قىرعىزستاننىڭ ۇلتتىق قاۋىپسىزدىك مەملەكەتتىك كوميتەتىنىڭ بۇرىنعى توراعاسى قامشىبەك تاشيەۆ ءىىم تەرگەۋىندە بولدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
جەرگىلىكتى دەرەككوزدەردىڭ مالىمەتىنشە، تاشيەۆ ەكى قىلمىستىق ءىس بويىنشا كۋاگەر رەتىندە تەرگەۋ-وپەراتيۆتىك ءىس-شارالارعا شاقىرىلعان. ول تەرگەۋشىگە ادۆوكاتىمەن بىرگە كەلگەن. جاۋاپ الۋ شامامەن بەس ساعاتقا سوزىلعان. قۇقىق قورعاۋ ورگاندارى بۇل جاعدايعا قاتىستى ازىرگە رەسمي تۇسىنىكتەمە بەرگەن جوق.
قىرعىزستاندىق جۋرناليستەردىڭ بولجامىنشا، بۇل ءىس «قىرعىزمۇنايگاز» كومپانياسىنا قاتىستى تەرگەۋمەن بايلانىستى بولۋى مۇمكىن. مەملەكەتتىك سالىق قىزمەتىنىڭ دەرەگىنە سايكەس، اتالعان ىستە «كوپميللياردتىق زاڭبۇزۋشىلىقتار» انىقتالعان.
تەرگەۋ اياسىندا كومپانيانىڭ بىرقاتار توپ-مەنەدجەرلەرى، سونىڭ ىشىندە تاشيەۆتىڭ تۋىسى بايعازى ماتيساقوۆ ۇستالعان. ماماندار 2021–2025 جىلدار ارالىعىنداعى تسيفرلىق شوت-فاكتۋرالاردى زەرتتەپ، بيۋدجەتكە كەلتىرىلگەن شىعىن كولەمىن 4 ميلليارد سومنان اسادى دەپ باعالاعان.
ماتەريالداردا تاشيەۆتىڭ باۋىرلارى — شايىربەك پەن قازىبەك تاشيەۆتەرگە قاتىسى بار قۇرىلىمدار، سونداي-اق ونىڭ ۇلى تاي-مۇراس تاشيەۆكە تيەسىلى «موكا گرۋپپ» كومپانياسى دا اتالادى. الايدا تاي-مۇراس تاشيەۆ بۇل ايىپتاۋلاردى جوققا شىعاردى.
ەسكە سالايىق، سادىر جاپاروۆ 10 اقپاندا قامشىبەك تاشيەۆتىڭ ۆيتسە-پرەمەر جانە ۇقمك باسشىسى قىزمەتىنەن كەتكەنىن جاريالاعان ەدى. سول كەزدە تاشيەۆ گەرمانيادا مەديتسينالىق تەكسەرىستەن ءوتىپ جاتقان.
119 مىڭ تەڭگەدەن - 388 مىڭ تەڭگەگە دەيىن. قىرعىزستاندا جالعان اقپارات تاراتقاندارعا ايىپپۇل سالىنادى
