مامىر ايىنان باستاپ قازاقستاندىقتار ۇشاق بورتىنا مۋزىكالىق اسپاپتارىن، ونىڭ ىشىندە دومبىرانى الىپ كىرە الادى. قازىر مۋزىكالىق اسپاپتاردى اۋە ارقىلى تاسىمالداۋ ماسەلەسىن زاڭنامالىق تۇرعىدا رەتتەلىپ جاتىر. بۇل تۋرالى كولىك ۆيتسە-مينيسترى تالعات لاستاەۆ ايتتى، دەپ حابارلايد "ادىرنا".
«جاقىن ارادا ءبىز جولاۋشىلار مەن جۇكتىڭ تاسىمالدانۋى تۋرالى ەرەجەلەرگە ءتيىستى وزگەرىستەر ەنگىزەمىز. وندا قانداي تارتىپپەن مۋزىكالىق اسپاپتى تاسىمالداۋعا بولاتىنى ايقىن كورسەتىلەتىن بولادى. مەنىڭ ويىمشا، ناقتىراق بولۋ ءۇشىن بۇل شەشىم ءبىر اي ىشىندە قابىلدانادى»، – دەپ ءتۇسىندىردى تالعات لاستاەۆ سەنات كۋلۋارىنداعى بريفينگ بارىسىندا.
ۆيتسە-مينيستر اتاپ وتكەندەي، جاڭا ەرەجەلەر بارلىق اۋە كومپانيالارىنا ورتاق بولادى.
ء«يا، بۇل جالپى ەرەجەلەر. شىندىعىندا، قوعام تاراپىنان سۇرانىس بار، مۋزىكالىق اسپاپتاردى تاسىمالداۋعا قاتىستى ناقتى كەيستەر بولعان. سوندىقتان جالپى ەرەجەلەر بولۋى ءۇشىن جانە اۋە كومپانيالارى وسىعان سۇيەنە الۋى ءۇشىن، ازاماتتىق اۆياتسيا كوميتەتى وسى باعىتتا بەلسەندى جۇمىس ىستەپ جاتىر»، – دەدى ۆيتسە-مينيستر.
باق وكىلى «بارلىق مۋزىكالىق اسپاپتاردى ۇشاق سالونىندا الىپ جۇرۋگە بولا ما، الدە بۇل تەك دومبىراعا قاتىستى ما؟» دەپ سۇرادى.
لاستاەۆ قازىر ءدال وسى ماسەلە جان-جاقتى تالقىلانىپ جاتقانىن ايتادى.
«بۇل اسپاپتىڭ ناقتى كولەمىنە بايلانىستى، ياعني ءبىز الدىن الا قانداي حابارلاما بەرۋ كەرەكتىگىن، ناقتى ءتارتىپ قانداي بولاتىنىن ەسكەرە وتىرىپ شەشىم قابىلدايمىز. سول ارقىلى ادام ءوزىنىڭ مۋزىكالىق اسپابىن دۇرىس جانە ەش قيىندىقسىز تاسىمالاي الاتىنىن تۇسىنەدى»، – دەدى لاستاەۆ.
ۆيتسە-ءمينيستردىڭ ايتۋىنشا، ەگەر شەشىم قابىلدانسا، قازاقستاندىقتار 2026 جىلعى مامىردان باستاپ ۇشاققا مۋزىكالىق اسپاپتارىن الىپ كىرە الادى.
