىعى بويىنشا ءتۇرلى قوسىمشا ساباقتارعا ءمان بەرەتىنىنە ريزا بولدىم. بىلايشا ايتقاندا، ستۋدەنتتەر ۋنيۆەرسيتەتتەگى ۋاقىتىن ءوز پايداسىنا وتكىزەدى، داميدى ءارى قوسىمشا قابىلەتتەردى مەڭگەرىپ شىعادى»,- دەپ جازادى ايدا بالاەۆا.

كەزدەسۋ بارىسىندا مينيستر مەن ۋنيۆەرسيتەت باسشىلىعى بىرلەسىپ اتقاراتىن جۇمىستارى تۋرالى اڭگىمەلەستى. جۋرناليستىك ەتيكا بويىنشا سەمينار وتكىزۋ تۋرالى، ستۋدەنتتەردىڭ ەلىمىزدەگى ۇزدىك بۇقارالىق اقپارات قۇرالدارىندا ءىس-تاجىريبەدەن ءوتۋى ماسەلەلەرىن تالقىلادى. كازگيۋ ۋنيۆەرسيتەتىنىڭ باسقارما توراعاسى تالعات نارىكباەۆ الەۋمەتتىك جەلىلەردەگى پاراقشاسىندا مينيسترمەن كەزدەسكەندە قانداي تاقىرىپتاردى قوزعاعانى تۋرالى جازدى.

«ايدا عالىمقىزىمەن بىرگە شەشۋگە بولاتىن ماسەلەلەردى اشىق تالقىلادىق. ماسس-مەديا سالاسىندا بىلىكتى مامانداردىڭ جەتىسپەۋشىلىگى، كوپتەگەن جوو-لاردا ءبىلىم باعدارلاماسى مازمۇنىنىڭ ەسكىرۋى، ءباسپاسوز بەتتەرىندەگى شىققان ماتەريالداردا دەرەكتەردىڭ تالدانباۋىنان باق-تاعى ادەپتىلىك دەڭگەيىنىڭ تومەن بولۋى سىندى ماسەلەلەردى ايتتىق», - دەيدى ۋنيۆەرسيتەت باسشىلىعى.

ەستەرىڭىزگە سالا كەتەيىك، جاقىندا كازگيۋ ۋنيۆەرسيتەتى وسى جىلدىڭ قىركۇيەك ايىندا «جۋرناليستيكا: اناليتيكا جانە زەرتتەۋ» ماماندىعى اشىلاتىنى تۋرالى حابارلادى. جاڭا ءبىلىم بەرۋ باعدارلاماسىنىڭ ماقساتى — قۇقىقتىق جانە ەكونوميكالىق سالادا، اسىرەسە سىبايلاس جەمقورلىققا قارسى ساياسات سالاسىندا تەرەڭ ءبىلىمى بار اناليتيك-جۋرناليست ماماندار دايىنداۋ.

 

م.س. نارىكباەۆ اتىنداعى كازگيۋ ۋنيۆەرسيتەتىنىڭ ءباسپاسوز قىزمەتى

8 (7172) 70-30-42

پىكىرلەر